౧-౭. పటిచ్చవారాది

హేతుపచ్చయో

౩౦. కుసలం కిలేసవిప్పయుత్తం సంకిలేసికం ధమ్మం పటిచ్చ కుసలో కిలేసవిప్పయుత్తో సంకిలేసికో ధమ్మో ఉప్పజ్జతి హేతుపచ్చయా. కుసలం కిలేసవిప్పయుత్తం సంకిలేసికం ధమ్మం పటిచ్చ అబ్యాకతో కిలేసవిప్పయుత్తో సంకిలేసికో ధమ్మో ఉప్పజ్జతి హేతుపచ్చయా. కుసలం కిలేసవిప్పయుత్తం సంకిలేసికం ధమ్మం పటిచ్చ కుసలో కిలేసవిప్పయుత్తో సంకిలేసికో చ అబ్యాకతో కిలేసవిప్పయుత్తో సంకిలేసికో చ ధమ్మా ఉప్పజ్జన్తి హేతుపచ్చయా. (౩)

అబ్యాకతం కిలేసవిప్పయుత్తం సంకిలేసికం ధమ్మం పటిచ్చ అబ్యాకతో కిలేసవిప్పయుత్తో సంకిలేసికో ధమ్మో ఉప్పజ్జతి హేతుపచ్చయా. (౧)

కుసలం కిలేసవిప్పయుత్తం సంకిలేసికఞ్చ అబ్యాకతం కిలేసవిప్పయుత్తం సంకిలేసికఞ్చ ధమ్మం పటిచ్చ అబ్యాకతో కిలేసవిప్పయుత్తో సంకిలేసికో ధమ్మో ఉప్పజ్జతి హేతుపచ్చయా. (౧) (సంఖిత్తం.)

౩౧. హేతుయా పఞ్చ, ఆరమ్మణే ద్వే…పే… అవిగతే పఞ్చ (సంఖిత్తం. సహజాతవారమ్పి…పే… సమ్పయుత్తవారమ్పి పటిచ్చవారసదిసం).

౩౨. కుసలో కిలేసవిప్పయుత్తో సంకిలేసికో ధమ్మో కుసలస్స కిలేసవిప్పయుత్తస్స సంకిలేసికస్స ధమ్మస్స హేతుపచ్చయేన పచ్చయో… తీణి.

అబ్యాకతో కిలేసవిప్పయుత్తో సంకిలేసికో ధమ్మో అబ్యాకతస్స కిలేసవిప్పయుత్తస్స సంకిలేసికస్స ధమ్మస్స హేతుపచ్చయేన పచ్చయో. (౧) (సంఖిత్తం.)

౩౩. హేతుయా చత్తారి, ఆరమ్మణే చత్తారి…పే… అవిగతే సత్త (సంఖిత్తం. యథా కుసలత్తికే పఞ్హావారం, ఏవం విత్థారేతబ్బం).

౩౪. కుసలం కిలేసవిప్పయుత్తం అసంకిలేసికం ధమ్మం పటిచ్చ కుసలో కిలేసవిప్పయుత్తో అసంకిలేసికో ధమ్మో ఉప్పజ్జతి హేతుపచ్చయా.

అబ్యాకతం కిలేసవిప్పయుత్తం అసంకిలేసికం ధమ్మం పటిచ్చ అబ్యాకతో కిలేసవిప్పయుత్తో అసంకిలేసికో ధమ్మో ఉప్పజ్జతి హేతుపచ్చయా.

హేతుయా ద్వే…పే… అవిగతే ద్వే (సంఖిత్తం. సహజాతవారమ్పి …పే… సమ్పయుత్తవారమ్పి పటిచ్చవారసదిసం).

౩౫. కుసలో కిలేసవిప్పయుత్తో అసంకిలేసికో ధమ్మో కుసలస్స కిలేసవిప్పయుత్తస్స అసంకిలేసికస్స ధమ్మస్స హేతుపచ్చయేన పచ్చయో. (౧)

అబ్యాకతో కిలేసవిప్పయుత్తో అసంకిలేసికో ధమ్మో అబ్యాకతస్స కిలేసవిప్పయుత్తస్స అసంకిలేసికస్స ధమ్మస్స హేతుపచ్చయేన పచ్చయో. (౧) (సంఖిత్తం.)

౩౬. హేతుయా ద్వే, ఆరమ్మణే ద్వే, అధిపతియా తీణి, అనన్తరే ద్వే…పే… ఉపనిస్సయే చత్తారి…పే… అవిగతే ద్వే (సంఖిత్తం. యథా కుసలత్తికే పఞ్హావారం, ఏవం విత్థారేతబ్బం).

కుసలత్తికకిలేసగోచ్ఛకం నిట్ఠితం.