(౩౩. క) అరియానం అదస్సనకమ్యతా

౯౩౪. తత్థ కతమా అరియానం అదస్సనకమ్యతా? తత్థ కతమే అరియా? అరియా వుచ్చన్తి బుద్ధా చ బుద్ధసావకా చ. యా ఇమేసం అరియానం అదస్సనకమ్యతా అదట్ఠుకమ్యతా అసమేతుకమ్యతా అసమాగన్తుకమ్యతా – అయం వుచ్చతి ‘‘అరియానం అదస్సనకమ్యతా’’.

(ఖ) సద్ధమ్మం అసోతుకమ్యతా

తత్థ కతమా సద్ధమ్మం అసోతుకమ్యతా? తత్థ కతమో సద్ధమ్మో? చత్తారో సతిపట్ఠానా, చత్తారో సమ్మప్పధానా, చత్తారో ఇద్ధిపాదా, పఞ్చిన్ద్రియాని, పఞ్చ బలాని, సత్త బోజ్ఝఙ్గా, అరియో అట్ఠఙ్గికో మగ్గో – అయం వుచ్చతి ‘‘సద్ధమ్మో’’. యా ఇమస్స సద్ధమ్మస్స అసోతుకమ్యతా అసవనకమ్యతా అనుగ్గహేతుకమ్యతా అధారేతుకమ్యతా – అయం వుచ్చతి ‘‘సద్ధమ్మం అసోతుకమ్యతా’’.

(గ) ఉపారమ్భచిత్తతా

తత్థ కతమా ఉపారమ్భచిత్తతా? తత్థ కతమో ఉపారమ్భో? యో ఉపారమ్భో అనుపారమ్భో ఉపారమ్భనా అనుపారమ్భనా అనుపారమ్భితత్తం ఉఞ్ఞా అవఞ్ఞా పరిభవో రన్ధగవేసితా – అయం వుచ్చతి ‘‘ఉపారమ్భచిత్తతా’’.