౪. చతుక్కఉద్దేసో
౧౦. చత్తారో పుగ్గలా –
(౧) అసప్పురిసో, అసప్పురిసేన అసప్పురిసతరో, సప్పురిసో, సప్పురిసేన సప్పురిసతరో.
(౨) పాపో, పాపేన పాపతరో, కల్యాణో, కల్యాణేన కల్యాణతరో.
(౩) పాపధమ్మో, పాపధమ్మేన పాపధమ్మతరో, కల్యాణధమ్మో, కల్యాణధమ్మేన కల్యాణధమ్మతరో.
(౪) సావజ్జో, వజ్జబహులో, అప్పవజ్జో [అప్పసావజ్జో (స్యా. క.) అ. ని. ౪.౧౩౫], అనవజ్జో.
(౫) ఉగ్ఘటితఞ్ఞూ, విపఞ్చితఞ్ఞూ [విపచితఞ్ఞూ (సీ.) అ. ని. ౪.౧౩౩], నేయ్యో, పదపరమో.
(౬) యుత్తప్పటిభానో, నో ముత్తప్పటిభానో, ముత్తప్పటిభానో, నో యుత్తప్పటిభానో, యుత్తప్పటిభానో చ ముత్తప్పటిభానో చ, నేవ యుత్తప్పటిభానో నో ముత్తప్పటిభానో.
(౭) చత్తారో ధమ్మకథికా పుగ్గలా.
(౮) చత్తారో వలాహకూపమా పుగ్గలా.
(౯) చత్తారో మూసికూపమా పుగ్గలా.
(౧౦) చత్తారో అమ్బూపమా పుగ్గలా.
(౧౧) చత్తారో కుమ్భూపమా పుగ్గలా.
(౧౨) చత్తారో ఉదకరహదూపమా పుగ్గలా.
(౧౩) చత్తారో బలీబద్దూపమా [బలిబద్దూపమా (సీ.)] పుగ్గలా.
(౧౪) చత్తారో ఆసీవిసూపమా పుగ్గలా.
(౧౫) అత్థేకచ్చో పుగ్గలో అననువిచ్చ అపరియోగాహేత్వా అవణ్ణారహస్స వణ్ణం భాసితా హోతి, అత్థేకచ్చో పుగ్గలో అననువిచ్చ అపరియోగాహేత్వా వణ్ణారహస్స అవణ్ణం భాసితా హోతి, అత్థేకచ్చో పుగ్గలో అననువిచ్చ అపరియోగాహేత్వా అప్పసాదనీయే ఠానే పసాదం ఉపదంసితా హోతి, అత్థేకచ్చో పుగ్గలో అననువిచ్చ అపరియోగాహేత్వా పసాదనీయే ఠానే అప్పసాదం ఉపదంసితా హోతి.
(౧౬) అత్థేకచ్చో పుగ్గలో అనువిచ్చ పరియోగాహేత్వా అవణ్ణారహస్స అవణ్ణం భాసితా హోతి, అత్థేకచ్చో పుగ్గలో అనువిచ్చ పరియోగాహేత్వా వణ్ణారహస్స వణ్ణం భాసితా హోతి, అత్థేకచ్చో పుగ్గలో అనువిచ్చ పరియోగాహేత్వా అప్పసాదనీయే ఠానే అప్పసాదం ఉపదంసితా హోతి, అత్థేకచ్చో పుగ్గలో అనువిచ్చ పరియోగాహేత్వా పసాదనీయే ఠానే పసాదం ఉపదంసితా హోతి.
(౧౭) అత్థేకచ్చో పుగ్గలో అవణ్ణారహస్స అవణ్ణం భాసితా హోతి భూతం తచ్ఛం కాలేన, నో చ ఖో వణ్ణారహస్స వణ్ణం భాసితా హోతి భూతం తచ్ఛం కాలేన; అత్థేకచ్చో పుగ్గలో వణ్ణారహస్స వణ్ణం భాసితా హోతి భూతం తచ్ఛం కాలేన, నో చ ఖో అవణ్ణారహస్స అవణ్ణం భాసితా హోతి భూతం తచ్ఛం కాలేన; అత్థేకచ్చో పుగ్గలో అవణ్ణారహస్స చ అవణ్ణం భాసితా హోతి భూతం తచ్ఛం కాలేన; వణ్ణారహస్స చ వణ్ణం భాసితా హోతి భూతం తచ్ఛం కాలేన, అత్థేకచ్చో పుగ్గలో నేవ అవణ్ణారహస్స అవణ్ణం భాసితా హోతి భూతం తచ్ఛం కాలేన, నో చ వణ్ణారహస్స వణ్ణం భాసితా హోతి భూతం తచ్ఛం కాలేన.
(౧౮) ఉట్ఠానఫలూపజీవీ నో పుఞ్ఞఫలూపజీవీ, పుఞ్ఞఫలూపజీవీ నో ఉట్ఠానఫలూపజీవీ, ఉట్ఠానఫలూపజీవీ చ పుఞ్ఞఫలూపజీవీ చ, నేవ ఉట్ఠానఫలూపజీవీ నో పుఞ్ఞఫలూపజీవీ.
(౧౯) తమో తమపరాయనో, తమో జోతిపరాయనో, జోతి తమపరాయనో, జోతి జోతిపరాయనో.
(౨౦) ఓణతోణతో, ఓణతుణ్ణతో, ఉణ్ణతోణతో, ఉణ్ణతుణ్ణతో.
(౨౧) చత్తారో రుక్ఖూపమా పుగ్గలా.
(౨౨) రూపప్పమాణో, రూపప్పసన్నో, ఘోసప్పమాణో, ఘోసప్పసన్నో.
(౨౩) లూఖప్పమాణో, లూఖప్పసన్నో, ధమ్మప్పమాణో, ధమ్మప్పసన్నో.
(౨౪) అత్థేకచ్చో పుగ్గలో అత్తహితాయ పటిపన్నో హోతి, నో పరహితాయ; అత్థేకచ్చో పుగ్గలో పరహితాయ పటిపన్నో హోతి, నో అత్తహితాయ; అత్థేకచ్చో పుగ్గలో అత్తహితాయ చేవ పటిపన్నో హోతి పరహితాయ చ; అత్థేకచ్చో పుగ్గలో నేవ అత్తహితాయ పటిపన్నో హోతి నో పరహితాయ.
(౨౫) అత్థేకచ్చో పుగ్గలో అత్తన్తపో హోతి అత్తపరితాపనానుయోగమనుయుత్తో; అత్థేకచ్చో పుగ్గలో పరన్తపో హోతి పరపరితాపనానుయోగమనుయుత్తో; అత్థేకచ్చో పుగ్గలో అత్తన్తపో చ హోతి అత్తపరితాపనానుయోగమనుయుత్తో, పరన్తపో చ పరపరితాపనానుయోగమనుయుత్తో; అత్థేకచ్చో పుగ్గలో నేవ అత్తన్తపో హోతి న అత్తపరితాపనానుయోగమనుయుత్తో, న పరన్తపో న పరపరితాపనానుయోగమనుయుత్తో. సో అనత్తన్తపో అపరన్తపో దిట్ఠేవ ధమ్మే నిచ్ఛాతో నిబ్బుతో సీతీభూతో [సీతిభూతో (సీ. క.)] సుఖప్పటిసంవేదీ బ్రహ్మభూతేన అత్తనా విహరతి.
(౨౬) సరాగో, సదోసో, సమోహో, సమానో.
(౨౭) అత్థేకచ్చో పుగ్గలో లాభీ హోతి అజ్ఝత్తం చేతోసమథస్స, న లాభీ అధిపఞ్ఞాధమ్మవిపస్సనాయ; అత్థేకచ్చో పుగ్గలో లాభీ హోతి అధిపఞ్ఞాధమ్మవిపస్సనాయ, న లాభీ అజ్ఝత్తం చేతోసమథస్స; అత్థేకచ్చో పుగ్గలో లాభీ చేవ హోతి అజ్ఝత్తం చేతోసమథస్స, లాభీ చ అధిపఞ్ఞాధమ్మవిపస్సనాయ; అత్థేకచ్చో పుగ్గలో నేవ లాభీ హోతి అజ్ఝత్తం చేతోసమథస్స, న లాభీ అధిపఞ్ఞాధమ్మవిపస్సనాయ.
(౨౮) అనుసోతగామీ పుగ్గలో, పటిసోతగామీ పుగ్గలో, ఠితత్తో పుగ్గలో, తిణ్ణో పారఙ్గతో [పారగతో (సీ. స్యా.)] థలే తిట్ఠతి బ్రాహ్మణో.
(౨౯) అప్పస్సుతో సుతేన అనుపపన్నో, అప్పస్సుతో సుతేన ఉపపన్నో, బహుస్సుతో సుతేన అనుపపన్నో, బహుస్సుతో సుతేన ఉపపన్నో.
(౩౦) సమణమచలో, సమణపదుమో, సమణపుణ్డరీకో, సమణేసు సమణసుఖుమాలో.
చతుక్కం.