౧. విభఙ్గవారో

హేతుపచ్చయో

౧౨౧. ఆసవో చేవ ఆసవసమ్పయుత్తో చ ధమ్మో ఆసవస్స చేవ ఆసవసమ్పయుత్తస్స చ ధమ్మస్స హేతుపచ్చయేన పచ్చయో… తీణి.

ఆసవసమ్పయుత్తో చేవ నో చ ఆసవో ధమ్మో ఆసవసమ్పయుత్తస్స చేవ నో చ ఆసవస్స ధమ్మస్స హేతుపచ్చయేన పచ్చయో – ఆసవసమ్పయుత్తా చేవ నో చ ఆసవా హేతూ సమ్పయుత్తకానం ఖన్ధానం హేతుపచ్చయేన పచ్చయో. (౧)

ఆరమ్మణపచ్చయాది

౧౨౨. ఆసవో చేవ ఆసవసమ్పయుత్తో చ ధమ్మో ఆసవస్స చేవ ఆసవసమ్పయుత్తస్స చ ధమ్మస్స ఆరమ్మణపచ్చయేన పచ్చయో… తీణి.

ఆసవసమ్పయుత్తో చేవ నో చ ఆసవో ధమ్మో ఆసవసమ్పయుత్తస్స చేవ నో చ ఆసవస్స ధమ్మస్స ఆరమ్మణపచ్చయేన పచ్చయో – ఆసవసమ్పయుత్తే చేవ నో చ ఆసవే ఖన్ధే ఆరబ్భ ఆసవసమ్పయుత్తా చేవ నో చ ఆసవా ఖన్ధా ఉప్పజ్జన్తి. (౧)

ఆసవసమ్పయుత్తో చేవ నో చ ఆసవో ధమ్మో ఆసవస్స చేవ ఆసవసమ్పయుత్తస్స చ ధమ్మస్స ఆరమ్మణపచ్చయేన పచ్చయో – ఆసవసమ్పయుత్తే చేవ నో చ ఆసవే ఖన్ధే ఆరబ్భ ఆసవా ఉప్పజ్జన్తి. (౨)

ఆసవసమ్పయుత్తో చేవ నో చ ఆసవో ధమ్మో ఆసవస్స చేవ ఆసవసమ్పయుత్తస్స చ ఆసవసమ్పయుత్తస్స చేవ నో చ ఆసవస్స చ ధమ్మస్స ఆరమ్మణపచ్చయేన పచ్చయో – ఆసవసమ్పయుత్తే చేవ నో చ ఆసవే ఖన్ధే ఆరబ్భ ఆసవా చ ఆసవసమ్పయుత్తకా చ ఖన్ధా ఉప్పజ్జన్తి. (౩)

ఆసవో చేవ ఆసవసమ్పయుత్తో చ ఆసవసమ్పయుత్తో చేవ నో చ ఆసవో చ ధమ్మా ఆసవస్స చేవ ఆసవసమ్పయుత్తస్స చ ధమ్మస్స ఆరమ్మణపచ్చయేన పచ్చయో … తీణి.

అధిపతిపచ్చయా… (ఆరమ్మణసదిసా, గరుకారమ్మణా) అనన్తరపచ్చయా… (ఆరమ్మణసదిసాయేవ, పురిమా పురిమాతి కాతబ్బా.) సమనన్తరపచ్చయా… సహజాతపచ్చయా… అఞ్ఞమఞ్ఞపచ్చయా… నిస్సయపచ్చయా… ఉపనిస్సయపచ్చయా (ఆరమ్మణసదిసంయేవ, విభజనా నత్థి… తీణి. ఉపనిస్సయం సబ్బం కాతబ్బం).

కమ్మపచ్చయాది

౧౨౩. ఆసవసమ్పయుత్తో చేవ నో చ ఆసవో ధమ్మో ఆసవసమ్పయుత్తస్స చేవ నో చ ఆసవస్స ధమ్మస్స కమ్మపచ్చయేన పచ్చయో… తీణి… ఆహారపచ్చయేన పచ్చయో… తీణి… ఇన్ద్రియపచ్చయేన పచ్చయో… తీణి… ఝానపచ్చయేన పచ్చయో… తీణి… మగ్గపచ్చయేన పచ్చయో… నవ… సమ్పయుత్తపచ్చయేన పచ్చయో… నవ… అత్థిపచ్చయేన పచ్చయో… నత్థిపచ్చయేన పచ్చయో… విగతపచ్చయేన పచ్చయో… అవిగతపచ్చయేన పచ్చయో… నవ.