౩. తికఉద్దేసో

౯. తయో పుగ్గలా –

(౧) నిరాసో, ఆసంసో, విగతాసో.

(౨) తయో గిలానూపమా పుగ్గలా.

(౩) కాయసక్ఖీ, దిట్ఠిప్పత్తో, సద్ధావిముత్తో.

(౪) గూథభాణీ, పుప్ఫభాణీ, మధుభాణీ.

(౫) అరుకూపమచిత్తో పుగ్గలో, విజ్జూపమచిత్తో పుగ్గలో, వజిరూపమచిత్తో పుగ్గలో.

(౬) అన్ధో, ఏకచక్ఖు, ద్విచక్ఖు.

(౭) అవకుజ్జపఞ్ఞో పుగ్గలో, ఉచ్ఛఙ్గపఞ్ఞో [ఉచ్చఙ్గుపఞ్ఞో (స్యా.)] పుగ్గలో, పుథుపఞ్ఞో పుగ్గలో.

(౮) అత్థేకచ్చో పుగ్గలో కామేసు చ భవేసు చ అవీతరాగో, అత్థేకచ్చో పుగ్గలో కామేసు వీతరాగో భవేసు అవీతరాగో, అత్థేకచ్చో పుగ్గలో కామేసు చ భవేసు చ వీతరాగో.

(౯) పాసాణలేఖూపమో పుగ్గలో, పథవిలేఖూపమో పుగ్గలో, ఉదకలేఖూపమో పుగ్గలో.

(౧౦) తయో పోత్థకూపమా పుగ్గలా.

(౧౧) తయో కాసికవత్థూపమా పుగ్గలా.

(౧౨) సుప్పమేయ్యో, దుప్పమేయ్యో, అప్పమేయ్యో.

(౧౩) అత్థేకచ్చో పుగ్గలో న సేవితబ్బో న భజితబ్బో న పయిరుపాసితబ్బో, అత్థేకచ్చో పుగ్గలో సేవితబ్బో భజితబ్బో పయిరుపాసితబ్బో, అత్థేకచ్చో పుగ్గలో సక్కత్వా గరుం కత్వా [గరుకత్వా (సీ.)] సేవితబ్బో భజితబ్బో పయిరుపాసితబ్బో.

(౧౪) అత్థేకచ్చో పుగ్గలో జిగుచ్ఛితబ్బో న సేవితబ్బో న భజితబ్బో న పయిరుపాసితబ్బో, అత్థేకచ్చో పుగ్గలో అజ్ఝుపేక్ఖితబ్బో న సేవితబ్బో న భజితబ్బో న పయిరుపాసితబ్బో; అత్థేకచ్చో పుగ్గలో సేవితబ్బో భజితబ్బో పయిరుపాసితబ్బో.

(౧౫) అత్థేకచ్చో పుగ్గలో సీలేసు పరిపూరకారీ [పరిపూరీకారీ (స్యా.)], సమాధిస్మిం మత్తసో కారీ, పఞ్ఞాయ మత్తసో కారీ; అత్థేకచ్చో పుగ్గలో సీలేసు చ పరిపూరకారీ, సమాధిస్మిఞ్చ పరిపూరకారీ, పఞ్ఞాయ మత్తసో కారీ; అత్థేకచ్చో పుగ్గలో సీలేసు చ పరిపూరకారీ, సమాధిస్మిఞ్చ పరిపూరకారీ, పఞ్ఞాయ చ పరిపూరకారీ.

(౧౬) తయో సత్థారో.

(౧౭) అపరేపి తయో సత్థారో.

తికం.