౧-౭. పటిచ్చవారాది

పచ్చయచతుక్కం

హేతుపచ్చయో

౧. అకుసలం ఆసవం ధమ్మం పటిచ్చ అకుసలో ఆసవో ధమ్మో ఉప్పజ్జతి హేతుపచ్చయా (సంఖిత్తం).

హేతుయా ఏకం…పే… అవిగతే ఏకం (సంఖిత్తం).

(సహజాతవారేపి…పే… సమ్పయుత్తవారేపి పఞ్హావారేపి సబ్బత్థ ఏకం).

౨. కుసలం నోఆసవం ధమ్మం పటిచ్చ కుసలో నోఆసవో ధమ్మో ఉప్పజ్జతి హేతుపచ్చయా. కుసలం నోఆసవం ధమ్మం పటిచ్చ అబ్యాకతో నోఆసవో ధమ్మో ఉప్పజ్జతి హేతుపచ్చయా. కుసలం నోఆసవం ధమ్మం పటిచ్చ కుసలో నోఆసవో చ అబ్యాకతో నోఆసవో చ ధమ్మా ఉప్పజ్జన్తి హేతుపచ్చయా. (౩)

అకుసలం నోఆసవం ధమ్మం పటిచ్చ అకుసలో నోఆసవో ధమ్మో ఉప్పజ్జతి హేతుపచ్చయా… తీణి.

అబ్యాకతం నోఆసవం ధమ్మం పటిచ్చ అబ్యాకతో నోఆసవో ధమ్మో ఉప్పజ్జతి హేతుపచ్చయా. (౧)

కుసలం నోఆసవఞ్చ అబ్యాకతం నోఆసవఞ్చ ధమ్మం పటిచ్చ అబ్యాకతో నోఆసవో ధమ్మో ఉప్పజ్జతి హేతుపచ్చయా. (౧)

అకుసలం నోఆసవఞ్చ అబ్యాకతం నోఆసవఞ్చ ధమ్మం పటిచ్చ అబ్యాకతో నోఆసవో ధమ్మో ఉప్పజ్జతి హేతుపచ్చయా. (౧)

ఆరమ్మణపచ్చయో

౩. కుసలం నోఆసవం ధమ్మం పటిచ్చ కుసలో నోఆసవో ధమ్మో ఉప్పజ్జతి ఆరమ్మణపచ్చయా. (౧)

అకుసలం నోఆసవం ధమ్మం పటిచ్చ అకుసలో నోఆసవో ధమ్మో ఉప్పజ్జతి ఆరమ్మణపచ్చయా. (౧)

అబ్యాకతం నోఆసవం ధమ్మం పటిచ్చ అబ్యాకతో నోఆసవో ధమ్మో ఉప్పజ్జతి ఆరమ్మణపచ్చయా. (౧) (సంఖిత్తం.)

౪. హేతుయా నవ, ఆరమ్మణే తీణి, అధిపతియా నవ…పే… అవిగతే నవ (సంఖిత్తం).

నహేతుయా ఏకం, నఆరమ్మణే పఞ్చ, నఅధిపతియా నవ…పే… నోవిగతే పఞ్చ (సంఖిత్తం. సహజాతవారమ్పి…పే… సమ్పయుత్తవారమ్పి పటిచ్చవారసదిసం).

హేతు-ఆరమ్మణపచ్చయా

౫. కుసలో నోఆసవో ధమ్మో కుసలస్స నోఆసవస్స ధమ్మస్స హేతుపచ్చయేన పచ్చయో… తీణి.

అకుసలో నోఆసవో ధమ్మో అకుసలస్స నోఆసవస్స ధమ్మస్స హేతుపచ్చయేన పచ్చయో… తీణి.

అబ్యాకతో నోఆసవో ధమ్మో అబ్యాకతస్స నోఆసవస్స ధమ్మస్స హేతుపచ్చయేన పచ్చయో. (౧)

కుసలో నోఆసవో ధమ్మో కుసలస్స నోఆసవస్స ధమ్మస్స ఆరమ్మణపచ్చయేన పచ్చయో (సంఖిత్తం).

౬. హేతుయా సత్త, ఆరమ్మణే నవ, అధిపతియా దస…పే… అవిగతే తేరస (సంఖిత్తం. యథా కుసలత్తికే పఞ్హావారం, ఏవం విత్థారేతబ్బం).