౧-౭. పటిచ్చవారాది

పచ్చయచతుక్కం

౪౧. కుసలం కేనచి విఞ్ఞేయ్యం ధమ్మం పటిచ్చ కుసలో కేనచి విఞ్ఞేయ్యో ధమ్మో ఉప్పజ్జతి హేతుపచ్చయా. కుసలం కేనచి విఞ్ఞేయ్యం ధమ్మం పటిచ్చ అబ్యాకతో కేనచి విఞ్ఞేయ్యో ధమ్మో ఉప్పజ్జతి హేతుపచ్చయా. కుసలం కేనచి విఞ్ఞేయ్యం ధమ్మం పటిచ్చ కుసలో కేనచి విఞ్ఞేయ్యో చ అబ్యాకతో కేనచి విఞ్ఞేయ్యో చ ధమ్మా ఉప్పజ్జన్తి హేతుపచ్చయా. (౩)

అకుసలం కేనచి విఞ్ఞేయ్యం ధమ్మం పటిచ్చ అకుసలో కేనచి విఞ్ఞేయ్యో ధమ్మో ఉప్పజ్జతి హేతుపచ్చయా… తీణి.

అబ్యాకతం కేనచి విఞ్ఞేయ్యం ధమ్మం పటిచ్చ అబ్యాకతో కేనచి విఞ్ఞేయ్యో ధమ్మో ఉప్పజ్జతి హేతుపచ్చయా. (౧)

కుసలం కేనచి విఞ్ఞేయ్యఞ్చ అబ్యాకతం కేనచి విఞ్ఞేయ్యఞ్చ ధమ్మం పటిచ్చ అబ్యాకతో కేనచి విఞ్ఞేయ్యో ధమ్మో ఉప్పజ్జతి హేతుపచ్చయా. (౧)

అకుసలం కేనచి విఞ్ఞేయ్యఞ్చ అబ్యాకతం కేనచి విఞ్ఞేయ్యఞ్చ ధమ్మం పటిచ్చ అబ్యాకతో కేనచి విఞ్ఞేయ్యో ధమ్మో ఉప్పజ్జతి హేతుపచ్చయా. (౧)

౪౨. కుసలం కేనచి విఞ్ఞేయ్యం ధమ్మం పటిచ్చ కుసలో కేనచి విఞ్ఞేయ్యో ధమ్మో ఉప్పజ్జతి ఆరమ్మణపచ్చయా. (౧)

అకుసలం కేనచి విఞ్ఞేయ్యం ధమ్మం పటిచ్చ అకుసలో కేనచి విఞ్ఞేయ్యో ధమ్మో ఉప్పజ్జతి ఆరమ్మణపచ్చయా. (౧)

అబ్యాకతం కేనచి విఞ్ఞేయ్యం ధమ్మం పటిచ్చ అబ్యాకతో కేనచి విఞ్ఞేయ్యో ధమ్మో ఉప్పజ్జతి ఆరమ్మణపచ్చయా. (౧) (సంఖిత్తం.)

౪౩. హేతుయా నవ, ఆరమ్మణే తీణి…పే… అవిగతే నవ (సంఖిత్తం).

పచ్చనీయం

నహేతుపచ్చయో

౪౪. అకుసలం కేనచి విఞ్ఞేయ్యం ధమ్మం పటిచ్చ అకుసలో కేనచి విఞ్ఞేయ్యో ధమ్మో ఉప్పజ్జతి నహేతుపచ్చయా. (౧)

అబ్యాకతం కేనచి విఞ్ఞేయ్యం ధమ్మం పటిచ్చ అబ్యాకతో కేనచి విఞ్ఞేయ్యో ధమ్మో ఉప్పజ్జతి నహేతుపచ్చయా. (౧) (సంఖిత్తం.)

౪౫. నహేతుయా ద్వే, నఆరమ్మణే పఞ్చ, నఅధిపతియా నవ…పే… నోవిగతే పఞ్చ (సంఖిత్తం. సహజాతవారమ్పి…పే… సమ్పయుత్తవారమ్పి పటిచ్చవారసదిసం).

హేతుపచ్చయో

౪౬. కుసలో కేనచి విఞ్ఞేయ్యో ధమ్మో కుసలస్స కేనచి విఞ్ఞేయ్యస్స ధమ్మస్స హేతుపచ్చయేన పచ్చయో… తీణి.

అకుసలో కేనచి విఞ్ఞేయ్యో ధమ్మో అకుసలస్స కేనచి విఞ్ఞేయ్యస్స ధమ్మస్స హేతుపచ్చయేన పచ్చయో… తీణి.

అబ్యాకతో కేనచి విఞ్ఞేయ్యో ధమ్మో అబ్యాకతస్స కేనచి విఞ్ఞేయ్యస్స ధమ్మస్స హేతుపచ్చయేన పచ్చయో. (౧) (సంఖిత్తం.)

౪౭. హేతుయా సత్త, ఆరమ్మణే నవ…పే… అవిగతే తేరస (సంఖిత్తం. యథా కుసలత్తికే పఞ్హావారం, ఏవం విత్థారేతబ్బం).

౪౮. కుసలం నకేనచి విఞ్ఞేయ్యం ధమ్మం పటిచ్చ కుసలో నకేనచి విఞ్ఞేయ్యో ధమ్మో ఉప్పజ్జతి హేతుపచ్చయా (కేనచివిఞ్ఞేయ్యసదిసం).

కుసలత్తికచూళన్తరదుకం నిట్ఠితం.