౧. విభఙ్గవారో

నహేతుపచ్చయో

౨౨. అనిదస్సనం ధమ్మం పటిచ్చ అనిదస్సనో ధమ్మో ఉప్పజ్జతి నహేతుపచ్చయా – అహేతుకం అనిదస్సనం ఏకం ఖన్ధం పటిచ్చ తయో ఖన్ధా అనిదస్సనం చిత్తసముట్ఠానఞ్చ రూపం…పే… ద్వే ఖన్ధే…పే… అహేతుకపటిసన్ధిక్ఖణే…పే… ఖన్ధే పటిచ్చ వత్థు, వత్థుం పటిచ్చ ఖన్ధా; ఏకం మహాభూతం…పే… మహాభూతే పటిచ్చ అనిదస్సనం చిత్తసముట్ఠానం రూపం కటత్తారూపం ఉపాదారూపం… బాహిరం… ఆహారసముట్ఠానం… ఉతుసముట్ఠానం… అసఞ్ఞసత్తానం…పే… విచికిచ్ఛాసహగతే ఉద్ధచ్చసహగతే ఖన్ధే పటిచ్చ విచికిచ్ఛాసహగతో ఉద్ధచ్చసహగతో మోహో. (౧)

అనిదస్సనం ధమ్మం పటిచ్చ సనిదస్సనో ధమ్మో ఉప్పజ్జతి నహేతుపచ్చయా – అహేతుకే అనిదస్సనే ఖన్ధే పటిచ్చ సనిదస్సనం చిత్తసముట్ఠానం రూపం; పటిసన్ధిక్ఖణే…పే… మహాభూతే పటిచ్చ సనిదస్సనం చిత్తసముట్ఠానం రూపం కటత్తారూపం ఉపాదారూపం… బాహిరే… ఆహారసముట్ఠానే… ఉతుసముట్ఠానే… అసఞ్ఞసత్తానం మహాభూతే పటిచ్చ సనిదస్సనం కటత్తారూపం ఉపాదారూపం. (౨)

అనిదస్సనం ధమ్మం పటిచ్చ సనిదస్సనో చ అనిదస్సనో చ ధమ్మా ఉప్పజ్జన్తి నహేతుపచ్చయా – అహేతుకం అనిదస్సనం ఏకం ఖన్ధం పటిచ్చ తయో ఖన్ధా సనిదస్సనఞ్చ అనిదస్సనఞ్చ చిత్తసముట్ఠానం రూపం…పే… ద్వే ఖన్ధే…పే… పటిసన్ధిక్ఖణే…పే… మహాభూతే పటిచ్చ…పే… బాహిరే… ఆహారసముట్ఠానే… ఉతుసముట్ఠానే… అసఞ్ఞసత్తానం మహాభూతే పటిచ్చ సనిదస్సనఞ్చ అనిదస్సనఞ్చ కటత్తారూపం, ఉపాదారూపం. (౩) (ఏవం సబ్బే కాతబ్బా.)