౧. విభఙ్గవారో

హేతుపచ్చయో

౬౬. ఆసవసమ్పయుత్తం ధమ్మం పచ్చయా ఆసవసమ్పయుత్తో ధమ్మో ఉప్పజ్జతి హేతుపచ్చయా… తీణి (పటిచ్చవారసదిసో).

ఆసవవిప్పయుత్తం ధమ్మం పచ్చయా ఆసవవిప్పయుత్తో ధమ్మో ఉప్పజ్జతి హేతుపచ్చయా – ఆసవవిప్పయుత్తం ఏకం ఖన్ధం పచ్చయా తయో ఖన్ధా చిత్తసముట్ఠానఞ్చ రూపం…పే… ద్వే ఖన్ధే…పే… దోమనస్ససహగతం విచికిచ్ఛాసహగతం ఉద్ధచ్చసహగతం మోహం పచ్చయా చిత్తసముట్ఠానం రూపం; పటిసన్ధిక్ఖణే…పే… ఖన్ధే పచ్చయా వత్థు, వత్థుం పచ్చయా ఖన్ధా, ఏకం మహాభూతం…పే… మహాభూతే పచ్చయా చిత్తసముట్ఠానం రూపం, కటత్తారూపం, ఉపాదారూపం. వత్థుం పచ్చయా ఆసవవిప్పయుత్తా ఖన్ధా, వత్థుం పచ్చయా దోమనస్ససహగతో మోహో. (౧)

ఆసవవిప్పయుత్తం ధమ్మం పచ్చయా ఆసవసమ్పయుత్తో ధమ్మో ఉప్పజ్జతి హేతుపచ్చయా – వత్థుం పచ్చయా ఆసవసమ్పయుత్తకా ఖన్ధా, దోమనస్ససహగతం విచికిచ్ఛాసహగతం ఉద్ధచ్చసహగతం మోహం పచ్చయా సమ్పయుత్తకా ఖన్ధా. (౨)

ఆసవవిప్పయుత్తం ధమ్మం పచ్చయా ఆసవసమ్పయుత్తో చ ఆసవవిప్పయుత్తో చ ధమ్మా ఉప్పజ్జన్తి హేతుపచ్చయా – వత్థుం పచ్చయా ఆసవసమ్పయుత్తకా ఖన్ధా, మహాభూతే పచ్చయా చిత్తసముట్ఠానం రూపం, దోమనస్ససహగతం విచికిచ్ఛాసహగతం ఉద్ధచ్చసహగతం మోహం పచ్చయా సమ్పయుత్తకా ఖన్ధా చిత్తసముట్ఠానఞ్చ రూపం, వత్థుం పచ్చయా దోమనస్ససహగతా ఖన్ధా చ మోహో చ. (౩)

౬౭. ఆసవసమ్పయుత్తఞ్చ ఆసవవిప్పయుత్తఞ్చ ధమ్మం పచ్చయా ఆసవసమ్పయుత్తో ధమ్మో ఉప్పజ్జతి హేతుపచ్చయా – ఆసవసమ్పయుత్తం ఏకం ఖన్ధఞ్చ వత్థుఞ్చ పచ్చయా తయో ఖన్ధా…పే… ద్వే ఖన్ధే చ…పే… దోమనస్ససహగతం విచికిచ్ఛాసహగతం ఉద్ధచ్చసహగతం ఏకం ఖన్ధఞ్చ మోహఞ్చ పచ్చయా తయో ఖన్ధా…పే… ద్వే ఖన్ధే చ…పే…. (౧)

ఆసవసమ్పయుత్తఞ్చ ఆసవవిప్పయుత్తఞ్చ ధమ్మం పచ్చయా ఆసవవిప్పయుత్తో ధమ్మో ఉప్పజ్జతి హేతుపచ్చయా – ఆసవసమ్పయుత్తే ఖన్ధే చ మహాభూతే చ పచ్చయా చిత్తసముట్ఠానం రూపం, దోమనస్ససహగతే విచికిచ్ఛాసహగతే ఉద్ధచ్చసహగతే ఖన్ధే చ మోహఞ్చ పచ్చయా చిత్తసముట్ఠానం రూపం, దోమనస్ససహగతే ఖన్ధే చ వత్థుఞ్చ పచ్చయా దోమనస్ససహగతో మోహో. (౨)

ఆసవసమ్పయుత్తఞ్చ ఆసవవిప్పయుత్తఞ్చ ధమ్మం పచ్చయా ఆసవసమ్పయుత్తో చ ఆసవవిప్పయుత్తో చ ధమ్మా ఉప్పజ్జన్తి హేతుపచ్చయా – ఆసవసమ్పయుత్తం ఏకం ఖన్ధఞ్చ వత్థుఞ్చ పచ్చయా తయో ఖన్ధా…పే… ద్వే ఖన్ధే…పే… ఆసవసమ్పయుత్తే ఖన్ధే చ మహాభూతే చ పచ్చయా చిత్తసముట్ఠానం రూపం, దోమనస్ససహగతం విచికిచ్ఛాసహగతం ఉద్ధచ్చసహగతం ఏకం ఖన్ధఞ్చ మోహఞ్చ పచ్చయా తయో ఖన్ధా చిత్తసముట్ఠానఞ్చ రూపం…పే… ద్వే ఖన్ధే…పే… దోమనస్ససహగతం ఏకం ఖన్ధఞ్చ వత్థుఞ్చ పచ్చయా తయో ఖన్ధా మోహో చ…పే… ద్వే ఖన్ధే…పే…. (౩)

ఆరమ్మణపచ్చయాది

౬౮. ఆసవసమ్పయుత్తం ధమ్మం పచ్చయా ఆసవసమ్పయుత్తో ధమ్మో ఉప్పజ్జతి ఆరమ్మణపచ్చయా… తీణి (పటిచ్చవారసదిసా).

ఆసవవిప్పయుత్తం ధమ్మం పచ్చయా ఆసవవిప్పయుత్తో ధమ్మో ఉప్పజ్జతి ఆరమ్మణపచ్చయా – ఆసవవిప్పయుత్తం ఏకం ఖన్ధం పచ్చయా తయో ఖన్ధా…పే… ద్వే ఖన్ధే…పే… పటిసన్ధిక్ఖణే…పే… వత్థుం పచ్చయా ఖన్ధా, చక్ఖాయతనం పచ్చయా చక్ఖువిఞ్ఞాణం…పే… కాయాయతనం పచ్చయా కాయవిఞ్ఞాణం, వత్థుం పచ్చయా ఆసవవిప్పయుత్తా ఖన్ధా, వత్థుం పచ్చయా దోమనస్ససహగతో విచికిచ్ఛాసహగతో ఉద్ధచ్చసహగతో మోహో. (౧)

ఆసవవిప్పయుత్తం ధమ్మం పచ్చయా ఆసవసమ్పయుత్తో ధమ్మో ఉప్పజ్జతి ఆరమ్మణపచ్చయా – వత్థుం పచ్చయా ఆసవసమ్పయుత్తకా ఖన్ధా, దోమనస్ససహగతం విచికిచ్ఛాసహగతం ఉద్ధచ్చసహగతం మోహం పచ్చయా సమ్పయుత్తకా ఖన్ధా. (౨)

ఆసవవిప్పయుత్తం ధమ్మం పచ్చయా ఆసవసమ్పయుత్తో చ ఆసవవిప్పయుత్తో చ ధమ్మా ఉప్పజ్జన్తి ఆరమ్మణపచ్చయా – వత్థుం పచ్చయా దోమనస్ససహగతా విచికిచ్ఛాసహగతా ఉద్ధచ్చసహగతా ఖన్ధా మోహో చ. (౩)

౬౯. ఆసవసమ్పయుత్తఞ్చ ఆసవవిప్పయుత్తఞ్చ ధమ్మం పచ్చయా ఆసవసమ్పయుత్తో ధమ్మో ఉప్పజ్జతి ఆరమ్మణపచ్చయా – ఆసవసమ్పయుత్తం ఏకం ఖన్ధఞ్చ వత్థుఞ్చ పచ్చయా తయో ఖన్ధా…పే… ద్వే ఖన్ధే…పే…. (౧)

ఆసవసమ్పయుత్తఞ్చ ఆసవవిప్పయుత్తఞ్చ ధమ్మం పచ్చయా ఆసవవిప్పయుత్తో ధమ్మో ఉప్పజ్జతి ఆరమ్మణపచ్చయా – దోమనస్ససహగతే విచికిచ్ఛాసహగతే ఉద్ధచ్చసహగతే ఖన్ధే చ వత్థుఞ్చ పచ్చయా దోమనస్ససహగతో విచికిచ్ఛాసహగతో ఉద్ధచ్చసహగతో మోహో. (౨)

ఆసవసమ్పయుత్తఞ్చ ఆసవవిప్పయుత్తఞ్చ ధమ్మం పచ్చయా ఆసవసమ్పయుత్తో చ ఆసవవిప్పయుత్తో చ ధమ్మా ఉప్పజ్జన్తి ఆరమ్మణపచ్చయా – దోమనస్ససహగతం విచికిచ్ఛాసహగతం ఉద్ధచ్చసహగతం ఏకం ఖన్ధఞ్చ వత్థుఞ్చ పచ్చయా తయో ఖన్ధా మోహో చ…పే… ద్వే ఖన్ధే…పే… అధిపతిపచ్చయా… అనన్తరపచ్చయా…పే… అవిగతపచ్చయా. (౩)