౧. విభఙ్గవారో

హేతుపచ్చయో

౧౮. అనిదస్సనం ధమ్మం పటిచ్చ అనిదస్సనో ధమ్మో ఉప్పజ్జతి హేతుపచ్చయా – అనిదస్సనం ఏకం ఖన్ధం పటిచ్చ తయో ఖన్ధా అనిదస్సనం చిత్తసముట్ఠానఞ్చ రూపం…పే… ద్వే ఖన్ధే…పే… పటిసన్ధిక్ఖణే అనిదస్సనం ఏకం ఖన్ధం పటిచ్చ తయో ఖన్ధా అనిదస్సనం కటత్తా చ రూపం…పే… ద్వే ఖన్ధే…పే… ఖన్ధే పటిచ్చ వత్థు, వత్థుం పటిచ్చ ఖన్ధా; ఏకం మహాభూతం…పే… మహాభూతే పటిచ్చ అనిదస్సనం చిత్తసముట్ఠానం రూపం కటత్తారూపం ఉపాదారూపం. (౧)

అనిదస్సనం ధమ్మం పటిచ్చ సనిదస్సనో ధమ్మో ఉప్పజ్జతి హేతుపచ్చయా – అనిదస్సనే ఖన్ధే పటిచ్చ సనిదస్సనం చిత్తసముట్ఠానం రూపం; పటిసన్ధిక్ఖణే…పే… మహాభూతే పటిచ్చ సనిదస్సనం చిత్తసముట్ఠానం రూపం కటత్తారూపం ఉపాదారూపం. (౨)

అనిదస్సనం ధమ్మం పటిచ్చ సనిదస్సనో చ అనిదస్సనో చ ధమ్మా ఉప్పజ్జన్తి హేతుపచ్చయా – అనిదస్సనం ఏకం ఖన్ధం పటిచ్చ తయో ఖన్ధా సనిదస్సనఞ్చ అనిదస్సనఞ్చ చిత్తసముట్ఠానఞ్చ రూపం…పే… ద్వే ఖన్ధే…పే… పటిసన్ధిక్ఖణే…పే… మహాభూతే పటిచ్చ సనిదస్సనఞ్చ అనిదస్సనఞ్చ చిత్తసముట్ఠానఞ్చ రూపం కటత్తారూపం ఉపాదారూపం. (౩)

ఆరమ్మణపచ్చయో

౧౯. అనిదస్సనం ధమ్మం పటిచ్చ అనిదస్సనో ధమ్మో ఉప్పజ్జతి ఆరమ్మణపచ్చయా – అనిదస్సనం ఏకం ఖన్ధం పటిచ్చ తయో ఖన్ధా…పే… ద్వే ఖన్ధే…పే… పటిసన్ధిక్ఖణే…పే… వత్థుం పటిచ్చ ఖన్ధా. (౧)

అధిపతిపచ్చయో

౨౦. అనిదస్సనం ధమ్మం పటిచ్చ అనిదస్సనో ధమ్మో ఉప్పజ్జతి అధిపతిపచ్చయా – అనిదస్సనం ఏకం ఖన్ధం పటిచ్చ తయో ఖన్ధా అనిదస్సనం చిత్తసముట్ఠానఞ్చ రూపం…పే… ద్వే ఖన్ధే…పే… ఏకం మహాభూతం పటిచ్చ తయో మహాభూతా…పే… ద్వే మహాభూతే…పే… మహాభూతే పటిచ్చ అనిదస్సనం చిత్తసముట్ఠానం రూపం ఉపాదారూపం. (౧)

అనిదస్సనం ధమ్మం పటిచ్చ సనిదస్సనో ధమ్మో ఉప్పజ్జతి అధిపతిపచ్చయా – అనిదస్సనే ఖన్ధే పటిచ్చ సనిదస్సనం చిత్తసముట్ఠానం రూపం, మహాభూతే పటిచ్చ సనిదస్సనం చిత్తసముట్ఠానం రూపం. (౨)

అనిదస్సనం ధమ్మం పటిచ్చ సనిదస్సనో చ అనిదస్సనో చ ధమ్మా ఉప్పజ్జన్తి అధిపతిపచ్చయా – అనిదస్సనం ఏకం ఖన్ధం పటిచ్చ తయో ఖన్ధా సనిదస్సనఞ్చ అనిదస్సనఞ్చ చిత్తసముట్ఠానం రూపం…పే… ద్వే ఖన్ధే…పే… మహాభూతే పటిచ్చ సనిదస్సనఞ్చ అనిదస్సనఞ్చ చిత్తసముట్ఠానం రూపం ఉపాదారూపం. (౩) (సంఖిత్తం, సబ్బే కాతబ్బా.)