(౧౭) సీలవిపత్తి చ దిట్ఠివిపత్తి చ

౯౦౭. (క) తత్థ కతమా సీలవిపత్తి? యో కాయికో వీతిక్కమో వాచసికో వీతిక్కమో కాయికవాచసికో వీతిక్కమో – అయం వుచ్చతి ‘‘సీలవిపత్తి’’. సబ్బమ్పి దుస్సీల్యం సీలవిపత్తి.

(ఖ) తత్థ కతమా దిట్ఠివిపత్తి? ‘‘నత్థి దిన్నం, నత్థి యిట్ఠం…పే… యే ఇమఞ్చ లోకం పరఞ్చ లోకం సయం అభిఞ్ఞా సచ్ఛికత్వా పవేదేన్తీ’’తి – యా ఏవరూపా దిట్ఠి దిట్ఠిగతం…పే… విపరియాసగ్గాహో – అయం వుచ్చతి ‘‘దిట్ఠివిపత్తి’’. సబ్బాపి మిచ్ఛాదిట్ఠి దిట్ఠివిపత్తి.