౧. విభఙ్గవారో

హేతుపచ్చయో

౧. నీవరణం ధమ్మం పటిచ్చ నీవరణో ధమ్మో ఉప్పజ్జతి హేతుపచ్చయా – కామచ్ఛన్దనీవరణం పటిచ్చ థినమిద్ధనీవరణం [థీనమిద్ధనీవరణం (స్యా.)] ఉద్ధచ్చనీవరణం అవిజ్జానీవరణం, కామచ్ఛన్దనీవరణం పటిచ్చ ఉద్ధచ్చనీవరణం అవిజ్జానీవరణం, బ్యాపాదనీవరణం పటిచ్చ థినమిద్ధనీవరణం ఉద్ధచ్చనీవరణం అవిజ్జానీవరణం, బ్యాపాదనీవరణం పటిచ్చ ఉద్ధచ్చనీవరణం అవిజ్జానీవరణం, బ్యాపాదనీవరణం పటిచ్చ థినమిద్ధనీవరణం ఉద్ధచ్చనీవరణం కుక్కుచ్చనీవరణం అవిజ్జానీవరణం, బ్యాపాదనీవరణం పటిచ్చ ఉద్ధచ్చనీవరణం కుక్కుచ్చనీవరణం అవిజ్జానీవరణం, విచికిచ్ఛానీవరణం పటిచ్చ ఉద్ధచ్చనీవరణం, ఉద్ధచ్చనీవరణం పటిచ్చ అవిజ్జానీవరణం. (౧)

నీవరణం ధమ్మం పటిచ్చ నోనీవరణో ధమ్మో ఉప్పజ్జతి హేతుపచ్చయా – నీవరణే పటిచ్చ సమ్పయుత్తకా ఖన్ధా చిత్తసముట్ఠానఞ్చ రూపం. (౨)

నీవరణం ధమ్మం పటిచ్చ నీవరణో చ నోనీవరణో చ ధమ్మా ఉప్పజ్జన్తి హేతుపచ్చయా – కామచ్ఛన్దనీవరణం పటిచ్చ థినమిద్ధనీవరణం ఉద్ధచ్చనీవరణం అవిజ్జానీవరణం సమ్పయుత్తకా చ ఖన్ధా చిత్తసముట్ఠానఞ్చ రూపం (చక్కం). (౩)

౨. నోనీవరణం ధమ్మం పటిచ్చ నోనీవరణో ధమ్మో ఉప్పజ్జతి హేతుపచ్చయా – నోనీవరణం ఏకం ఖన్ధం పటిచ్చ తయో ఖన్ధా చిత్తసముట్ఠానఞ్చ రూపం…పే… ద్వే ఖన్ధే…పే… పటిసన్ధిక్ఖణే…పే…. (౧)

నోనీవరణం ధమ్మం పటిచ్చ నీవరణో ధమ్మో ఉప్పజ్జతి హేతుపచ్చయా – నోనీవరణే ఖన్ధే పటిచ్చ నీవరణా. (౨)

నోనీవరణం ధమ్మం పటిచ్చ నీవరణో చ నోనీవరణో చ ధమ్మా ఉప్పజ్జన్తి హేతుపచ్చయా – నోనీవరణం ఏకం ఖన్ధం పటిచ్చ తయో ఖన్ధా నీవరణా చ చిత్తసముట్ఠానఞ్చ రూపం…పే… ద్వే ఖన్ధే…పే…. (౩)

౩. నీవరణఞ్చ నోనీవరణఞ్చ ధమ్మం పటిచ్చ నీవరణో ధమ్మో ఉప్పజ్జతి హేతుపచ్చయా – కామచ్ఛన్దనీవరణఞ్చ సమ్పయుత్తకే చ ఖన్ధే పటిచ్చ థినమిద్ధనీవరణం ఉద్ధచ్చనీవరణం అవిజ్జానీవరణం (చక్కం). (౧)

నీవరణఞ్చ నోనీవరణఞ్చ ధమ్మం పటిచ్చ నోనీవరణో ధమ్మో ఉప్పజ్జతి హేతుపచ్చయా – నోనీవరణం ఏకం ఖన్ధఞ్చ నీవరణఞ్చ పటిచ్చ తయో ఖన్ధా చిత్తసముట్ఠానఞ్చ రూపం…పే… ద్వే ఖన్ధే చ…పే… నీవరణే చ మహాభూతే చ పటిచ్చ చిత్తసముట్ఠానం రూపం. (౨)

నీవరణఞ్చ నోనీవరణఞ్చ ధమ్మం పటిచ్చ నీవరణో చ నోనీవరణో చ ధమ్మా ఉప్పజ్జన్తి హేతుపచ్చయా – నోనీవరణం ఏకం ఖన్ధఞ్చ కామచ్ఛన్దనీవరణఞ్చ పటిచ్చ తయో ఖన్ధా థినమిద్ధనీవరణం ఉద్ధచ్చనీవరణం అవిజ్జానీవరణం…పే… ద్వే ఖన్ధే చ…పే… (చక్కం. సంఖిత్తం). (౩)