౧. ఉప్పాదకకమ్మం

౧౦౨౧. దేవాతి. తయో దేవా – సమ్ముతిదేవా [సమ్మతిదేవా (స్యా.)], ఉపపత్తిదేవా, విసుద్ధిదేవా.

సమ్ముతిదేవా నామ – రాజానో, దేవియో, కుమారా.

ఉపపత్తిదేవా నామ – చాతుమహారాజికే [చాతుమ్మహారాజికే (సీ. స్యా.)] దేవే ఉపాదాయ తదుపరి దేవా.

విసుద్ధిదేవా నామ – అరహన్తో వుచ్చన్తి.

దానం దత్వా, సీలం సమాదియిత్వా, ఉపోసథకమ్మం కత్వా కత్థ ఉపపజ్జన్తి? దానం దత్వా, సీలం సమాదియిత్వా, ఉపోసథకమ్మం కత్వా అప్పేకచ్చే ఖత్తియమహాసాలానం సహబ్యతం ఉపపజ్జన్తి, అప్పేకచ్చే బ్రాహ్మణమహాసాలానం సహబ్యతం ఉపపజ్జన్తి, అప్పేకచ్చే గహపతిమహాసాలానం సహబ్యతం ఉపపజ్జన్తి, అప్పేకచ్చే చాతుమహారాజికానం దేవానం సహబ్యతం ఉపపజ్జన్తి, అప్పేకచ్చే తావతింసానం దేవానం సహబ్యతం ఉపపజ్జన్తి, అప్పేకచ్చే యామానం దేవానం సహబ్యతం ఉపపజ్జన్తి, అప్పేకచ్చే తుసితానం దేవానం సహబ్యతం ఉపపజ్జన్తి, అప్పేకచ్చే నిమ్మానరతీనం దేవానం సహబ్యతం ఉపపజ్జన్తి, అప్పేకచ్చే పరనిమ్మితవసవత్తీనం దేవానం సహబ్యతం ఉపపజ్జన్తి.