౧. విభఙ్గవారో

హేతుపచ్చయో

౧౦౦. నీవరణో చేవ నీవరణసమ్పయుత్తో చ ధమ్మో నీవరణస్స చేవ నీవరణసమ్పయుత్తస్స చ ధమ్మస్స హేతుపచ్చయేన పచ్చయో – నీవరణా చేవ నీవరణసమ్పయుత్తా చ హేతూ సమ్పయుత్తకానం నీవరణానం హేతుపచ్చయేన పచ్చయో. (౧)

నీవరణో చేవ నీవరణసమ్పయుత్తో చ ధమ్మో నీవరణసమ్పయుత్తస్స చేవ నో చ నీవరణస్స ధమ్మస్స హేతుపచ్చయేన పచ్చయో – నీవరణా చేవ నీవరణసమ్పయుత్తా చ హేతూ సమ్పయుత్తకానం ఖన్ధానం హేతుపచ్చయేన పచ్చయో. (౨)

నీవరణో చేవ నీవరణసమ్పయుత్తో చ ధమ్మో నీవరణస్స చేవ నీవరణసమ్పయుత్తస్స చ నీవరణసమ్పయుత్తస్స చేవ నో చ నీవరణస్స చ ధమ్మస్స హేతుపచ్చయేన పచ్చయో – నీవరణా చేవ నీవరణసమ్పయుత్తా చ హేతూ సమ్పయుత్తకానం ఖన్ధానం నీవరణానఞ్చ హేతుపచ్చయేన పచ్చయో. (౩)

ఆరమ్మణపచ్చయో

౧౦౧. నీవరణో చేవ నీవరణసమ్పయుత్తో చ ధమ్మో నీవరణస్స చేవ నీవరణసమ్పయుత్తస్స చ ధమ్మస్స ఆరమ్మణపచ్చయేన పచ్చయో – నీవరణే ఆరబ్భ నీవరణా ఉప్పజ్జన్తి. (మూలం కాతబ్బం) నీవరణే ఆరబ్భ నీవరణసమ్పయుత్తా చేవ నో చ నీవరణా ఖన్ధా ఉప్పజ్జన్తి. (మూలం కాతబ్బం) నీవరణే ఆరబ్భ నీవరణా చ సమ్పయుత్తకా చ ఖన్ధా ఉప్పజ్జన్తి. (౩)

నీవరణసమ్పయుత్తో చేవ నో చ నీవరణో ధమ్మో నీవరణసమ్పయుత్తస్స చేవ నో చ నీవరణస్స ధమ్మస్స ఆరమ్మణపచ్చయేన పచ్చయో – నీవరణసమ్పయుత్తే చేవ నో చ నీవరణే ఖన్ధే ఆరబ్భ నీవరణసమ్పయుత్తా చేవ నో చ నీవరణా ఖన్ధా ఉప్పజ్జన్తి. (మూలం పుచ్ఛితబ్బం) నీవరణసమ్పయుత్తే చేవ నో చ నీవరణే ఖన్ధే ఆరబ్భ నీవరణా ఉప్పజ్జన్తి. (మూలం పుచ్ఛితబ్బం) నీవరణసమ్పయుత్తే చేవ నో చ నీవరణే ఖన్ధే ఆరబ్భ నీవరణా చ సమ్పయుత్తకా చ ఖన్ధా ఉప్పజ్జన్తి. (౩)

నీవరణో చేవ నీవరణసమ్పయుత్తో చ నీవరణసమ్పయుత్తో చేవ నో చ నీవరణో చ ధమ్మా నీవరణస్స చేవ నీవరణసమ్పయుత్తస్స చ ధమ్మస్స ఆరమ్మణపచ్చయేన పచ్చయో… తీణి. (౩)

అధిపతిపచ్చయాది

౧౦౨. నీవరణో చేవ నీవరణసమ్పయుత్తో చ ధమ్మో నీవరణస్స చేవ నీవరణసమ్పయుత్తస్స చ ధమ్మస్స అధిపతిపచ్చయేన పచ్చయో – ఆరమ్మణాధిపతి… తీణి (గరుకారమ్మణాయేవ).

నీవరణసమ్పయుత్తో చేవ నో చ నీవరణో ధమ్మో నీవరణసమ్పయుత్తస్స చేవ నో చ నీవరణస్స ధమ్మస్స అధిపతిపచ్చయేన పచ్చయో – ఆరమ్మణాధిపతి, సహజాతాధిపతి. ఆరమ్మణాధిపతి నీవరణసమ్పయుత్తే చేవ నో చ నీవరణే ఖన్ధే గరుం కత్వా నీవరణసమ్పయుత్తా చేవ నో చ నీవరణా ఖన్ధా ఉప్పజ్జన్తి. సహజాతాధిపతి – నీవరణసమ్పయుత్తా చేవ నో చ నీవరణాధిపతి సమ్పయుత్తకానం ఖన్ధానం అధిపతిపచ్చయేన పచ్చయో. (మూలం కాతబ్బం) ఆరమ్మణాధిపతి – నీవరణసమ్పయుత్తే చేవ నో చ నీవరణే ఖన్ధే గరుం కత్వా నీవరణా ఉప్పజ్జన్తి. సహజాతాధిపతి – నీవరణసమ్పయుత్తా చేవ నో చ నీవరణాధిపతి సమ్పయుత్తకానం నీవరణానం అధిపతిపచ్చయేన పచ్చయో. (మూలం కాతబ్బం) ఆరమ్మణాధిపతి – నీవరణసమ్పయుత్తే చేవ నో చ నీవరణే ఖన్ధే గరుం కత్వా నీవరణా చ సమ్పయుత్తకా చ ఖన్ధా ఉప్పజ్జన్తి. సహజాతాధిపతి – నీవరణసమ్పయుత్తా చేవ నో చ నీవరణాధిపతి సమ్పయుత్తకానం ఖన్ధానం నీవరణానఞ్చ అధిపతిపచ్చయేన పచ్చయో. (౩)

౧౦౩. నీవరణో చేవ నీవరణసమ్పయుత్తో చ నీవరణసమ్పయుత్తో చేవ నో చ నీవరణో చ ధమ్మా నీవరణస్స చేవ నీవరణసమ్పయుత్తస్స చ ధమ్మస్స అధిపతిపచ్చయేన పచ్చయో – ఆరమ్మణాధిపతి… తీణి. (౩)

అనన్తరపచ్చయేన పచ్చయో (ఆవజ్జనాపి వుట్ఠానమ్పి నత్థి, సబ్బత్థ పురిమా పురిమా కాతబ్బా)… సమనన్తరపచ్చయేన పచ్చయో… నవ… సహజాతపచ్చయేన పచ్చయో… నవ… అఞ్ఞమఞ్ఞపచ్చయేన పచ్చయో… నవ… నిస్సయపచ్చయేన పచ్చయో… నవ… ఉపనిస్సయపచ్చయేన పచ్చయో… నవ (ఆరమ్మణసదిసం, విపాకో నత్థి)… ఆసేవనపచ్చయేన పచ్చయో… పఞ్చ.

కమ్మపచ్చయో

౧౦౪. నీవరణసమ్పయుత్తో చేవ నో చ నీవరణో ధమ్మో నీవరణసమ్పయుత్తస్స చేవ నో చ నీవరణస్స ధమ్మస్స కమ్మపచ్చయేన పచ్చయో – నీవరణసమ్పయుత్తా చేవ నో చ నీవరణా చేతనా సమ్పయుత్తకానం ఖన్ధానం కమ్మపచ్చయేన పచ్చయో. (మూలం కాతబ్బం) నీవరణసమ్పయుత్తా చేవ నో చ నీవరణా చేతనా సమ్పయుత్తకానం నీవరణానం కమ్మపచ్చయేన పచ్చయో. (మూలం కాతబ్బం) నీవరణసమ్పయుత్తా చేవ నో చ నీవరణా చేతనా సమ్పయుత్తకానం ఖన్ధానం నీవరణానఞ్చ కమ్మపచ్చయేన పచ్చయో. (౩)

ఆహారపచ్చయాది

౧౦౫. నీవరణసమ్పయుత్తో చేవ నో చ నీవరణో ధమ్మో నీవరణసమ్పయుత్తస్స చేవ నో చ నీవరణస్స ధమ్మస్స ఆహారపచ్చయేన పచ్చయో… తీణి… ఇన్ద్రియపచ్చయేన పచ్చయో… తీణి… ఝానపచ్చయేన పచ్చయో… తీణి… మగ్గపచ్చయేన పచ్చయో… తీణి… సమ్పయుత్తపచ్చయేన పచ్చయో… నవ… అత్థిపచ్చయేన పచ్చయో… నవ… నత్థిపచ్చయేన పచ్చయో… నవ… విగతపచ్చయేన పచ్చయో… నవ… అవిగతపచ్చయేన పచ్చయో … నవ.