(౭) అట్ఠ అసఞ్ఞీవాదా

౯౫౮. తత్థ కతమే అట్ఠ అసఞ్ఞీవాదా? ‘‘రూపీ అత్తా హోతి అరోగో పరం మరణా’’తి – అసఞ్ఞీతి నం పఞ్ఞపేన్తి; అరూపీ అత్తా…పే… రూపీ చ అరూపీ చ…పే… నేవరూపీనారూపీ…పే… ‘‘అన్తవా అత్తా హోతి అరోగో పరం మరణా’’తి – అసఞ్ఞీతి నం పఞ్ఞపేన్తి; ‘‘అనన్తవా అత్తా హోతి అరోగో పరం మరణా’’తి – అసఞ్ఞీతి నం పఞ్ఞపేన్తి; ‘‘అన్తవా చ అనన్తవా చ అత్తా హోతి అరోగో పరం మరణా’’తి – అసఞ్ఞీతి నం పఞ్ఞపేన్తి; ‘‘నేవన్తవా నానన్తవా అత్తా హోతి అరోగో పరం మరణా’’తి – అసఞ్ఞీతి నం పఞ్ఞపేన్తి. ఇమే అట్ఠ అసఞ్ఞీవాదా.