౭. అభిఞ్ఞేయ్యాదివారో

౧౦౩౦. పఞ్చన్నం ఖన్ధానం కతి అభిఞ్ఞేయ్యా, కతి పరిఞ్ఞేయ్యా, కతి పహాతబ్బా, కతి భావేతబ్బా, కతి సచ్ఛికాతబ్బా, కతి న పహాతబ్బా, న భావేతబ్బా, న సచ్ఛికాతబ్బా…పే… సత్తన్నం చిత్తానం కతి అభిఞ్ఞేయ్యా, కతి పరిఞ్ఞేయ్యా, కతి పహాతబ్బా, కతి భావేతబ్బా, కతి సచ్ఛికాతబ్బా, కతి న పహాతబ్బా న భావేతబ్బా న సచ్ఛికాతబ్బా?

౧౦౩౧. రూపక్ఖన్ధో అభిఞ్ఞేయ్యో పరిఞ్ఞేయ్యో న పహాతబ్బో న భావేతబ్బో న సచ్ఛికాతబ్బో. చత్తారో ఖన్ధా అభిఞ్ఞేయ్యా పరిఞ్ఞేయ్యా, సియా పహాతబ్బా, సియా భావేతబ్బా, సియా సచ్ఛికాతబ్బా, సియా న పహాతబ్బా న భావేతబ్బా న సచ్ఛికాతబ్బా.

దసాయతనా అభిఞ్ఞేయ్యా పరిఞ్ఞేయ్యా న పహాతబ్బా న భావేతబ్బా న సచ్ఛికాతబ్బా. ద్వే ఆయతనా అభిఞ్ఞేయ్యా పరిఞ్ఞేయ్యా, సియా పహాతబ్బా, సియా భావేతబ్బా, సియా సచ్ఛికాతబ్బా, సియా న పహాతబ్బా న భావేతబ్బా న సచ్ఛికాతబ్బా.

సోళస ధాతుయో అభిఞ్ఞేయ్యా పరిఞ్ఞేయ్యా న పహాతబ్బా న భావేతబ్బా న సచ్ఛికాతబ్బా. ద్వే ధాతుయో అభిఞ్ఞేయ్యా పరిఞ్ఞేయ్యా, సియా పహాతబ్బా, సియా భావేతబ్బా, సియా సచ్ఛికాతబ్బా, సియా న పహాతబ్బా న భావేతబ్బా న సచ్ఛికాతబ్బా.

సముదయసచ్చం అభిఞ్ఞేయ్యం పరిఞ్ఞేయ్యం పహాతబ్బం న భావేతబ్బం న సచ్ఛికాతబ్బం. మగ్గసచ్చం అభిఞ్ఞేయ్యం పరిఞ్ఞేయ్యం న పహాతబ్బం భావేతబ్బం న సచ్ఛికాతబ్బం. నిరోధసచ్చం అభిఞ్ఞేయ్యం పరిఞ్ఞేయ్యం న పహాతబ్బం న భావేతబ్బం సచ్ఛికాతబ్బం. దుక్ఖసచ్చం అభిఞ్ఞేయ్యం పరిఞ్ఞేయ్యం, సియా పహాతబ్బం, న భావేతబ్బం, న సచ్ఛికాతబ్బం, సియా న పహాతబ్బం.

నవిన్ద్రియా అభిఞ్ఞేయ్యా పరిఞ్ఞేయ్యా న పహాతబ్బా న భావేతబ్బా న సచ్ఛికాతబ్బా. దోమనస్సిన్ద్రియం అభిఞ్ఞేయ్యం పరిఞ్ఞేయ్యం పహాతబ్బం న భావేతబ్బం న సచ్ఛికాతబ్బం. అనఞ్ఞాతఞ్ఞస్సామీతిన్ద్రియం అభిఞ్ఞేయ్యం పరిఞ్ఞేయ్యం న పహాతబ్బం భావేతబ్బం న సచ్ఛికాతబ్బం. అఞ్ఞిన్ద్రియం అభిఞ్ఞేయ్యం పరిఞ్ఞేయ్యం న పహాతబ్బం, సియా భావేతబ్బం, సియా సచ్ఛికాతబ్బం. అఞ్ఞాతావిన్ద్రియం అభిఞ్ఞేయ్యం పరిఞ్ఞేయ్యం న పహాతబ్బం న భావేతబ్బం సచ్ఛికాతబ్బం. తీణిన్ద్రియా అభిఞ్ఞేయ్యా పరిఞ్ఞేయ్యా న పహాతబ్బా, సియా భావేతబ్బా, సియా సచ్ఛికాతబ్బా, సియా న భావేతబ్బా, సచ్ఛికాతబ్బా. ఛ ఇన్ద్రియా అభిఞ్ఞేయ్యా పరిఞ్ఞేయ్యా, సియా పహాతబ్బా, సియా భావేతబ్బా, సియా సచ్ఛికాతబ్బా, సియా న పహాతబ్బా న భావేతబ్బా న సచ్ఛికాతబ్బా.

తయో అకుసలహేతూ అభిఞ్ఞేయ్యా పరిఞ్ఞేయ్యా పహాతబ్బా న భావేతబ్బా న సచ్ఛికాతబ్బా. తయో కుసలహేతూ అభిఞ్ఞేయ్యా పరిఞ్ఞేయ్యా న పహాతబ్బా, సియా భావేతబ్బా, న సచ్ఛికాతబ్బా, సియా న భావేతబ్బా. తయో అబ్యాకతహేతూ అభిఞ్ఞేయ్యా పరిఞ్ఞేయ్యా న పహాతబ్బా న భావేతబ్బా, సియా సచ్ఛికాతబ్బా, సియా న సచ్ఛికాతబ్బా.

కబళీకారో ఆహారో అభిఞ్ఞేయ్యో పరిఞ్ఞేయ్యో న పహాతబ్బో న భావేతబ్బో న సచ్ఛికాతబ్బో. తయో ఆహారా అభిఞ్ఞేయ్యా పరిఞ్ఞేయ్యా, సియా పహాతబ్బా, సియా భావేతబ్బా, సియా సచ్ఛికాతబ్బా, సియా న పహాతబ్బా న భావేతబ్బా న సచ్ఛికాతబ్బా.

ఛ ఫస్సా అభిఞ్ఞేయ్యా పరిఞ్ఞేయ్యా న పహాతబ్బా న భావేతబ్బా న సచ్ఛికాతబ్బా. మనోవిఞ్ఞాణధాతుసమ్ఫస్సో అభిఞ్ఞేయ్యో పరిఞ్ఞేయ్యో, సియా పహాతబ్బో, సియా భావేతబ్బో, సియా సచ్ఛికాతబ్బో, సియా న పహాతబ్బో న భావేతబ్బో న సచ్ఛికాతబ్బో.

ఛ వేదనా…పే… ఛ సఞ్ఞా… ఛ చేతనా… ఛ చిత్తా అభిఞ్ఞేయ్యా పరిఞ్ఞేయ్యా న పహాతబ్బా న భావేతబ్బా న సచ్ఛికాతబ్బా. మనోవిఞ్ఞాణధాతు అభిఞ్ఞేయ్యా పరిఞ్ఞేయ్యా, సియా పహాతబ్బా, సియా భావేతబ్బా, సియా సచ్ఛికాతబ్బా, సియా న పహాతబ్బా న భావేతబ్బా న సచ్ఛికాతబ్బా.