౧౦. దసకనిద్దేసో

(౧) దస కిలేసవత్థూని

౯౬౬. తత్థ కతమాని దస కిలేసవత్థూని? లోభో, దోసో, మోహో, మానో, దిట్ఠి, విచికిచ్ఛా, థినం, ఉద్ధచ్చం, అహిరికం, అనోత్తప్పం – ఇమాని దస కిలేసవత్థూని.

(౨) దస ఆఘాతవత్థూని

౯౬౭. తత్థ కతమాని దస ఆఘాతవత్థూని? ‘‘అనత్థం మే అచరీ’’తి ఆఘాతో జాయతి, ‘‘అనత్థం మే చరతీ’’తి ఆఘాతో జాయతి, ‘‘అనత్థం మే చరిస్సతీ’’తి ఆఘాతో జాయతి, ‘‘పియస్స మే మనాపస్స అనత్థం అచరి’’…పే… అనత్థం చరతి…పే… అనత్థం చరిస్సతీతి ఆఘాతో జాయతి, అప్పియస్స మే అమనాపస్స అత్థం అచరి…పే… అత్థం చరతి…పే… అత్థం చరిస్సతీతి ఆఘాతో జాయతి, అట్ఠానే వా పన ఆఘాతో జాయతి – ఇమాని దస ఆఘాతవత్థూని.

(౩) దస అకుసలకమ్మపథా

౯౬౮. తత్థ కతమే దస అకుసలకమ్మపథా? పాణాతిపాతో, అదిన్నాదానం, కామేసుమిచ్ఛాచారో, ముసావాదో, పిసుణా వాచా, ఫరుసా వాచా, సమ్ఫప్పలాపో, అభిజ్ఝా, బ్యాపాదో, మిచ్ఛాదిట్ఠి – ఇమే దస అకుసలకమ్మపథా.

(౪) దస సంయోజనాని

౯౬౯. తత్థ కతమాని దస సంయోజనాని? కామరాగసంయోజనం, పటిఘసంయోజనం, మానసంయోజనం, దిట్ఠిసంయోజనం, విచికిచ్ఛాసంయోజనం, సీలబ్బతపరామాససంయోజనం, భవరాగసంయోజనం, ఇస్సాసంయోజనం, మచ్ఛరియసంయోజనం, అవిజ్జాసంయోజనం – ఇమాని దస సంయోజనాని.

(౫) దస మిచ్ఛత్తా

౯౭౦. తత్థ కతమే దస మిచ్ఛత్తా? మిచ్ఛాదిట్ఠి, మిచ్ఛాసఙ్కప్పో, మిచ్ఛావాచా, మిచ్ఛాకమ్మన్తో, మిచ్ఛాఆజీవో, మిచ్ఛావాయామో, మిచ్ఛాసతి, మిచ్ఛాసమాధి, మిచ్ఛాఞాణం, మిచ్ఛావిముత్తి – ఇమే దస మిచ్ఛత్తా.

(౬) దసవత్థుకా మిచ్ఛాదిట్ఠి

౯౭౧. తత్థ కతమా దసవత్థుకా మిచ్ఛాదిట్ఠి? నత్థి దిన్నం, నత్థి యిట్ఠం, నత్థి హుతం, నత్థి సుకతదుక్కటానం కమ్మానం ఫలం విపాకో, నత్థి అయం లోకో, నత్థి పరో లోకో, నత్థి మాతా, నత్థి పితా, నత్థి సత్తా ఓపపాతికా, నత్థి లోకే సమణబ్రాహ్మణా సమ్మగ్గతా [సమగ్గతా (క.)] సమ్మా పటిపన్నా యే ఇమఞ్చ లోకం పరఞ్చ లోకం సయం అభిఞ్ఞా సచ్ఛికత్వా పవేదేన్తీతి – అయం దసవత్థుకా మిచ్ఛాదిట్ఠి.

(౭) దసవత్థుకా అన్తగ్గాహికా దిట్ఠి

౯౭౨. తత్థ కతమా దసవత్థుకా అన్తగ్గాహికా దిట్ఠి? సస్సతో లోకోతి వా, అసస్సతో లోకోతి వా, అన్తవా లోకోతి వా, అనన్తవా లోకోతి వా, తం జీవం తం సరీరన్తి వా, అఞ్ఞం జీవం అఞ్ఞం సరీరన్తి వా, హోతి తథాగతో పరం మరణాతి వా, న హోతి తథాగతో పరం మరణాతి వా, హోతి చ న చ హోతి తథాగతో పరం మరణాతి వా, నేవ హోతి న న హోతి తథాగతో పరం మరణాతి వా – అయం దసవత్థుకా అన్తగ్గాహికా దిట్ఠి.

దసకం.