౮. సారమ్మణానారమ్మణవారో

౧౦౩౨. పఞ్చన్నం ఖన్ధానం కతి సారమ్మణా, కతి అనారమ్మణా…పే… సత్తన్నం చిత్తానం కతి సారమ్మణా, కతి అనారమ్మణా?

౧౦౩౩. రూపక్ఖన్ధో అనారమ్మణో. చత్తారో ఖన్ధా సారమ్మణా.

దసాయతనా అనారమ్మణా. మనాయతనం సారమ్మణం. ధమ్మాయతనం సియా సారమ్మణం, సియా అనారమ్మణం.

దస ధాతుయో అనారమ్మణా. సత్త ధాతుయో సారమ్మణా. ధమ్మధాతు సియా సారమ్మణా, సియా అనారమ్మణా.

ద్వే సచ్చా సారమ్మణా. నిరోధసచ్చం అనారమ్మణం. దుక్ఖసచ్చం సియా సారమ్మణం, సియా అనారమ్మణం.

సత్తిన్ద్రియా అనారమ్మణా. చుద్దసిన్ద్రియా సారమ్మణా. జీవితిన్ద్రియం సియా సారమ్మణం, సియా అనారమ్మణం. నవ హేతూ సారమ్మణా. కబళీకారో ఆహారో అనారమ్మణో. తయో ఆహారా సారమ్మణా. సత్త ఫస్సా… సత్త వేదనా… సత్త సఞ్ఞా… సత్త చేతనా… సత్త చిత్తా సారమ్మణా.

౧౦౩౪. పఞ్చన్నం ఖన్ధానం కతి సారమ్మణారమ్మణా, కతి అనారమ్మణారమ్మణా…పే… సత్తన్నం చిత్తానం కతి సారమ్మణారమ్మణా, కతి అనారమ్మణారమ్మణా?

౧౦౩౫. రూపక్ఖన్ధో అనారమ్మణో. చత్తారో ఖన్ధా సియా సారమ్మణారమ్మణా, సియా అనారమ్మణారమ్మణా.

దసాయతనా అనారమ్మణా. మనాయతనం సియా సారమ్మణారమ్మణం, సియా అనారమ్మణారమ్మణం. ధమ్మాయతనం సియా సారమ్మణారమ్మణం, సియా అనారమ్మణారమ్మణం, సియా అనారమ్మణం.

దస ధాతుయో అనారమ్మణా. ఛ ధాతుయో అనారమ్మణారమ్మణా. మనోవిఞ్ఞాణధాతు సియా సారమ్మణారమ్మణా, సియా అనారమ్మణారమ్మణా. ధమ్మధాతు సియా సారమ్మణారమ్మణా, సియా అనారమ్మణారమ్మణా, సియా అనారమ్మణా.

నిరోధసచ్చం అనారమ్మణం. మగ్గసచ్చం అనారమ్మణారమ్మణం. సముదయసచ్చం సియా సారమ్మణారమ్మణం, సియా అనారమ్మణారమ్మణం. దుక్ఖసచ్చం సియా సారమ్మణారమ్మణం, సియా అనారమ్మణారమ్మణం, సియా అనారమ్మణం.

సత్తిన్ద్రియా అనారమ్మణా. పఞ్చిన్ద్రియా అనారమ్మణారమ్మణా. నవిన్ద్రియా సియా సారమ్మణారమ్మణా, సియా అనారమ్మణారమ్మణా. జీవితిన్ద్రియం సియా సారమ్మణారమ్మణం, సియా అనారమ్మణారమ్మణం, సియా అనారమ్మణం.

నవ హేతూ సియా సారమ్మణారమ్మణా, సియా అనారమ్మణారమ్మణా. కబళీకారో ఆహారో అనారమ్మణో. తయో ఆహారా సియా సారమ్మణారమ్మణా, సియా అనారమ్మణారమ్మణా. ఛ ఫస్సా అనారమ్మణారమ్మణా. మనోవిఞ్ఞాణధాతుసమ్ఫస్సో సియా సారమ్మణారమ్మణో సియా అనారమ్మణారమ్మణో. ఛ వేదనా… ఛ సఞ్ఞా… ఛ చేతనా… ఛ చిత్తా అనారమ్మణారమ్మణా. మనోవిఞ్ఞాణధాతు సియా సారమ్మణారమ్మణా, సియా అనారమ్మణారమ్మణా.