౧. విభఙ్గవారో

నహేతుపచ్చయో

౫. నీవరణం ధమ్మం పటిచ్చ నీవరణో ధమ్మో ఉప్పజ్జతి నహేతుపచ్చయా – విచికిచ్ఛానీవరణం పటిచ్చ అవిజ్జానీవరణం, ఉద్ధచ్చనీవరణం పటిచ్చ అవిజ్జానీవరణం. (౧)

నోనీవరణం ధమ్మం పటిచ్చ నోనీవరణో ధమ్మో ఉప్పజ్జతి నహేతుపచ్చయా – అహేతుకం నోనీవరణం ఏకం ఖన్ధం పటిచ్చ తయో ఖన్ధా చిత్తసముట్ఠానఞ్చ రూపం…పే… ద్వే…పే… అహేతుకపటిసన్ధిక్ఖణే…పే… (యావ అసఞ్ఞసత్తా). (౧)

నోనీవరణం ధమ్మం పటిచ్చ నీవరణో ధమ్మో ఉప్పజ్జతి నహేతుపచ్చయా – విచికిచ్ఛాసహగతే ఉద్ధచ్చసహగతే ఖన్ధే పటిచ్చ అవిజ్జానీవరణం. (౨)

౬. నీవరణఞ్చ నోనీవరణఞ్చ ధమ్మం పటిచ్చ నీవరణో ధమ్మో ఉప్పజ్జతి నహేతుపచ్చయా – విచికిచ్ఛానీవరణఞ్చ సమ్పయుత్తకే చ ఖన్ధే పటిచ్చ అవిజ్జానీవరణం, ఉద్ధచ్చనీవరణఞ్చ సమ్పయుత్తకే చ ఖన్ధే పటిచ్చ అవిజ్జానీవరణం. (౧)

నఆరమ్మణపచ్చయాది

౭. నీవరణం ధమ్మం పటిచ్చ నోనీవరణో ధమ్మో ఉప్పజ్జతి నఆరమ్మణపచ్చయా – నీవరణే పటిచ్చ చిత్తసముట్ఠానం రూపం. (౧)

నోనీవరణం ధమ్మం పటిచ్చ నోనీవరణో ధమ్మో ఉప్పజ్జతి నఆరమ్మణపచ్చయా – నోనీవరణే ఖన్ధే పటిచ్చ చిత్తసముట్ఠానం రూపం; పటిసన్ధిక్ఖణే…పే… (యావ అసఞ్ఞసత్తా). (౧)

నీవరణఞ్చ నోనీవరణఞ్చ ధమ్మం పటిచ్చ నోనీవరణో ధమ్మో ఉప్పజ్జతి నఆరమ్మణపచ్చయా – నీవరణే చ సమ్పయుత్తకే చ ఖన్ధే పటిచ్చ చిత్తసముట్ఠానం రూపం (సంఖిత్తం)… నఅధిపతిపచ్చయా… నఅనన్తరపచ్చయా… నసమనన్తరపచ్చయా… నఅఞ్ఞమఞ్ఞపచ్చయా… నఉపనిస్సయపచ్చయా.

నపురేజాతపచ్చయో

౮. నీవరణం ధమ్మం పటిచ్చ నీవరణో ధమ్మో ఉప్పజ్జతి నపురేజాతపచ్చయా – అరూపే కామచ్ఛన్దనీవరణం పటిచ్చ థినమిద్ధనీవరణం ఉద్ధచ్చనీవరణం అవిజ్జానీవరణం, అరూపే కామచ్ఛన్దనీవరణం పటిచ్చ ఉద్ధచ్చనీవరణం అవిజ్జానీవరణం, అరూపే విచికిచ్ఛానీవరణం పటిచ్చ ఉద్ధచ్చనీవరణం అవిజ్జానీవరణం, అరూపే ఉద్ధచ్చనీవరణం పటిచ్చ అవిజ్జానీవరణం. (౧)

నీవరణం ధమ్మం పటిచ్చ నోనీవరణో ధమ్మో ఉప్పజ్జతి నపురేజాతపచ్చయా – అరూపే నీవరణే పటిచ్చ సమ్పయుత్తకా ఖన్ధా, నీవరణే పటిచ్చ చిత్తసముట్ఠానం రూపం. (అవసేసా పఞ్హా సబ్బే విత్థారేతబ్బా. అరూపం పఠమం కాతబ్బం, రూపం పచ్ఛా యథా లభతి.)

౯. నీవరణఞ్చ నోనీవరణఞ్చ ధమ్మం పటిచ్చ నీవరణో ధమ్మో ఉప్పజ్జతి నపురేజాతపచ్చయా – అరూపే నోనీవరణే ఖన్ధే చ కామచ్ఛన్దనీవరణఞ్చ పటిచ్చ థినమిద్ధనీవరణం ఉద్ధచ్చనీవరణం (చక్కం). (౧)

నీవరణఞ్చ నోనీవరణఞ్చ ధమ్మం పటిచ్చ నోనీవరణో ధమ్మో ఉప్పజ్జతి నపురేజాతపచ్చయా – అరూపే నోనీవరణం ఏకం ఖన్ధఞ్చ నీవరణే చ పటిచ్చ తయో ఖన్ధా…పే… ద్వే ఖన్ధే చ…పే… నీవరణే చ సమ్పయుత్తకే చ ఖన్ధే పటిచ్చ చిత్తసముట్ఠానం రూపం, నీవరణే చ మహాభూతే చ పటిచ్చ చిత్తసముట్ఠానం రూపం. (౨)

నీవరణఞ్చ నోనీవరణఞ్చ ధమ్మం పటిచ్చ నీవరణో చ నోనీవరణో చ ధమ్మా ఉప్పజ్జన్తి నపురేజాతపచ్చయా – అరూపే నోనీవరణం ఏకం ఖన్ధఞ్చ కామచ్ఛన్దనీవరణఞ్చ పటిచ్చ తయో ఖన్ధా థినమిద్ధనీవరణం ఉద్ధచ్చనీవరణం అవిజ్జానీవరణం (చక్కం. సంఖిత్తం). (౩)