౫. వితక్కత్తికం

౧౦౪౨. పఞ్చన్నం ఖన్ధానం కతి సవితక్కసవిచారా, కతి అవితక్కవిచారమత్తా, కతి అవితక్కఅవిచారా…పే… సత్తన్నం చిత్తానం కతి సవితక్కసవిచారా, కతి అవితక్కవిచారమత్తా, కతి అవితక్కఅవిచారా?

రూపక్ఖన్ధో అవితక్కఅవిచారో. తయో ఖన్ధా సియా సవితక్కసవిచారా, సియా అవితక్కవిచారమత్తా, సియా అవితక్కఅవిచారా. సఙ్ఖారక్ఖన్ధో సియా సవితక్కసవిచారో, సియా అవితక్కవిచారమత్తో, సియా అవితక్కఅవిచారో సియా న వత్తబ్బో సవితక్కసవిచారోతిపి, అవితక్కవిచారమత్తోతిపి, అవితక్కఅవిచారోతిపి.

దసాయతనా అవితక్కఅవిచారా. మనాయతనం సియా సవితక్కసవిచారం, సియా అవితక్కవిచారమత్తం, సియా అవితక్కఅవిచారం. ధమ్మాయతనం సియా సవితక్కసవిచారం, సియా అవితక్కవిచారమత్తం, సియా అవితక్కఅవిచారం, సియా న వత్తబ్బం సవితక్కసవిచారన్తిపి, అవితక్కవిచారమత్తన్తిపి, అవితక్కఅవిచారన్తిపి.

పన్నరస ధాతుయో అవితక్కఅవిచారా. మనోధాతు సవితక్కసవిచారా. మనోవిఞ్ఞాణధాతు సియా సవితక్కసవిచారా, సియా అవితక్కవిచారమత్తా, సియా అవితక్కఅవిచారా. ధమ్మధాతు సియా సవితక్కసవిచారా, సియా అవితక్కవిచారమత్తా, సియా అవితక్కఅవిచారా, సియా న వత్తబ్బా సవితక్కసవిచారాతిపి, అవితక్కవిచారమత్తాతిపి, అవితక్కఅవిచారాతిపి.

సముదయసచ్చం సవితక్కసవిచారం. నిరోధసచ్చం అవితక్కఅవిచారం. మగ్గసచ్చం సియా సవితక్కసవిచారం, సియా అవితక్కవిచారమత్తం, సియా అవితక్కఅవిచారం. దుక్ఖసచ్చం సియా సవితక్కసవిచారం, సియా అవితక్కవిచారమత్తం, సియా అవితక్కఅవిచారం, సియా న వత్తబ్బం సవితక్కసవిచారన్తిపి, అవితక్కవిచారమత్తన్తిపి, అవితక్కఅవిచారన్తిపి.

నవిన్ద్రియా అవితక్కఅవిచారా. దోమనస్సిన్ద్రియం సవితక్కసవిచారం. ఉపేక్ఖిన్ద్రియం సియా సవితక్కసవిచారం, సియా అవితక్కఅవిచారం. ఏకాదసిన్ద్రియా సియా సవితక్కసవిచారా, సియా అవితక్కవిచారమత్తా, సియా అవితక్కఅవిచారా.

తయో అకుసలహేతూ సవితక్కసవిచారా. ఛ హేతూ సియా సవితక్కసవిచారా, సియా అవితక్కవిచారమత్తా, సియా అవితక్కఅవిచారా. కబళీకారో ఆహారో అవితక్కఅవిచారో. తయో ఆహారా సియా సవితక్కసవిచారా, సియా అవితక్కవిచారమత్తా, సియా అవితక్కఅవిచారా. పఞ్చ ఫస్సా అవితక్కఅవిచారా. మనోధాతుసమ్ఫస్సో సవితక్కసవిచారో. మనోవిఞ్ఞాణధాతుసమ్ఫస్సో సియా సవితక్కసవిచారో, సియా అవితక్కవిచారమత్తో, సియా అవితక్కఅవిచారో. పఞ్చ వేదనా… పఞ్చ సఞ్ఞా… పఞ్చ చేతనా… పఞ్చ చిత్తా అవితక్కఅవిచారా మనోధాతు సవితక్కసవిచారా, మనోవిఞ్ఞాణధాతు సియా సవితక్కసవిచారా, సియా అవితక్కవిచారమత్తా, సియా అవితక్కఅవిచారా.