౬. ఛక్కపుగ్గలపఞ్ఞత్తి

౨౦౨. తత్ర య్వాయం పుగ్గలో పుబ్బే అననుస్సుతేసు ధమ్మేసు సామం సచ్చాని అభిసమ్బుజ్ఝతి, తత్థ చ సబ్బఞ్ఞుతం పాపుణాతి బలేసు చ వసీభావం, సమ్మాసమ్బుద్ధో తేన దట్ఠబ్బో.

తత్ర య్వాయం పుగ్గలో పుబ్బే అననుస్సుతేసు ధమ్మేసు సామం సచ్చాని అభిసమ్బుజ్ఝతి, న చ తత్థ సబ్బఞ్ఞుతం పాపుణాతి న చ బలేసు వసీభావం, పచ్చేకసమ్బుద్ధో తేన దట్ఠబ్బో.

తత్ర య్వాయం పుగ్గలో పుబ్బే అననుస్సుతేసు ధమ్మేసు సామం సచ్చాని అనభిసమ్బుజ్ఝతి, దిట్ఠేవ ధమ్మే దుక్ఖస్సన్తకరో హోతి [దుక్ఖస్సన్తం కరోతి (సీ.) ఏవముపరిపి], సావకపారమిఞ్చ పాపుణాతి, సారిపుత్తమోగ్గల్లానా తేన దట్ఠబ్బా.

తత్ర య్వాయం పుగ్గలో పుబ్బే అననుస్సుతేసు ధమ్మేసు సామం సచ్చాని అనభిసమ్బుజ్ఝతి, దిట్ఠేవ ధమ్మే దుక్ఖస్సన్తకరో హోతి, న చ సావకపారమిం పాపుణాతి, అవసేసా అరహన్తా తేన దట్ఠబ్బా.

తత్ర య్వాయం పుగ్గలో పుబ్బే అననుస్సుతేసు ధమ్మేసు సామం సచ్చాని అనభిసమ్బుజ్ఝతి, న చ దిట్ఠేవ ధమ్మే దుక్ఖస్సన్తకరో హోతి, అనాగామీ హోతి అనాగన్తా ఇత్థత్తం, అనాగామీ తేన దట్ఠబ్బో.

తత్ర య్వాయం పుగ్గలో పుబ్బే అననుస్సుతేసు ధమ్మేసు సామం సచ్చాని అనభిసమ్బుజ్ఝతి, న చ దిట్ఠేవ ధమ్మే దుక్ఖస్సన్తకరో హోతి, ఆగన్తా ఇత్థత్తం, సోతాపన్నసకదాగామినో తేన దట్ఠబ్బా.

ఛక్కనిద్దేసో.