౧. విభఙ్గవారో

హేతుపచ్చయో

౧౦౯. ఆసవఞ్చేవ సాసవఞ్చ ధమ్మం పటిచ్చ ఆసవో చేవ సాసవో చ ధమ్మో ఉప్పజ్జతి హేతుపచ్చయా – కామాసవం పటిచ్చ దిట్ఠాసవో అవిజ్జాసవో (చక్కం బన్ధితబ్బం) భవాసవం పటిచ్చ అవిజ్జాసవో (చక్కం బన్ధితబ్బం) దిట్ఠాసవం పటిచ్చ అవిజ్జాసవో. (౧)

ఆసవఞ్చేవ సాసవఞ్చ ధమ్మం పటిచ్చ సాసవో చేవ నో చ ఆసవో ధమ్మో ఉప్పజ్జతి హేతుపచ్చయా – ఆసవే పటిచ్చ సమ్పయుత్తకా ఖన్ధా చిత్తసముట్ఠానఞ్చ రూపం. (౨)

ఆసవఞ్చేవ సాసవఞ్చ ధమ్మం పటిచ్చ ఆసవో చేవ సాసవో చ సాసవో చేవ నో చ ఆసవో చ ధమ్మా ఉప్పజ్జన్తి హేతుపచ్చయా – కామాసవం పటిచ్చ దిట్ఠాసవో అవిజ్జాసవో సమ్పయుత్తకా ఖన్ధా చిత్తసముట్ఠానఞ్చ రూపం, భవాసవం (చక్కం బన్ధితబ్బం). (౩)

౧౧౦. సాసవఞ్చేవ నో చ ఆసవం ధమ్మం పటిచ్చ సాసవో చేవ నో చ ఆసవో ధమ్మో ఉప్పజ్జతి హేతుపచ్చయా – సాసవఞ్చేవ నో చ ఆసవం ఏకం ఖన్ధం పటిచ్చ తయో ఖన్ధా చిత్తసముట్ఠానఞ్చ రూపం…పే… ద్వే ఖన్ధే…పే… పటిసన్ధిక్ఖణే…పే… ఖన్ధే పటిచ్చ వత్థు, వత్థుం పటిచ్చ ఖన్ధా, ఏకం మహాభూతం…పే…. (౧)

సాసవఞ్చేవ నో చ ఆసవం ధమ్మం పటిచ్చ ఆసవో చేవ సాసవో చ ధమ్మో ఉప్పజ్జతి హేతుపచ్చయా – సాసవే చేవ నో చ ఆసవే ఖన్ధే పటిచ్చ ఆసవా. (౨)

సాసవఞ్చేవ నో చ ఆసవం ధమ్మం పటిచ్చ ఆసవో చేవ సాసవో చ సాసవో చేవ నో చ ఆసవో చ ధమ్మా ఉప్పజ్జన్తి హేతుపచ్చయా – సాసవఞ్చేవ నో చ ఆసవం ఏకం ఖన్ధం పటిచ్చ తయో ఖన్ధా ఆసవా చ చిత్తసముట్ఠానఞ్చ రూపం…పే… ద్వే ఖన్ధే…పే…. (౩)

౧౧౧. ఆసవఞ్చేవ సాసవఞ్చ సాసవఞ్చేవ నో చ ఆసవఞ్చ ధమ్మం పటిచ్చ ఆసవో చేవ సాసవో చ ధమ్మో ఉప్పజ్జతి హేతుపచ్చయా – కామాసవఞ్చ సమ్పయుత్తకే చ ఖన్ధే పటిచ్చ దిట్ఠాసవో అవిజ్జాసవో (ఏవం చక్కం బన్ధితబ్బం). (౧)

ఆసవఞ్చేవ సాసవఞ్చ సాసవఞ్చేవ నో చ ఆసవఞ్చ ధమ్మం పటిచ్చ సాసవో చేవ నో చ ఆసవో ధమ్మో ఉప్పజ్జతి హేతుపచ్చయా – సాసవఞ్చేవ నో చ ఆసవం ఏకం ఖన్ధఞ్చ ఆసవే చ పటిచ్చ తయో ఖన్ధా చిత్తసముట్ఠానఞ్చ రూపం…పే… ద్వే ఖన్ధే చ…పే…. (౨)

ఆసవఞ్చేవ సాసవఞ్చ సాసవఞ్చేవ నో చ ఆసవఞ్చ ధమ్మం పటిచ్చ ఆసవో చేవ సాసవో చ సాసవో చేవ నో చ ఆసవో చ ధమ్మా ఉప్పజ్జన్తి హేతుపచ్చయా – సాసవఞ్చేవ నో చ ఆసవం ఏకం ఖన్ధఞ్చ కామాసవఞ్చ పటిచ్చ తయో ఖన్ధా దిట్ఠాసవో అవిజ్జాసవో చిత్తసముట్ఠానఞ్చ రూపం…పే… ద్వే ఖన్ధే చ…పే… (చక్కం. సంఖిత్తం). (౩)