౧. పచ్చయానులోమం

౧. విభఙ్గవారో

(పఞ్హావారే హేతుపచ్చయేపి ఆరమ్మణపచ్చయేపి లోకుత్తరం న కాతబ్బం, సేఖా గోత్రభుం పచ్చవేక్ఖన్తి, వోదానం పచ్చవేక్ఖన్తీతి కాతబ్బా. అధిపతిపచ్చయమ్పి సబ్బం జానిత్వా కాతబ్బం.)

అనన్తరపచ్చయో

౧౧౨. ఆసవో చేవ సాసవో చ ధమ్మో ఆసవస్స చేవ సాసవస్స చ ధమ్మస్స అనన్తరపచ్చయేన పచ్చయో – పురిమా పురిమా ఆసవా పచ్ఛిమానం పచ్ఛిమానం ఆసవానం అనన్తరపచ్చయేన పచ్చయో. (౧)

ఆసవో చేవ సాసవో చ ధమ్మో సాసవస్స చేవ నో చ ఆసవస్స ధమ్మస్స అనన్తరపచ్చయేన పచ్చయో – పురిమా పురిమా ఆసవా పచ్ఛిమానం పచ్ఛిమానం సాసవఞ్చేవ నో చ ఆసవానం ఖన్ధానం అనన్తరపచ్చయేన పచ్చయో; ఆసవా వుట్ఠానస్స అనన్తరపచ్చయేన పచ్చయో. (౨)

ఆసవో చేవ సాసవో చ ధమ్మో ఆసవస్స చేవ సాసవస్స చ సాసవస్స చేవ నో చ ఆసవస్స చ ధమ్మస్స అనన్తరపచ్చయేన పచ్చయో – పురిమా పురిమా ఆసవా పచ్ఛిమానం పచ్ఛిమానం ఆసవానం సమ్పయుత్తకానఞ్చ ఖన్ధానం అనన్తరపచ్చయేన పచ్చయో. (౩)

౧౧౩. సాసవో చేవ నో చ ఆసవో ధమ్మో సాసవస్స చేవ నో చ ఆసవస్స ధమ్మస్స అనన్తరపచ్చయేన పచ్చయో – పురిమా పురిమా సాసవా చేవ నో చ ఆసవా ఖన్ధా పచ్ఛిమానం పచ్ఛిమానం సాసవానఞ్చేవ నో చ ఆసవానం ఖన్ధానం అనన్తరపచ్చయేన పచ్చయో; అనులోమం గోత్రభుస్స, అనులోమం వోదానస్స, ఆవజ్జనా సాసవానఞ్చేవ నో చ ఆసవానం ఖన్ధానం అనన్తరపచ్చయేన పచ్చయో. (౧)

సాసవో చేవ నో చ ఆసవో ధమ్మో ఆసవస్స చేవ సాసవస్స చ ధమ్మస్స అనన్తరపచ్చయేన పచ్చయో – పురిమా పురిమా సాసవా చేవ నో చ ఆసవా ఖన్ధా పచ్ఛిమానం పచ్ఛిమానం ఆసవానం అనన్తరపచ్చయేన పచ్చయో; ఆవజ్జనా ఆసవానం అనన్తరపచ్చయేన పచ్చయో. (౨)

సాసవో చేవ నో చ ఆసవో ధమ్మో ఆసవస్స చేవ సాసవస్స చ సాసవస్స చేవ నో చ ఆసవస్స చ ధమ్మస్స అనన్తరపచ్చయేన పచ్చయో – పురిమా పురిమా సాసవా చేవ నో చ ఆసవా ఖన్ధా పచ్ఛిమానం పచ్ఛిమానం ఆసవానం సమ్పయుత్తకానఞ్చ ఖన్ధానం అనన్తరపచ్చయేన పచ్చయో; ఆవజ్జనా ఆసవానం సమ్పయుత్తకానఞ్చ ఖన్ధానం అనన్తరపచ్చయేన పచ్చయో. (౩)

౧౧౪. ఆసవో చేవ సాసవో చ సాసవో చేవ నో చ ఆసవో చ ధమ్మా ఆసవస్స చేవ సాసవస్స చ ధమ్మస్స అనన్తరపచ్చయేన పచ్చయో – పురిమా పురిమా ఆసవా చ సమ్పయుత్తకా చ ఖన్ధా పచ్ఛిమానం పచ్ఛిమానం ఆసవానం అనన్తరపచ్చయేన పచ్చయో. (౧)

ఆసవో చేవ సాసవో చ సాసవో చేవ నో చ ఆసవో చ ధమ్మా సాసవస్స చేవ నో చ ఆసవస్స ధమ్మస్స అనన్తరపచ్చయేన పచ్చయో – పురిమా పురిమా ఆసవా చ సమ్పయుత్తకా చ ఖన్ధా పచ్ఛిమానం పచ్ఛిమానం సాసవానఞ్చేవ నో చ ఆసవానం ఖన్ధానం అనన్తరపచ్చయేన పచ్చయో; ఆసవా చ సమ్పయుత్తకా చ ఖన్ధా వుట్ఠానస్స అనన్తరపచ్చయేన పచ్చయో. (౨)

ఆసవో చేవ సాసవో చ సాసవో చేవ నో చ ఆసవో చ ధమ్మా ఆసవస్స చేవ సాసవస్స చ సాసవస్స చేవ నో చ ఆసవస్స చ ధమ్మస్స అనన్తరపచ్చయేన పచ్చయో – పురిమా పురిమా ఆసవా చ సమ్పయుత్తకా చ ఖన్ధా పచ్ఛిమానం పచ్ఛిమానం ఆసవానం సమ్పయుత్తకానఞ్చ ఖన్ధానం అనన్తరపచ్చయేన పచ్చయో (ఏవం సబ్బం విత్థారేతబ్బం). (౩)

(ఆసవదుకేపి అనన్తరం ఇమినా సదిసం కాతబ్బం. ఆవజ్జనాపి వుట్ఠానమ్పి ఏవం సముద్దిట్ఠం సంఖిత్తం. సబ్బం పరిపుణ్ణం. ఆసవదుకసదిసం కాతబ్బం, నిన్నానం.)

ఆసవసాసవదుకం నిట్ఠితం.