౧. విభఙ్గవారో

హేతుపచ్చయో

౧౩. నీవరణం ధమ్మం పచ్చయా నీవరణో ధమ్మో ఉప్పజ్జతి హేతుపచ్చయా… తీణి.

నోనీవరణం ధమ్మం పచ్చయా నోనీవరణో ధమ్మో ఉప్పజ్జతి హేతుపచ్చయా – నోనీవరణం ఏకం ఖన్ధం పచ్చయా తయో ఖన్ధా చిత్తసముట్ఠానఞ్చ రూపం…పే… (యావ అజ్ఝత్తికా మహాభూతా), వత్థుం పచ్చయా నోనీవరణా ఖన్ధా. (౧)

నోనీవరణం ధమ్మం పచ్చయా నీవరణో ధమ్మో ఉప్పజ్జతి హేతుపచ్చయా – నోనీవరణే ఖన్ధే పచ్చయా నీవరణా, వత్థుం పచ్చయా నీవరణా. (౨)

నోనీవరణం ధమ్మం పచ్చయా నీవరణో చ నోనీవరణో చ ధమ్మా ఉప్పజ్జన్తి హేతుపచ్చయా – నోనీవరణం ఏకం ఖన్ధం పచ్చయా తయో ఖన్ధా నీవరణా చ చిత్తసముట్ఠానఞ్చ రూపం…పే… ద్వే ఖన్ధే…పే… వత్థుం పచ్చయా నీవరణా, మహాభూతే పచ్చయా చిత్తసముట్ఠానం రూపం, వత్థుం పచ్చయా నీవరణా చ సమ్పయుత్తకా చ ఖన్ధా. (౩)

౧౪. నీవరణఞ్చ నోనీవరణఞ్చ ధమ్మం పచ్చయా నీవరణో ధమ్మో ఉప్పజ్జతి హేతుపచ్చయా – కామచ్ఛన్దనీవరణఞ్చ సమ్పయుత్తకే చ ఖన్ధే పచ్చయా థినమిద్ధనీవరణం ఉద్ధచ్చనీవరణం అవిజ్జానీవరణం (చక్కం). కామచ్ఛన్దనీవరణఞ్చ వత్థుఞ్చ పచ్చయా థినమిద్ధనీవరణం ఉద్ధచ్చనీవరణం అవిజ్జానీవరణం (చక్కం). (౧)

నీవరణఞ్చ నోనీవరణఞ్చ ధమ్మం పచ్చయా నోనీవరణో ధమ్మో ఉప్పజ్జతి హేతుపచ్చయా – నోనీవరణం ఏకం ఖన్ధఞ్చ నీవరణఞ్చ పచ్చయా తయో ఖన్ధా చిత్తసముట్ఠానఞ్చ రూపం…పే… ద్వే ఖన్ధే…పే… నీవరణఞ్చ వత్థుఞ్చ పచ్చయా సమ్పయుత్తకా ఖన్ధా, నీవరణఞ్చ సమ్పయుత్తకే చ ఖన్ధే పచ్చయా చిత్తసముట్ఠానం రూపం, నీవరణే చ మహాభూతే చ పచ్చయా చిత్తసముట్ఠానం రూపం. (౨)

నీవరణఞ్చ నోనీవరణఞ్చ ధమ్మం పచ్చయా నీవరణో చ నోనీవరణో చ ధమ్మా ఉప్పజ్జన్తి హేతుపచ్చయా – నోనీవరణం ఏకం ఖన్ధఞ్చ కామచ్ఛన్దనీవరణఞ్చ పచ్చయా తయో ఖన్ధా థినమిద్ధనీవరణం ఉద్ధచ్చనీవరణం అవిజ్జానీవరణం…పే… ద్వే ఖన్ధే …పే… (చక్కం). కామచ్ఛన్దనీవరణఞ్చ వత్థుఞ్చ పచ్చయా థినమిద్ధనీవరణం ఉద్ధచ్చనీవరణం అవిజ్జానీవరణం సమ్పయుత్తకా చ ఖన్ధా (చక్కం. సంఖిత్తం). (౩)