౧. విభఙ్గవారో

హేతుపచ్చయో

౫౩. సప్పటిఘం ధమ్మం పటిచ్చ సప్పటిఘో ధమ్మో ఉప్పజ్జతి హేతుపచ్చయా – సప్పటిఘం ఏకం మహాభూతం పటిచ్చ ద్వే మహాభూతా, ద్వే మహాభూతే పటిచ్చ ఏకం మహాభూతం, సప్పటిఘే మహాభూతే పటిచ్చ సప్పటిఘం చిత్తసముట్ఠానం రూపం, కటత్తారూపం, ఉపాదారూపం, ఫోట్ఠబ్బాయతనం పటిచ్చ చక్ఖాయతనం…పే… రసాయతనం. (౧)

సప్పటిఘం ధమ్మం పటిచ్చ అప్పటిఘో ధమ్మో ఉప్పజ్జతి హేతుపచ్చయా – సప్పటిఘే మహాభూతే పటిచ్చ ఆపోధాతు, సప్పటిఘే మహాభూతే పటిచ్చ అప్పటిఘం చిత్తసముట్ఠానం రూపం, కటత్తారూపం, ఉపాదారూపం, ఫోట్ఠబ్బాయతనం పటిచ్చ ఆపోధాతు ఇత్థిన్ద్రియం…పే… కబళీకారో ఆహారో. (౨)

సప్పటిఘం ధమ్మం పటిచ్చ సప్పటిఘో చ అప్పటిఘో చ ధమ్మా ఉప్పజ్జన్తి హేతుపచ్చయా – సప్పటిఘం ఏకం మహాభూతం పటిచ్చ ద్వే మహాభూతా ఆపోధాతు చ, ద్వే మహాభూతే…పే… సప్పటిఘే మహాభూతే పటిచ్చ సప్పటిఘఞ్చ అప్పటిఘఞ్చ చిత్తసముట్ఠానం రూపం, కటత్తారూపం, ఉపాదారూపం, ఫోట్ఠబ్బాయతనం పటిచ్చ చక్ఖాయతనం…పే… రసాయతనం ఆపోధాతు ఇత్థిన్ద్రియం…పే… కబళీకారో ఆహారో. (౩)

౫౪. అప్పటిఘం ధమ్మం పటిచ్చ అప్పటిఘో ధమ్మో ఉప్పజ్జతి హేతుపచ్చయా – అప్పటిఘం ఏకం ఖన్ధం పటిచ్చ తయో ఖన్ధా అప్పటిఘం చిత్తసముట్ఠానఞ్చ రూపం…పే… ద్వే ఖన్ధే…పే… పటిసన్ధిక్ఖణే…పే… ఖన్ధే పటిచ్చ వత్థు, వత్థుం పటిచ్చ ఖన్ధా, ఆపోధాతుం పటిచ్చ అప్పటిఘం చిత్తసముట్ఠానం రూపం, కటత్తారూపం, ఉపాదారూపం, ఆపోధాతుం పటిచ్చ ఇత్థిన్ద్రియం…పే… కబళీకారో ఆహారో. (౧)

అప్పటిఘం ధమ్మం పటిచ్చ సప్పటిఘో ధమ్మో ఉప్పజ్జతి హేతుపచ్చయా – అప్పటిఘే ఖన్ధే పటిచ్చ సప్పటిఘం చిత్తసముట్ఠానం రూపం; పటిసన్ధిక్ఖణే…పే… ఆపోధాతుం పటిచ్చ సప్పటిఘా మహాభూతా, ఆపోధాతుం పటిచ్చ సప్పటిఘం చిత్తసముట్ఠానం రూపం, కటత్తారూపం, ఉపాదారూపం, ఆపోధాతుం పటిచ్చ చక్ఖాయతనం…పే… ఫోట్ఠబ్బాయతనం. (౨)

అప్పటిఘం ధమ్మం పటిచ్చ సప్పటిఘో చ అప్పటిఘో చ ధమ్మా ఉప్పజ్జన్తి హేతుపచ్చయా – అప్పటిఘం ఏకం ఖన్ధం పటిచ్చ తయో ఖన్ధా సప్పటిఘఞ్చ అప్పటిఘఞ్చ చిత్తసముట్ఠానం రూపం…పే… ద్వే ఖన్ధే…పే… పటిసన్ధిక్ఖణే…పే… ఆపోధాతుం పటిచ్చ సప్పటిఘఞ్చ అప్పటిఘఞ్చ చిత్తసముట్ఠానం రూపం, కటత్తారూపం, ఉపాదారూపం, ఆపోధాతుం పటిచ్చ చక్ఖాయతనం…పే… ఫోట్ఠబ్బాయతనం, ఇత్థిన్ద్రియం…పే… కబళీకారో ఆహారో. (౩)

౫౫. సప్పటిఘఞ్చ అప్పటిఘఞ్చ ధమ్మం పటిచ్చ సప్పటిఘో ధమ్మో ఉప్పజ్జతి హేతుపచ్చయా – అప్పటిఘే ఖన్ధే చ మహాభూతే చ పటిచ్చ సప్పటిఘం చిత్తసముట్ఠానం రూపం; పటిసన్ధిక్ఖణే…పే… సప్పటిఘం ఏకం మహాభూతఞ్చ ఆపోధాతుఞ్చ పటిచ్చ ద్వే మహాభూతా…పే… సప్పటిఘే మహాభూతే చ ఆపోధాతుఞ్చ పటిచ్చ సప్పటిఘం చిత్తసముట్ఠానం రూపం, కటత్తారూపం, ఉపాదారూపం, ఫోట్ఠబ్బాయతనఞ్చ ఆపోధాతుఞ్చ పటిచ్చ చక్ఖాయతనం…పే…. (౧)

సప్పటిఘఞ్చ అప్పటిఘఞ్చ ధమ్మం పటిచ్చ అప్పటిఘో ధమ్మో ఉప్పజ్జతి హేతుపచ్చయా – అప్పటిఘే ఖన్ధే చ మహాభూతే చ పటిచ్చ అప్పటిఘం చిత్తసముట్ఠానం రూపం; పటిసన్ధిక్ఖణే అప్పటిఘే ఖన్ధే చ మహాభూతే చ పటిచ్చ అప్పటిఘం కటత్తారూపం, ఫోట్ఠబ్బాయతనఞ్చ ఆపోధాతుఞ్చ పటిచ్చ అప్పటిఘం చిత్తసముట్ఠానం రూపం, కటత్తారూపం, ఉపాదారూపం, ఫోట్ఠబ్బాయతనఞ్చ ఆపోధాతుఞ్చ పటిచ్చ ఇత్థిన్ద్రియం…పే… కబళీకారో ఆహారో. (౨)

సప్పటిఘఞ్చ అప్పటిఘఞ్చ ధమ్మం పటిచ్చ సప్పటిఘో చ అప్పటిఘో చ ధమ్మా ఉప్పజ్జన్తి హేతుపచ్చయా – అప్పటిఘే ఖన్ధే చ మహాభూతే చ పటిచ్చ సప్పటిఘఞ్చ అప్పటిఘఞ్చ చిత్తసముట్ఠానం రూపం; పటిసన్ధిక్ఖణే…పే… అప్పటిఘే ఖన్ధే చ మహాభూతే చ పటిచ్చ సప్పటిఘఞ్చ అప్పటిఘఞ్చ కటత్తారూపం, ఫోట్ఠబ్బాయతనఞ్చ ఆపోధాతుఞ్చ పటిచ్చ సప్పటిఘఞ్చ అప్పటిఘఞ్చ చిత్తసముట్ఠానం రూపం, కటత్తారూపం, ఉపాదారూపం, ఫోట్ఠబ్బాయతనఞ్చ ఆపోధాతుఞ్చ పటిచ్చ చక్ఖాయతనం…పే… రసాయతనం, ఇత్థిన్ద్రియం…పే… కబళీకారో ఆహారో. (౩)

ఆరమ్మణపచ్చయో

౫౬. అప్పటిఘం ధమ్మం పటిచ్చ అప్పటిఘో ధమ్మో ఉప్పజ్జతి ఆరమ్మణపచ్చయా – అప్పటిఘం ఏకం ఖన్ధం పటిచ్చ తయో ఖన్ధా…పే… ద్వే ఖన్ధే…పే… పటిసన్ధిక్ఖణే…పే… వత్థుం పటిచ్చ ఖన్ధా.

అధిపతిపచ్చయాది

౫౭. సప్పటిఘం ధమ్మం పటిచ్చ అప్పటిఘో ధమ్మో ఉప్పజ్జతి అధిపతిపచ్చయా (పటిసన్ధి వజ్జేతబ్బా, కటత్తారూపా చ)… అనన్తరపచ్చయా… సమనన్తరపచ్చయా… సహజాతపచ్చయా (సబ్బే మహాభూతా కాతబ్బా)… అఞ్ఞమఞ్ఞపచ్చయా – సప్పటిఘం ఏకం మహాభూతం పటిచ్చ ద్వే మహాభూతా, ద్వే మహాభూతే…పే…. (౧)

సప్పటిఘం ధమ్మం పటిచ్చ అప్పటిఘో ధమ్మో ఉప్పజ్జతి అఞ్ఞమఞ్ఞపచ్చయా – సప్పటిఘే మహాభూతే పటిచ్చ ఆపోధాతు…పే…. (౨)

సప్పటిఘం ధమ్మం పటిచ్చ సప్పటిఘో చ అప్పటిఘో చ ధమ్మా ఉప్పజ్జన్తి అఞ్ఞమఞ్ఞపచ్చయా – సప్పటిఘం ఏకం మహాభూతం పటిచ్చ ద్వే మహాభూతా ఆపోధాతు చ, ద్వే మహాభూతే…పే…. (౩)

౫౮. అప్పటిఘం ధమ్మం పటిచ్చ అప్పటిఘో ధమ్మో ఉప్పజ్జతి అఞ్ఞమఞ్ఞపచ్చయా – అప్పటిఘం ఏకం ఖన్ధం పటిచ్చ తయో ఖన్ధా…పే… ద్వే ఖన్ధే…పే… పటిసన్ధిక్ఖణే…పే… ఖన్ధే పటిచ్చ వత్థు, వత్థుం పటిచ్చ ఖన్ధా. (౧)

అప్పటిఘం ధమ్మం పటిచ్చ సప్పటిఘో ధమ్మో ఉప్పజ్జతి అఞ్ఞమఞ్ఞపచ్చయా – ఆపోధాతుం పటిచ్చ సప్పటిఘా మహాభూతా (ఇమే అజ్ఝత్తికబాహిరా మహాభూతా కాతబ్బా). (౨)

సప్పటిఘఞ్చ అప్పటిఘఞ్చ ధమ్మం పటిచ్చ సప్పటిఘో ధమ్మో ఉప్పజ్జతి అఞ్ఞమఞ్ఞపచ్చయా – సప్పటిఘం ఏకం మహాభూతఞ్చ ఆపోధాతుఞ్చ పటిచ్చ ద్వే మహాభూతా…పే… నిస్సయపచ్చయా…పే… అవిగతపచ్చయా.