౧. విభఙ్గవారో

హేతుపచ్చయో

౨౩౪. కుసలం ధమ్మం సహజాతో కుసలో ధమ్మో ఉప్పజ్జతి హేతుపచ్చయా – కుసలం ఏకం ఖన్ధం సహజాతా తయో ఖన్ధా, తయో ఖన్ధే సహజాతో ఏకో ఖన్ధో, ద్వే ఖన్ధే సహజాతా ద్వే ఖన్ధా. కుసలం ధమ్మం సహజాతో అబ్యాకతో ధమ్మో ఉప్పజ్జతి హేతుపచ్చయా – కుసలే ఖన్ధే సహజాతం చిత్తసముట్ఠానం రూపం. కుసలం ధమ్మం సహజాతో కుసలో చ అబ్యాకతో చ ధమ్మా ఉప్పజ్జన్తి హేతుపచ్చయా – కుసలం ఏకం ఖన్ధం సహజాతా తయో ఖన్ధా చిత్తసముట్ఠానఞ్చ రూపం, తయో ఖన్ధే సహజాతో ఏకో ఖన్ధో చిత్తసముట్ఠానఞ్చ రూపం, ద్వే ఖన్ధే సహజాతా ద్వే ఖన్ధా చిత్తసముట్ఠానఞ్చ రూపం. (౩)

౨౩౫. అకుసలం ధమ్మం సహజాతో అకుసలో ధమ్మో ఉప్పజ్జతి హేతుపచ్చయా – అకుసలం ఏకం ఖన్ధం సహజాతా తయో ఖన్ధా, తయో ఖన్ధే సహజాతో ఏకో ఖన్ధో, ద్వే ఖన్ధే సహజాతా ద్వే ఖన్ధా. అకుసలం ధమ్మం సహజాతో అబ్యాకతో ధమ్మో ఉప్పజ్జతి హేతుపచ్చయా – అకుసలే ఖన్ధే సహజాతం చిత్తసముట్ఠానం రూపం. అకుసలం ధమ్మం సహజాతో అకుసలో చ అబ్యాకతో చ ధమ్మా ఉప్పజ్జన్తి హేతుపచ్చయా – అకుసలం ఏకం ఖన్ధం సహజాతా తయో ఖన్ధా చిత్తసముట్ఠానఞ్చ రూపం, తయో ఖన్ధే సహజాతో ఏకో ఖన్ధో చిత్తసముట్ఠానఞ్చ రూపం, ద్వే ఖన్ధే సహజాతా ద్వే ఖన్ధా చిత్తసముట్ఠానఞ్చ రూపం. (౩)

౨౩౬. అబ్యాకతం ధమ్మం సహజాతో అబ్యాకతో ధమ్మో ఉప్పజ్జతి హేతుపచ్చయా – విపాకాబ్యాకతం కిరియాబ్యాకతం ఏకం ఖన్ధం సహజాతా తయో ఖన్ధా చిత్తసముట్ఠానఞ్చ రూపం, తయో ఖన్ధే సహజాతో ఏకో ఖన్ధో చిత్తసముట్ఠానఞ్చ రూపం, ద్వే ఖన్ధే సహజాతా ద్వే ఖన్ధా చిత్తసముట్ఠానఞ్చ రూపం; పటిసన్ధిక్ఖణే విపాకాబ్యాకతం ఏకం ఖన్ధం సహజాతా తయో ఖన్ధా కటత్తా చ రూపం, తయో ఖన్ధే సహజాతో ఏకో ఖన్ధో కటత్తా చ రూపం, ద్వే ఖన్ధే సహజాతా ద్వే ఖన్ధా కటత్తా చ రూపం; ఖన్ధే సహజాతం వత్థు, వత్థుం సహజాతా ఖన్ధా; ఏకం మహాభూతం సహజాతా తయో మహాభూతా, తయో మహాభూతే సహజాతం ఏకం మహాభూతం, ద్వే మహాభూతే సహజాతా ద్వే మహాభూతా, మహాభూతే సహజాతం చిత్తసముట్ఠానం రూపం కటత్తారూపం ఉపాదారూపం. (౧)

౨౩౭. కుసలఞ్చ అబ్యాకతఞ్చ ధమ్మం సహజాతో అబ్యాకతో ధమ్మో ఉప్పజ్జతి హేతుపచ్చయా – కుసలే ఖన్ధే చ మహాభూతే చ సహజాతం చిత్తసముట్ఠానం రూపం. (౧)

అకుసలఞ్చ అబ్యాకతఞ్చ ధమ్మం సహజాతో అబ్యాకతో ధమ్మో ఉప్పజ్జతి హేతుపచ్చయా – అకుసలే ఖన్ధే చ మహాభూతే చ సహజాతం చిత్తసముట్ఠానం రూపం. (౧)

(యథా పటిచ్చవారే ఏవం విత్థారేతబ్బం.)