౧. విభఙ్గవారో

హేతుపచ్చయో

౯౨. నీవరణఞ్చేవ నీవరణసమ్పయుత్తఞ్చ ధమ్మం పటిచ్చ నీవరణో చేవ నీవరణసమ్పయుత్తో చ ధమ్మో ఉప్పజ్జతి హేతుపచ్చయా – కామచ్ఛన్దనీవరణం పటిచ్చ థినమిద్ధనీవరణం ఉద్ధచ్చనీవరణం అవిజ్జానీవరణం (చక్కం. సబ్బేపి నీవరణా కాతబ్బా). (౧)

నీవరణఞ్చేవ నీవరణసమ్పయుత్తఞ్చ ధమ్మం పటిచ్చ నీవరణసమ్పయుత్తో చేవ నో చ నీవరణో ధమ్మో ఉప్పజ్జతి హేతుపచ్చయా – నీవరణే పటిచ్చ సమ్పయుత్తకా ఖన్ధా. (౨)

నీవరణఞ్చేవ నీవరణసమ్పయుత్తఞ్చ ధమ్మం పటిచ్చ నీవరణో చేవ నీవరణసమ్పయుత్తో చ నీవరణసమ్పయుత్తో చేవ నో చ నీవరణో చ ధమ్మా ఉప్పజ్జన్తి హేతుపచ్చయా – కామచ్ఛన్దనీవరణం పటిచ్చ థినమిద్ధనీవరణం ఉద్ధచ్చనీవరణం అవిజ్జానీవరణం సమ్పయుత్తకా చ ఖన్ధా (చక్కం). (౩)

౯౩. నీవరణసమ్పయుత్తఞ్చేవ నో చ నీవరణం ధమ్మం పటిచ్చ నీవరణసమ్పయుత్తో చేవ నో చ నీవరణో ధమ్మో ఉప్పజ్జతి హేతుపచ్చయా – నీవరణసమ్పయుత్తఞ్చేవ నో చ నీవరణం ఏకం ఖన్ధం పటిచ్చ తయో ఖన్ధా…పే… ద్వే ఖన్ధే…పే…. (౧)

నీవరణసమ్పయుత్తఞ్చేవ నో చ నీవరణం ధమ్మం పటిచ్చ నీవరణో చేవ నీవరణసమ్పయుత్తో చ ధమ్మో ఉప్పజ్జతి హేతుపచ్చయా – నీవరణసమ్పయుత్తే చేవ నో చ నీవరణే ఖన్ధే పటిచ్చ నీవరణా. (౨)

నీవరణసమ్పయుత్తఞ్చేవ నో చ నీవరణం ధమ్మం పటిచ్చ నీవరణో చేవ నీవరణసమ్పయుత్తో చ నీవరణసమ్పయుత్తో చేవ నో చ నీవరణో చ ధమ్మా ఉప్పజ్జన్తి హేతుపచ్చయా – నీవరణసమ్పయుత్తఞ్చేవ నో చ నీవరణం ఏకం ఖన్ధం పటిచ్చ తయో ఖన్ధా నీవరణా చ…పే… ద్వే ఖన్ధే…పే…. (౩)

౯౪. నీవరణఞ్చేవ నీవరణసమ్పయుత్తఞ్చ నీవరణసమ్పయుత్తఞ్చేవ నో చ నీవరణఞ్చ ధమ్మం పటిచ్చ నీవరణో చేవ నీవరణసమ్పయుత్తో చ ధమ్మో ఉప్పజ్జతి హేతుపచ్చయా – కామచ్ఛన్దనీవరణఞ్చ సమ్పయుత్తకే చ ఖన్ధే పటిచ్చ థినమిద్ధనీవరణం ఉద్ధచ్చనీవరణం అవిజ్జానీవరణం (చక్కం). (౧)

నీవరణఞ్చేవ నీవరణసమ్పయుత్తఞ్చ నీవరణసమ్పయుత్తఞ్చేవ నో చ నీవరణఞ్చ ధమ్మం పటిచ్చ నీవరణసమ్పయుత్తో చేవ నో చ నీవరణో ధమ్మో ఉప్పజ్జతి హేతుపచ్చయా – నీవరణసమ్పయుత్తఞ్చేవ నో చ నీవరణం ఏకం ఖన్ధఞ్చ నీవరణఞ్చ పటిచ్చ తయో ఖన్ధా…పే… ద్వే ఖన్ధే చ…పే…. (౨)

నీవరణఞ్చేవ నీవరణసమ్పయుత్తఞ్చ నీవరణసమ్పయుత్తఞ్చేవ నో చ నీవరణఞ్చ ధమ్మం పటిచ్చ నీవరణో చేవ నీవరణసమ్పయుత్తో చ నీవరణసమ్పయుత్తో చేవ నో చ నీవరణో చ ధమ్మా ఉప్పజ్జన్తి హేతుపచ్చయా – నీవరణసమ్పయుత్తఞ్చేవ నో చ నీవరణం ఏకం ఖన్ధఞ్చ కామచ్ఛన్దనీవరణఞ్చ పటిచ్చ తయో ఖన్ధా థినమిద్ధనీవరణం ఉద్ధచ్చనీవరణం అవిజ్జానీవరణం…పే… ద్వే ఖన్ధే చ…పే… (చక్కం. సంఖిత్తం.). (౩)