౭. సత్తకపుగ్గలపఞ్ఞత్తి

౨౦౩. కథఞ్చ పుగ్గలో సకిం నిముగ్గో నిముగ్గోవ హోతి? ఇధేకచ్చో పుగ్గలో సమన్నాగతో హోతి ఏకన్తకాళకేహి అకుసలేహి ధమ్మేహి. ఏవం పుగ్గలో సకిం నిముగ్గో నిముగ్గోవ హోతి.

కథఞ్చ పుగ్గలో ఉమ్ముజ్జిత్వా నిముజ్జతి? ఇధేకచ్చో పుగ్గలో ఉమ్ముజ్జతి ‘‘సాహు సద్ధా కుసలేసు ధమ్మేసు, సాధు [సాహు (సీ. స్యా.) ఏవం తీసు ఠానేసుపి] హిరీ కుసలేసు ధమ్మేసు, సాధు ఓత్తప్పం కుసలేసు ధమ్మేసు, సాధు వీరియం [విరియం (సీ. స్యా.)] కుసలేసు ధమ్మేసు, సాధు పఞ్ఞా కుసలేసు ధమ్మేసూ’’తి. తస్స సా సద్ధా నేవ తిట్ఠతి నో వడ్ఢతి హాయతియేవ, తస్స సా హిరీ నేవ తిట్ఠతి నో వడ్ఢతి హాయతియేవ, తస్స తం ఓత్తప్పం నేవ తిట్ఠతి నో వడ్ఢతి హాయతియేవ, తస్స తం వీరియం నేవ తిట్ఠతి నో వడ్ఢతి హాయతియేవ, తస్స సా పఞ్ఞా నేవ తిట్ఠతి నో వడ్ఢతి హాయతియేవ. ఏవం పుగ్గలో ఉమ్ముజ్జిత్వా నిముజ్జతి.

కథఞ్చ పుగ్గలో ఉమ్ముజ్జిత్వా ఠితో హోతి? ఇధేకచ్చో పుగ్గలో ఉమ్ముజ్జతి ‘‘సాహు సద్ధా కుసలేసు ధమ్మేసు, సాధు హిరీ కుసలేసు ధమ్మేసు, సాధు ఓత్తప్పం కుసలేసు ధమ్మేసు, సాధు వీరియం కుసలేసు ధమ్మేసు, సాధు పఞ్ఞా కుసలేసు ధమ్మేసూ’’తి. తస్స సా సద్ధా నేవ హాయతి నో వడ్ఢతి ఠితా హోతి, తస్స సా హిరీ నేవ హాయతి నో వడ్ఢతి ఠితా హోతి, తస్స తం ఓత్తప్పం నేవ హాయతి నో వడ్ఢతి ఠితం హోతి, తస్స తం వీరియం నేవ హాయతి నో వడ్ఢతి ఠితం హోతి, తస్స సా పఞ్ఞా నేవ హాయతి నో వడ్ఢతి ఠితా హోతి. ఏవం పుగ్గలో ఉమ్ముజ్జిత్వా ఠితో హోతి.

కథఞ్చ పుగ్గలో ఉమ్ముజ్జిత్వా విపస్సతి విలోకేతి? ఇధేకచ్చో పుగ్గలో ఉమ్ముజ్జతి ‘‘సాహు సద్ధా కుసలేసు ధమ్మేసు, సాధు హిరీ కుసలేసు ధమ్మేసు, సాధు ఓత్తప్పం కుసలేసు ధమ్మేసు, సాధు వీరియం కుసలేసు ధమ్మేసు, సాధు పఞ్ఞా కుసలేసు ధమ్మేసూ’’తి. సో తిణ్ణం సంయోజనానం పరిక్ఖయా సోతాపన్నో హోతి అవినిపాతధమ్మో నియతో సమ్బోధిపరాయనో. ఏవం పుగ్గలో ఉమ్ముజ్జిత్వా విపస్సతి విలోకేతి.

కథఞ్చ పుగ్గలో ఉమ్ముజ్జిత్వా పతరతి? ఇధేకచ్చో పుగ్గలో ఉమ్ముజ్జతి ‘‘సాహు సద్ధా కుసలేసు ధమ్మేసు, సాధు హిరీ కుసలేసు ధమ్మేసు, సాధు ఓత్తప్పం కుసలేసు ధమ్మేసు, సాధు వీరియం కుసలేసు ధమ్మేసు, సాధు పఞ్ఞా కుసలేసు ధమ్మేసూ’’తి. సో తిణ్ణం సంయోజనానం పరిక్ఖయా రాగదోసమోహానం తనుత్తా సకదాగామీ హోతి సకిదేవ ఇమం లోకం ఆగన్త్వా దుక్ఖస్సన్తకరో హోతి. ఏవం పుగ్గలో ఉమ్ముజ్జిత్వా పతరతి.

కథఞ్చ పుగ్గలో ఉమ్ముజ్జిత్వా పతిగాధప్పత్తో హోతి? ఇధేకచ్చో పుగ్గలో ఉమ్ముజ్జతి ‘‘సాహు సద్ధా కుసలేసు ధమ్మేసు, సాధు హిరీ కుసలేసు ధమ్మేసు, సాధు ఓత్తప్పం కుసలేసు ధమ్మేసు, సాధు వీరియం కుసలేసు ధమ్మేసు, సాధు పఞ్ఞా కుసలేసు ధమ్మేసూ’’తి. సో పఞ్చన్నం ఓరమ్భాగియానం సంయోజనానం పరిక్ఖయా ఓపపాతికో హోతి తత్థ పరినిబ్బాయీ అనావత్తిధమ్మో తస్మా లోకా. ఏవం పుగ్గలో ఉమ్ముజ్జిత్వా పతిగాధప్పత్తో హోతి.

కథఞ్చ పుగ్గలో ఉమ్ముజ్జిత్వా తిణ్ణో హోతి పారఙ్గతో థలే తిట్ఠతి బ్రాహ్మణో? ఇధేకచ్చో పుగ్గలో ఉమ్ముజ్జతి ‘‘సాహు సద్ధా కుసలేసు ధమ్మేసు, సాధు హిరీ కుసలేసు ధమ్మేసు, సాధు ఓత్తప్పం కుసలేసు ధమ్మేసు, సాధు వీరియం కుసలేసు ధమ్మేసు, సాధు పఞ్ఞా కుసలేసు ధమ్మేసూ’’తి. సో ఆసవానం ఖయా అనాసవం చేతోవిముత్తిం పఞ్ఞావిముత్తిం దిట్ఠేవ ధమ్మే సయం అభిఞ్ఞా సచ్ఛికత్వా ఉపసమ్పజ్జ విహరతి. ఏవం పుగ్గలో ఉమ్ముజ్జిత్వా తిణ్ణో హోతి పారఙ్గతో థలే తిట్ఠతి బ్రాహ్మణో.

౨౦౪. కతమో చ పుగ్గలో ఉభతోభాగవిముత్తో? ఇధేకచ్చో పుగ్గలో అట్ఠ విమోక్ఖే కాయేన ఫుసిత్వా విహరతి పఞ్ఞాయ చస్స దిస్వా ఆసవా పరిక్ఖీణా హోన్తి. అయం వుచ్చతి పుగ్గలో ఉభతోభాగవిముత్తో.

౨౦౫. కతమో చ పుగ్గలో పఞ్ఞావిముత్తో…పే… కాయసక్ఖీ… దిట్ఠిప్పత్తో… సద్ధావిముత్తో… ధమ్మానుసారీ ….

౨౦౬. కతమో చ పుగ్గలో సద్ధానుసారీ? యస్స పుగ్గలస్స సోతాపత్తిఫలసచ్ఛికిరియాయ పటిపన్నస్స సద్ధిన్ద్రియం అధిమత్తం హోతి, సద్ధావాహిం సద్ధాపుబ్బఙ్గమం అరియమగ్గం భావేతి. అయం వుచ్చతి పుగ్గలో సద్ధానుసారీ. సోతాపత్తిఫలసచ్ఛికిరియాయ పటిపన్నో పుగ్గలో సద్ధానుసారీ, ఫలే ఠితో సద్ధావిముత్తోతి.

సత్తకనిద్దేసో.