౧. పచ్చయానులోమం

౧. విభఙ్గవారో

హేతుపచ్చయో

౪౦౧. కుసలో ధమ్మో కుసలస్స ధమ్మస్స హేతుపచ్చయేన పచ్చయో – కుసలా హేతూ సమ్పయుత్తకానం ఖన్ధానం హేతుపచ్చయేన పచ్చయో. కుసలో ధమ్మో అబ్యాకతస్స ధమ్మస్స హేతుపచ్చయేన పచ్చయో – కుసలా హేతూ చిత్తసముట్ఠానానం రూపానం హేతుపచ్చయేన పచ్చయో. కుసలో ధమ్మో కుసలస్స చ అబ్యాకతస్స చ ధమ్మస్స హేతుపచ్చయేన పచ్చయో – కుసలా హేతూ సమ్పయుత్తకానం ఖన్ధానం చిత్తసముట్ఠానానఞ్చ రూపానం హేతుపచ్చయేన పచ్చయో. (౩)

౪౦౨. అకుసలో ధమ్మో అకుసలస్స ధమ్మస్స హేతుపచ్చయేన పచ్చయో – అకుసలా హేతూ సమ్పయుత్తకానం ఖన్ధానం హేతుపచ్చయేన పచ్చయో. అకుసలో ధమ్మో అబ్యాకతస్స ధమ్మస్స హేతుపచ్చయేన పచ్చయో – అకుసలా హేతూ చిత్తసముట్ఠానానం రూపానం హేతుపచ్చయేన పచ్చయో. అకుసలో ధమ్మో అకుసలస్స చ అబ్యాకతస్స చ ధమ్మస్స హేతుపచ్చయేన పచ్చయో – అకుసలా హేతూ సమ్పయుత్తకానం ఖన్ధానం చిత్తసముట్ఠానానఞ్చ రూపానం హేతుపచ్చయేన పచ్చయో. (౩)

౪౦౩. అబ్యాకతో ధమ్మో అబ్యాకతస్స ధమ్మస్స హేతుపచ్చయేన పచ్చయో – విపాకాబ్యాకతా కిరియాబ్యాకతా హేతూ సమ్పయుత్తకానం ఖన్ధానం చిత్తసముట్ఠానానఞ్చ రూపానం హేతుపచ్చయేన పచ్చయో; పటిసన్ధిక్ఖణే విపాకాబ్యాకతా హేతూ సమ్పయుత్తకానం ఖన్ధానం కటత్తా చ రూపానం హేతుపచ్చయేన పచ్చయో. (౧)

ఆరమ్మణపచ్చయో

౪౦౪. కుసలో ధమ్మో కుసలస్స ధమ్మస్స ఆరమ్మణపచ్చయేన పచ్చయో – దానం దత్వా సీలం సమాదియిత్వా ఉపోసథకమ్మం కత్వా తం పచ్చవేక్ఖతి, పుబ్బే సుచిణ్ణాని పచ్చవేక్ఖతి, ఝానా వుట్ఠహిత్వా ఝానం పచ్చవేక్ఖతి, సేక్ఖా గోత్రభుం పచ్చవేక్ఖన్తి, వోదానం పచ్చవేక్ఖన్తి, సేక్ఖా మగ్గా వుట్ఠహిత్వా మగ్గం పచ్చవేక్ఖన్తి, సేక్ఖా వా పుథుజ్జనా వా కుసలం అనిచ్చతో దుక్ఖతో అనత్తతో విపస్సన్తి, చేతోపరియఞాణేన కుసలచిత్తసమఙ్గిస్స చిత్తం జానన్తి. ఆకాసానఞ్చాయతనకుసలం విఞ్ఞాణఞ్చాయతనకుసలస్స ఆరమ్మణపచ్చయేన పచ్చయో. ఆకిఞ్చఞ్ఞాయతనకుసలం నేవసఞ్ఞానాసఞ్ఞాయతనకుసలస్స ఆరమ్మణపచ్చయేన పచ్చయో. కుసలా ఖన్ధా ఇద్ధివిధఞాణస్స చేతోపరియఞాణస్స పుబ్బేనివాసానుస్సతిఞాణస్స యథాకమ్మూపగఞాణస్స అనాగతంసఞాణస్స ఆరమ్మణపచ్చయేన పచ్చయో. (౧)

౪౦౫. కుసలో ధమ్మో అకుసలస్స ధమ్మస్స ఆరమ్మణపచ్చయేన పచ్చయో – దానం దత్వా సీలం సమాదియిత్వా ఉపోసథకమ్మం కత్వా తం అస్సాదేతి అభినన్దతి; తం ఆరబ్భ రాగో ఉప్పజ్జతి, దిట్ఠి ఉప్పజ్జతి, విచికిచ్ఛా ఉప్పజ్జతి, ఉద్ధచ్చం ఉప్పజ్జతి, దోమనస్సం ఉప్పజ్జతి. పుబ్బే సుచిణ్ణాని అస్సాదేతి అభినన్దతి; తం ఆరబ్భ రాగో ఉప్పజ్జతి, దిట్ఠి ఉప్పజ్జతి, విచికిచ్ఛా ఉప్పజ్జతి, ఉద్ధచ్చం ఉప్పజ్జతి, దోమనస్సం ఉప్పజ్జతి. ఝానా వుట్ఠహిత్వా ఝానం అస్సాదేతి అభినన్దతి; తం ఆరబ్భ రాగో ఉప్పజ్జతి, దిట్ఠి ఉప్పజ్జతి, విచికిచ్ఛా ఉప్పజ్జతి, ఉద్ధచ్చం ఉప్పజ్జతి. ఝానే పరిహీనే విప్పటిసారిస్స దోమనస్సం ఉప్పజ్జతి. (౨)

౪౦౬. కుసలో ధమ్మో అబ్యాకతస్స ధమ్మస్స ఆరమ్మణపచ్చయేన పచ్చయో – అరహా మగ్గా వుట్ఠహిత్వా మగ్గం పచ్చవేక్ఖతి; పుబ్బే సుచిణ్ణాని పచ్చవేక్ఖతి; కుసలం అనిచ్చతో దుక్ఖతో అనత్తతో విప్పస్సతి; చేతోపరియఞాణేన కుసలచిత్తసమఙ్గిస్స చిత్తం జానాతి. సేక్ఖా వా పుథుజ్జనా వా కుసలం అనిచ్చతో దుక్ఖతో అనత్తతో విపస్సన్తి, కుసలే నిరుద్ధే విపాకో తదారమ్మణతా ఉప్పజ్జతి. కుసలం అస్సాదేతి అభినన్దతి; తం ఆరబ్భ రాగో ఉప్పజ్జతి, దిట్ఠి ఉప్పజ్జతి, విచికిచ్ఛా ఉప్పజ్జతి, ఉద్ధచ్చం ఉప్పజ్జతి, దోమనస్సం ఉప్పజ్జతి, అకుసలే నిరుద్ధే విపాకో తదారమ్మణతా ఉప్పజ్జతి. ఆకాసానఞ్చాయతనకుసలం విఞ్ఞాణఞ్చాయతనవిపాకస్స చ, కిరియస్స చ ఆరమ్మణపచ్చయేన పచ్చయో. ఆకిఞ్చఞ్ఞాయతనకుసలం నేవసఞ్ఞానాసఞ్ఞాయతనవిపాకస్స చ, కిరియస్స చ ఆరమ్మణపచ్చయేన పచ్చయో. కుసలా ఖన్ధా చేతోపరియఞాణస్స, పుబ్బేనివాసానుస్సతిఞాణస్స, యథాకమ్మూపగఞాణస్స, అనాగతంసఞాణస్స, ఆవజ్జనాయ ఆరమ్మణపచ్చయేన పచ్చయో. (౩)

౪౦౭. అకుసలో ధమ్మో అకుసలస్స ధమ్మస్స ఆరమ్మణపచ్చయేన పచ్చయో – రాగం అస్సాదేతి అభినన్దతి; తం ఆరబ్భ రాగో ఉప్పజ్జతి, దిట్ఠి ఉప్పజ్జతి, విచికిచ్ఛా ఉప్పజ్జతి, ఉద్ధచ్చం ఉప్పజ్జతి, దోమనస్సం ఉప్పజ్జతి. దిట్ఠిం అస్సాదేతి అభినన్దతి; తం ఆరబ్భ రాగో ఉప్పజ్జతి, దిట్ఠి ఉప్పజ్జతి, విచికిచ్ఛా ఉప్పజ్జతి, ఉద్ధచ్చం ఉప్పజ్జతి, దోమనస్సం ఉప్పజ్జతి. విచికిచ్ఛం ఆరబ్భ విచికిచ్ఛా ఉప్పజ్జతి, దిట్ఠి ఉప్పజ్జతి, ఉద్ధచ్చం ఉప్పజ్జతి, దోమనస్సం ఉప్పజ్జతి. ఉద్ధచ్చం ఆరబ్భ ఉద్ధచ్చం ఉప్పజ్జతి, దిట్ఠి ఉప్పజ్జతి, విచికిచ్ఛా ఉప్పజ్జతి, దోమనస్సం ఉప్పజ్జతి. దోమనస్సం ఆరబ్భ దోమనస్సం ఉప్పజ్జతి, దిట్ఠి ఉప్పజ్జతి, విచికిచ్ఛా ఉప్పజ్జతి, ఉద్ధచ్చం ఉప్పజ్జతి. (౧)

౪౦౮. అకుసలో ధమ్మో కుసలస్స ధమ్మస్స ఆరమ్మణపచ్చయేన పచ్చయో – సేక్ఖా పహీనే కిలేసే [పహీనకిలేసే (స్యా.)] పచ్చవేక్ఖన్తి, విక్ఖమ్భితే కిలేసే [విక్ఖమ్భితకిలేసే (స్యా.)] పచ్చవేక్ఖన్తి, పుబ్బే సముదాచిణ్ణే కిలేసే జానన్తి, సేక్ఖా వా పుథుజ్జనా వా అకుసలం అనిచ్చతో దుక్ఖతో అనత్తతో విపస్సన్తి, చేతోపరియఞాణేన అకుసలచిత్తసమఙ్గిస్స చిత్తం జానన్తి. అకుసలా ఖన్ధా చేతోపరియఞాణస్స, పుబ్బేనివాసానుస్సతిఞాణస్స, యథాకమ్మూపగఞాణస్స అనాగతంసఞాణస్స ఆరమ్మణపచ్చయేన పచ్చయో. (౨)

౪౦౯. అకుసలో ధమ్మో అబ్యాకతస్స ధమ్మస్స ఆరమ్మణపచ్చయేన పచ్చయో – అరహా పహీనే కిలేసే పచ్చవేక్ఖతి, పుబ్బే సముదాచిణ్ణే కిలేసే జానాతి, అకుసలం అనిచ్చతో దుక్ఖతో అనత్తతో విపస్సతి, చేతోపరియఞాణేన అకుసలచిత్తసమఙ్గిస్స చిత్తం జానాతి, సేక్ఖా వా పుథుజ్జనా వా అకుసలం అనిచ్చతో దుక్ఖతో అనత్తతో విపస్సన్తి, కుసలే నిరుద్ధే విపాకో తదారమ్మణతా ఉప్పజ్జతి. అకుసలం అస్సాదేతి అభినన్దతి; తం ఆరబ్భ రాగో ఉప్పజ్జతి, దిట్ఠి ఉప్పజ్జతి, విచికిచ్ఛా ఉప్పజ్జతి, ఉద్ధచ్చం ఉప్పజ్జతి, దోమనస్సం ఉప్పజ్జతి. అకుసలే నిరుద్ధే విపాకో తదారమ్మణతా ఉప్పజ్జతి. అకుసలా ఖన్ధా చేతోపరియఞాణస్స పుబ్బేనివాసానుస్సతిఞాణస్స యథాకమ్మూపగఞాణస్స అనాగతంసఞాణస్స ఆవజ్జనాయ ఆరమ్మణపచ్చయేన పచ్చయో. (౩)

౪౧౦. అబ్యాకతో ధమ్మో అబ్యాకతస్స ధమ్మస్స ఆరమ్మణపచ్చయేన పచ్చయో – అరహా ఫలం పచ్చవేక్ఖతి, నిబ్బానం పచ్చవేక్ఖతి. నిబ్బానం ఫలస్స ఆవజ్జనాయ ఆరమ్మణపచ్చయేన పచ్చయో. అరహా చక్ఖుం అనిచ్చతో దుక్ఖతో అనత్తతో విపస్సతి. సోతం… ఘానం… జివ్హం… కాయం… రూపే… సద్దే… గన్ధే… రసే… ఫోట్ఠబ్బే… వత్థుం… విపాకాబ్యాకతే కిరియాబ్యాకతే ఖన్ధే అనిచ్చతో దుక్ఖతో అనత్తతో విపస్సతి, దిబ్బేన చక్ఖునా రూపం పస్సతి, దిబ్బాయ సోతధాతుయా సద్దం సుణాతి, చేతోపరియఞాణేన విపాకాబ్యాకతకిరియాబ్యాకతచిత్తసమఙ్గిస్స చిత్తం జానాతి. ఆకాసానఞ్చాయతనకిరియం విఞ్ఞాణఞ్చాయతనకిరియస్స ఆరమ్మణపచ్చయేన పచ్చయో. ఆకిఞ్చఞ్ఞాయతనకిరియం నేవసఞ్ఞానాసఞ్ఞాయతనకిరియస్స ఆరమ్మణపచ్చయేన పచ్చయో. రూపాయతనం చక్ఖువిఞ్ఞాణస్స ఆరమ్మణపచ్చయేన పచ్చయో. సద్దాయతనం సోతవిఞ్ఞాణస్స… గన్ధాయతనం ఘానవిఞ్ఞాణస్స… రసాయతనం జివ్హావిఞ్ఞాణస్స … ఫోట్ఠబ్బాయతనం కాయవిఞ్ఞాణస్స ఆరమ్మణపచ్చయేన పచ్చయో. అబ్యాకతా ఖన్ధా ఇద్ధివిధఞాణస్స, చేతోపరియఞాణస్స, పుబ్బేనివాసానుస్సతిఞాణస్స, అనాగతంసఞాణస్స, ఆవజ్జనాయ ఆరమ్మణపచ్చయేన పచ్చయో. (౧)

౪౧౧. అబ్యాకతో ధమ్మో కుసలస్స ధమ్మస్స ఆరమ్మణపచ్చయేన పచ్చయో – సేక్ఖా ఫలం పచ్చవేక్ఖన్తి, నిబ్బానం పచ్చవేక్ఖన్తి. నిబ్బానం గోత్రభుస్స వోదానస్స మగ్గస్స ఆరమ్మణపచ్చయేన పచ్చయో. సేక్ఖా వా పుథుజ్జనా వా చక్ఖుం అనిచ్చతో దుక్ఖతో అనత్తతో విప్పస్సన్తి. సోతం… ఘానం… జివ్హం… కాయం… రూపే… సద్దే… గన్ధే… రసే… ఫోట్ఠబ్బే… వత్థుం… విపాకాబ్యాకతే కిరియాబ్యాకతే ఖన్ధే అనిచ్చతో దుక్ఖతో అనత్తతో విపస్సన్తి, దిబ్బేన చక్ఖునా రూపం పస్సన్తి, దిబ్బాయ సోతధాతుయా సద్దం సుణన్తి, చేతోపరియఞాణేన విపాకాబ్యాకతకిరియాబ్యాకతచిత్తసమఙ్గిస్స చిత్తం జానన్తి. అబ్యాకతా ఖన్ధా ఇద్ధివిధఞాణస్స చేతోపరియఞాణస్స పుబ్బేనివాసానుస్సతిఞాణస్స అనాగతంసఞాణస్స ఆరమ్మణపచ్చయేన పచ్చయో.

౪౧౨. అబ్యాకతో ధమ్మో అకుసలస్స ధమ్మస్స ఆరమ్మణపచ్చయేన పచ్చయో – చక్ఖుం అస్సాదేతి అభినన్దతి; తం ఆరబ్భ రాగో ఉప్పజ్జతి, దిట్ఠి ఉప్పజ్జతి, విచికిచ్ఛా ఉప్పజ్జతి, ఉద్ధచ్చం ఉప్పజ్జతి, దోమనస్సం ఉప్పజ్జతి. సోతం… ఘానం… జివ్హం… కాయం… రూపే… సద్దే… గన్ధే… రసే… ఫోట్ఠబ్బే… వత్థుం… విపాకాబ్యాకతే కిరియాబ్యాకతే ఖన్ధే అస్సాదేతి అభినన్దతి; తం ఆరబ్భ రాగో ఉప్పజ్జతి, దిట్ఠి ఉప్పజ్జతి, విచికిచ్ఛా ఉప్పజ్జతి, ఉద్ధచ్చం ఉప్పజ్జతి, దోమనస్సం ఉప్పజ్జతి. (౩)

అధిపతిపచ్చయో

౪౧౩. కుసలో ధమ్మో కుసలస్స ధమ్మస్స అధిపతిపచ్చయేన పచ్చయో. ఆరమ్మణాధిపతి, సహజాతాధిపతి. ఆరమ్మణాధిపతి – దానం దత్వా సీలం సమాదియిత్వా ఉపోసథకమ్మం కత్వా, తం గరుం కత్వా పచ్చవేక్ఖతి, పుబ్బే సుచిణ్ణాని గరుం కత్వా పచ్చవేక్ఖతి, ఝానా వుట్ఠహిత్వా ఝానం గరుం కత్వా పచ్చవేక్ఖతి. సేక్ఖా గోత్రభుం గరుం కత్వా పచ్చవేక్ఖన్తి, వోదానం గరుం కత్వా పచ్చవేక్ఖన్తి. సేక్ఖా మగ్గా వుట్ఠహిత్వా మగ్గం గరుం కత్వా పచ్చవేక్ఖన్తి. సహజాతాధిపతి – కుసలాధిపతి సమ్పయుత్తకానం ఖన్ధానం అధిపతిపచ్చయేన పచ్చయో. (౧)

౪౧౪. కుసలో ధమ్మో అకుసలస్స ధమ్మస్స అధిపతిపచ్చయేన పచ్చయో. ఆరమ్మణాధిపతి – దానం దత్వా సీలం సమాదియిత్వా ఉపోసథకమ్మం కత్వా, తం గరుం కత్వా అస్సాదేతి అభినన్దతి; తం గరుం కత్వా రాగో ఉప్పజ్జతి, దిట్ఠి ఉప్పజ్జతి, పుబ్బే సుచిణ్ణాని గరుం కత్వా అస్సాదేతి అభినన్దతి; తం గరుం కత్వా రాగో ఉప్పజ్జతి, దిట్ఠి ఉప్పజ్జతి. ఝానా వుట్ఠహిత్వా ఝానం గరుం కత్వా అస్సాదేతి అభినన్దతి; తం గరుం కత్వా రాగో ఉప్పజ్జతి, దిట్ఠి ఉప్పజ్జతి.

కుసలో ధమ్మో అబ్యాకతస్స ధమ్మస్స అధిపతిపచ్చయేన పచ్చయో. ఆరమ్మణాధిపతి, సహజాతాధిపతి. ఆరమ్మణాధిపతి – అరహా మగ్గా వుట్ఠహిత్వా మగ్గం గరుం కత్వా పచ్చవేక్ఖతి. సహజాతాధిపతి – కుసలాధిపతి చిత్తసముట్ఠానానం రూపానం అధిపతిపచ్చయేన పచ్చయో. (౩)

కుసలో ధమ్మో కుసలస్స చ అబ్యాకతస్స చ ధమ్మస్స అధిపతిపచ్చయేన పచ్చయో. సహజాతాధిపతి – కుసలాధిపతి సమ్పయుత్తకానం ఖన్ధానం చిత్తసముట్ఠానానఞ్చ రూపానం అధిపతిపచ్చయేన పచ్చయో. (౪)

౪౧౫. అకుసలో ధమ్మో అకుసలస్స ధమ్మస్స అధిపతిపచ్చయేన పచ్చయో. ఆరమ్మణాధిపతి, సహజాతాధిపతి. ఆరమ్మణాధిపతి – రాగం గరుం కత్వా అస్సాదేతి అభినన్దతి; తం గరుం కత్వా రాగో ఉప్పజ్జతి, దిట్ఠి ఉప్పజ్జతి. దిట్ఠిం గరుం కత్వా అస్సాదేతి అభినన్దతి; తం గరుం కత్వా రాగో ఉప్పజ్జతి, దిట్ఠి ఉప్పజ్జతి. సహజాతాధిపతి – అకుసలాధిపతి సమ్పయుత్తకానం ఖన్ధానం అధిపతిపచ్చయేన పచ్చయో. (౧)

అకుసలో ధమ్మో అబ్యాకతస్స ధమ్మస్స అధిపతిపచ్చయేన పచ్చయో. సహజాతాధిపతి – అకుసలాధిపతి చిత్తసముట్ఠానానం రూపానం అధిపతిపచ్చయేన పచ్చయో. (౨)

అకుసలో ధమ్మో అకుసలస్స చ అబ్యాకతస్స చ ధమ్మస్స అధిపతి పచ్చయేన పచ్చయో. సహజాతాధిపతి – అకుసలాధిపతి సమ్పయుత్తకానం ఖన్ధానం చిత్తసముట్ఠానానఞ్చ రూపానం అధిపతిపచ్చయేన పచ్చయో. (౩)

౪౧౬. అబ్యాకతో ధమ్మో అబ్యాకతస్స ధమ్మస్స అధిపతిపచ్చయేన పచ్చయో. ఆరమ్మణాధిపతి, సహజాతాధిపతి. ఆరమ్మణాధిపతి – అరహా ఫలం గరుం కత్వా పచ్చవేక్ఖతి, నిబ్బానం గరుం కత్వా పచ్చవేక్ఖతి. నిబ్బానం ఫలస్స అధిపతిపచ్చయేన పచ్చయో. సహజాతాధిపతి – విపాకాబ్యాకతకిరియాబ్యాకతాధిపతి సమ్పయుత్తకానం ఖన్ధానం చిత్తసముట్ఠానానఞ్చ రూపానం అధిపతిపచ్చయేన పచ్చయో. (౧)

అబ్యాకతో ధమ్మో కుసలస్స ధమ్మస్స అధిపతిపచ్చయేన పచ్చయో. ఆరమ్మణాధిపతి – సేక్ఖా ఫలం గరుం కత్వా పచ్చవేక్ఖన్తి, నిబ్బానం గరుం కత్వా పచ్చవేక్ఖన్తి. నిబ్బానం గోత్రభుస్స, వోదానస్స, మగ్గస్స అధిపతిపచ్చయేన పచ్చయో. (౨)

అబ్యాకతో ధమ్మో అకుసలస్స ధమ్మస్స అధిపతిపచ్చయేన పచ్చయో. ఆరమ్మణాధిపతి – చక్ఖుం గరుం కత్వా అస్సాదేతి అభినన్దతి; తం గరుం కత్వా రాగో ఉప్పజ్జతి, దిట్ఠి ఉప్పజ్జతి. సోతం… ఘానం… జివ్హం… కాయం… రూపే… సద్దే… గన్ధే… రసే… ఫోట్ఠబ్బే… వత్థుం… విపాకాబ్యాకతే కిరియాబ్యాకతే ఖన్ధే గరుం కత్వా అస్సాదేతి అభినన్దతి; తం గరుం కత్వా రాగో ఉప్పజ్జతి, దిట్ఠి ఉప్పజ్జతి. (౩)

అనన్తరపచ్చయో

౪౧౭. కుసలో ధమ్మో కుసలస్స ధమ్మస్స అనన్తరపచ్చయేన పచ్చయో – పురిమా పురిమా కుసలా ఖన్ధా పచ్ఛిమానం పచ్ఛిమానం కుసలానం ఖన్ధానం అనన్తరపచ్చయేన పచ్చయో. అనులోమం గోత్రభుస్స… అనులోమం వోదానస్స… గోత్రభు మగ్గస్స… వోదానం మగ్గస్స అనన్తరపచ్చయేన పచ్చయో. (౧)

కుసలో ధమ్మో అబ్యాకతస్స ధమ్మస్స అనన్తరపచ్చయేన పచ్చయో. కుసలం వుట్ఠానస్స… మగ్గో ఫలస్స… అనులోమం సేక్ఖాయ ఫలసమాపత్తియా… నిరోధా వుట్ఠహన్తస్స నేవసఞ్ఞానాసఞ్ఞాయతనకుసలం ఫలసమాపత్తియా అనన్తరపచ్చయేన పచ్చయో. (౨)

అకుసలో ధమ్మో అకుసలస్స ధమ్మస్స అనన్తరపచ్చయేన పచ్చయో – పురిమా పురిమా అకుసలా ఖన్ధా పచ్ఛిమానం పచ్ఛిమానం అకుసలానం ఖన్ధానం అనన్తరపచ్చయేన పచ్చయో. (౧)

అకుసలో ధమ్మో అబ్యాకతస్స ధమ్మస్స అనన్తరపచ్చయేన పచ్చయో. అకుసలం వుట్ఠానస్స అనన్తరపచ్చయేన పచ్చయో. (౨)

అబ్యాకతో ధమ్మో అబ్యాకతస్స ధమ్మస్స అనన్తరపచ్చయేన పచ్చయో – పురిమా పురిమా విపాకాబ్యాకతా కిరియాబ్యాకతా ఖన్ధా పచ్ఛిమానం పచ్ఛిమానం విపాకాబ్యాకతానం కిరియాబ్యాకతానం ఖన్ధానం అనన్తరపచ్చయేన పచ్చయో. భవఙ్గం ఆవజ్జనాయ… కిరియం వుట్ఠానస్స… అరహతో అనులోమం ఫలసమాపత్తియా… నిరోధా వుట్ఠహన్తస్స నేవసఞ్ఞానాసఞ్ఞాయతనకిరియం ఫలసమాపత్తియా అనన్తరపచ్చయేన పచ్చయో. (౧)

అబ్యాకతో ధమ్మో కుసలస్స ధమ్మస్స అనన్తరపచ్చయేన పచ్చయో – ఆవజ్జనా కుసలానం ఖన్ధానం అనన్తరపచ్చయేన పచ్చయో. (౨)

అబ్యాకతో ధమ్మో అకుసలస్స ధమ్మస్స అనన్తరపచ్చయేన పచ్చయో – ఆవజ్జనా అకుసలానం ఖన్ధానం అనన్తరపచ్చయేన పచ్చయో. (౩)

సమనన్తరపచ్చయో

౪౧౮. కుసలో ధమ్మో కుసలస్స ధమ్మస్స సమనన్తరపచ్చయేన పచ్చయో – పురిమా పురిమా కుసలా ఖన్ధా పచ్ఛిమానం పచ్ఛిమానం కుసలానం ఖన్ధానం సమనన్తరపచ్చయేన పచ్చయో. అనులోమం గోత్రభుస్స… అనులోమం వోదానస్స… గోత్రభు మగ్గస్స… వోదానం మగ్గస్స సమనన్తరపచ్చయేన పచ్చయో.

కుసలో ధమ్మో అబ్యాకతస్స ధమ్మస్స సమనన్తరపచ్చయేన పచ్చయో. కుసలం వుట్ఠానస్స… మగ్గో ఫలస్స… అనులోమం సేక్ఖాయ ఫలసమాపత్తియా… నిరోధా వుట్ఠహన్తస్స నేవసఞ్ఞానాసఞ్ఞాయతనకుసలం ఫలసమాపత్తియా సమనన్తరపచ్చయేన పచ్చయో. (౨)

అకుసలో ధమ్మో అకుసలస్స ధమ్మస్స సమనన్తరపచ్చయేన పచ్చయో – పురిమా పురిమా అకుసలా ఖన్ధా పచ్ఛిమానం పచ్ఛిమానం అకుసలానం ఖన్ధానం సమనన్తరపచ్చయేన పచ్చయో. (౧)

అకుసలో ధమ్మో అబ్యాకతస్స ధమ్మస్స సమనన్తరపచ్చయేన పచ్చయో – అకుసలం వుట్ఠానస్స సమనన్తరపచ్చయేన పచ్చయో. (౨)

అబ్యాకతో ధమ్మో అబ్యాకతస్స ధమ్మస్స సమనన్తరపచ్చయేన పచ్చయో – పురిమా పురిమా విపాకాబ్యాకతా కిరియాబ్యాకతా ఖన్ధా పచ్ఛిమానం పచ్ఛిమానం విపాకాబ్యాకతానం కిరియాబ్యాకతానం ఖన్ధానం సమనన్తరపచ్చయేన పచ్చయో. భవఙ్గం ఆవజ్జనాయ… కిరియం వుట్ఠానస్స… అరహతో అనులోమం ఫలసమాపత్తియా… నిరోధా వుట్ఠహన్తస్స నేవసఞ్ఞానాసఞ్ఞాయతనకిరియం ఫలసమాపత్తియా సమనన్తరపచ్చయేన పచ్చయో. (౧)

అబ్యాకతో ధమ్మో కుసలస్స ధమ్మస్స సమనన్తరపచ్చయేన పచ్చయో – ఆవజ్జనా కుసలానం ఖన్ధానం సమనన్తరపచ్చయేన పచ్చయో. (౨)

అబ్యాకతో ధమ్మో అకుసలస్స ధమ్మస్స సమనన్తరపచ్చయేన పచ్చయో – ఆవజ్జనా అకుసలానం ఖన్ధానం సమనన్తరపచ్చయేన పచ్చయో. (౩)

సహజాతపచ్చయో

౪౧౯. కుసలో ధమ్మో కుసలస్స ధమ్మస్స సహజాతపచ్చయేన పచ్చయో – కుసలో ఏకో ఖన్ధో తిణ్ణన్నం ఖన్ధానం సహజాతపచ్చయేన పచ్చయో. తయో ఖన్ధా ఏకస్స ఖన్ధస్స సహజాతపచ్చయేన పచ్చయో. ద్వే ఖన్ధా ద్విన్నం ఖన్ధానం సహజాతపచ్చయేన పచ్చయో. (౧)

కుసలో ధమ్మో అబ్యాకతస్స ధమ్మస్స సహజాతపచ్చయేన పచ్చయో – కుసలా ఖన్ధా చిత్తసముట్ఠానానం రూపానం సహజాతపచ్చయేన పచ్చయో. (౨)

కుసలో ధమ్మో కుసలస్స చ అబ్యాకతస్స చ ధమ్మస్స సహజాతపచ్చయేన పచ్చయో – కుసలో ఏకో ఖన్ధో తిణ్ణన్నం ఖన్ధానం చిత్తసముట్ఠానానఞ్చ రూపానం సహజాతపచ్చయేన పచ్చయో. తయో ఖన్ధా ఏకస్స ఖన్ధస్స చిత్తసముట్ఠానానఞ్చ రూపానం సహజాతపచ్చయేన పచ్చయో. ద్వే ఖన్ధా ద్విన్నం ఖన్ధానం చిత్తసముట్ఠానానఞ్చ రూపానం సహజాతపచ్చయేన పచ్చయో. (౩)

అకుసలో ధమ్మో అకుసలస్స ధమ్మస్స సహజాతపచ్చయేన పచ్చయో – అకుసలో ఏకో ఖన్ధో తిణ్ణన్నం ఖన్ధానం సహజాతపచ్చయేన పచ్చయో. తయో ఖన్ధా ఏకస్స ఖన్ధస్స సహజాతపచ్చయేన పచ్చయో. ద్వే ఖన్ధా ద్విన్నం ఖన్ధానం సహజాతపచ్చయేన పచ్చయో. (౧)

అకుసలో ధమ్మో అబ్యాకతస్స ధమ్మస్స సహజాతపచ్చయేన పచ్చయో – అకుసలా ఖన్ధా చిత్తసముట్ఠానానం రూపానం సహజాతపచ్చయేన పచ్చయో. (౨)

అకుసలో ధమ్మో అకుసలస్స చ అబ్యాకతస్స చ ధమ్మస్స సహజాతపచ్చయేన పచ్చయో – అకుసలో ఏకో ఖన్ధో తిణ్ణన్నం ఖన్ధానం చిత్తసముట్ఠానానఞ్చ రూపానం సహజాతపచ్చయేన పచ్చయో. తయో ఖన్ధా ఏకస్స ఖన్ధస్స చిత్తసముట్ఠానానఞ్చ రూపానం సహజాతపచ్చయేన పచ్చయో. ద్వే ఖన్ధా ద్విన్నం ఖన్ధానం చిత్తసముట్ఠానానఞ్చ రూపానం సహజాతపచ్చయేన పచ్చయో. (౩)

అబ్యాకతో ధమ్మో అబ్యాకతస్స ధమ్మస్స సహజాతపచ్చయేన పచ్చయో – విపాకాబ్యాకతో కిరియాబ్యాకతో ఏకో ఖన్ధో తిణ్ణన్నం ఖన్ధానం చిత్తసముట్ఠానానఞ్చ రూపానం సహజాతపచ్చయేన పచ్చయో. తయో ఖన్ధా ఏకస్స ఖన్ధస్స చిత్తసముట్ఠానానఞ్చ రూపానం సహజాతపచ్చయేన పచ్చయో. ద్వే ఖన్ధా ద్విన్నం ఖన్ధానం చిత్తసముట్ఠానానఞ్చ రూపానం సహజాతపచ్చయేన పచ్చయో. పటిసన్ధిక్ఖణే విపాకాబ్యాకతో ఏకో ఖన్ధో తిణ్ణన్నం ఖన్ధానం కటత్తా చ రూపానం సహజాతపచ్చయేన పచ్చయో. తయో ఖన్ధా ఏకస్స ఖన్ధస్స కటత్తా చ రూపానం సహజాతపచ్చయేన పచ్చయో. ద్వే ఖన్ధా ద్విన్నం ఖన్ధానం కటత్తా చ రూపానం సహజాతపచ్చయేన పచ్చయో. ఖన్ధా వత్థుస్స సహజాతపచ్చయేన పచ్చయో. వత్థు ఖన్ధానం సహజాతపచ్చయేన పచ్చయో. ఏకం మహాభూతం తిణ్ణన్నం మహాభూతానం సహజాతపచ్చయేన పచ్చయో. తయో మహాభూతా ఏకస్స మహాభూతస్స సహజాతపచ్చయేన పచ్చయో. ద్వే మహాభూతా ద్విన్నం మహాభూతానం సహజాతపచ్చయేన పచ్చయో. మహాభూతా చిత్తసముట్ఠానానం రూపానం కటత్తారూపానం ఉపాదారూపానం సహజాతపచ్చయేన పచ్చయో. బాహిరం ఏకం మహాభూతం తిణ్ణన్నం మహాభూతానం సహజాతపచ్చయేన పచ్చయో. తయో మహాభూతా ఏకస్స మహాభూతస్స సహజాతపచ్చయేన పచ్చయో. ద్వే మహాభూతా ద్విన్నం మహాభూతానం సహజాతపచ్చయేన పచ్చయో. మహాభూతా ఉపాదారూపానం సహజాతపచ్చయేన పచ్చయో. ఆహారసముట్ఠానం ఏకం మహాభూతం తిణ్ణన్నం మహాభూతానం సహజాతపచ్చయేన పచ్చయో. తయో మహాభూతా ఏకస్స మహాభూతస్స సహజాతపచ్చయేన పచ్చయో. ద్వే మహాభూతా ద్విన్నం మహాభూతానం సహజాతపచ్చయేన పచ్చయో. మహాభూతా ఉపాదారూపానం సహజాతపచ్చయేన పచ్చయో. ఉతుసముట్ఠానం ఏకం మహాభూతం తిణ్ణన్నం మహాభూతానం సహజాతపచ్చయేన పచ్చయో. తయో మహాభూతా ఏకస్స మహాభూతస్స సహజాతపచ్చయేన పచ్చయో. ద్వే మహాభూతా ద్విన్నం మహాభూతానం సహజాతపచ్చయేన పచ్చయో. మహాభూతా ఉపాదారూపానం సహజాతపచ్చయేన పచ్చయో. అసఞ్ఞసత్తానం ఏకం మహాభూతం తిణ్ణన్నం మహాభూతానం సహజాతపచ్చయేన పచ్చయో. తయో మహాభూతా ఏకస్స మహాభూతస్స సహజాతపచ్చయేన పచ్చయో. ద్వే మహాభూతా ద్విన్నం మహాభూతానం సహజాతపచ్చయేన పచ్చయో. మహాభూతా కటత్తారూపానం ఉపాదారూపానం సహజాతపచ్చయేన పచ్చయో. (౧)

కుసలో చ అబ్యాకతో చ ధమ్మా అబ్యాకతస్స ధమ్మస్స సహజాతపచ్చయేన పచ్చయో – కుసలా ఖన్ధా చ మహాభూతా చ చిత్తసముట్ఠానానం రూపానం సహజాతపచ్చయేన పచ్చయో. (౧)

అకుసలో చ అబ్యాకతో చ ధమ్మా అబ్యాకతస్స ధమ్మస్స సహజాతపచ్చయేన పచ్చయో – అకుసలా ఖన్ధా చ మహాభూతా చ చిత్తసముట్ఠానానం రూపానం సహజాతపచ్చయేన పచ్చయో. (౧)

అఞ్ఞమఞ్ఞపచ్చయో

౪౨౦. కుసలో ధమ్మో కుసలస్స ధమ్మస్స అఞ్ఞమఞ్ఞపచ్చయేన పచ్చయో – కుసలో ఏకో ఖన్ధో తిణ్ణన్నం ఖన్ధానం అఞ్ఞమఞ్ఞపచ్చయేన పచ్చయో. తయో ఖన్ధా ఏకస్స ఖన్ధస్స అఞ్ఞమఞ్ఞపచ్చయేన పచ్చయో. ద్వే ఖన్ధా ద్విన్నం ఖన్ధానం అఞ్ఞమఞ్ఞపచ్చయేన పచ్చయో. (౧)

అకుసలో ధమ్మో అకుసలస్స ధమ్మస్స అఞ్ఞమఞ్ఞపచ్చయేన పచ్చయో – అకుసలో ఏకో ఖన్ధో తిణ్ణన్నం ఖన్ధానం అఞ్ఞమఞ్ఞపచ్చయేన పచ్చయో. తయో ఖన్ధా ఏకస్స ఖన్ధస్స అఞ్ఞమఞ్ఞపచ్చయేన పచ్చయో. ద్వే ఖన్ధా ద్విన్నం ఖన్ధానం అఞ్ఞమఞ్ఞపచ్చయేన పచ్చయో. (౧)

అబ్యాకతో ధమ్మో అబ్యాకతస్స ధమ్మస్స అఞ్ఞమఞ్ఞపచ్చయేన పచ్చయో – విపాకాబ్యాకతో కిరియాబ్యాకతో ఏకో ఖన్ధో తిణ్ణన్నం ఖన్ధానం అఞ్ఞమఞ్ఞపచ్చయేన పచ్చయో. తయో ఖన్ధా ఏకస్స ఖన్ధస్స అఞ్ఞమఞ్ఞపచ్చయేన పచ్చయో. ద్వే ఖన్ధా ద్విన్నం ఖన్ధానం అఞ్ఞమఞ్ఞపచ్చయేన పచ్చయో. పటిసన్ధిక్ఖణే విపాకాబ్యాకతో ఏకో ఖన్ధో తిణ్ణన్నం ఖన్ధానం వత్థుస్స చ అఞ్ఞమఞ్ఞపచ్చయేన పచ్చయో. తయో ఖన్ధా ఏకస్స ఖన్ధస్స వత్థుస్స చ అఞ్ఞమఞ్ఞపచ్చయేన పచ్చయో. ద్వే ఖన్ధా ద్విన్నం ఖన్ధానం వత్థుస్స చ అఞ్ఞమఞ్ఞపచ్చయేన పచ్చయో. ఖన్ధా వత్థుస్స అఞ్ఞమఞ్ఞపచ్చయేన పచ్చయో. వత్థు ఖన్ధానం అఞ్ఞమఞ్ఞపచ్చయేన పచ్చయో. ఏకం మహాభూతం తిణ్ణన్నం మహాభూతానం అఞ్ఞమఞ్ఞపచ్చయేన పచ్చయో. తయో మహాభూతా ఏకస్స మహాభూతస్స అఞ్ఞమఞ్ఞపచ్చయేన పచ్చయో. ద్వే మహాభూతా ద్విన్నం మహాభూతానం అఞ్ఞమఞ్ఞపచ్చయేన పచ్చయో; బాహిరం… ఆహారసముట్ఠానం… ఉతుసముట్ఠానం… అసఞ్ఞసత్తానం ఏకం మహాభూతం తిణ్ణన్నం మహాభూతానం అఞ్ఞమఞ్ఞపచ్చయేన పచ్చయో…పే… ద్వే మహాభూతా ద్విన్నం మహాభూతానం అఞ్ఞమఞ్ఞపచ్చయేన పచ్చయో. (౧)

నిస్సయపచ్చయో

౪౨౧. కుసలో ధమ్మో కుసలస్స ధమ్మస్స నిస్సయపచ్చయేన పచ్చయో – కుసలో ఏకో ఖన్ధో తిణ్ణన్నం ఖన్ధానం నిస్సయపచ్చయేన పచ్చయో. తయో ఖన్ధా ఏకస్స ఖన్ధస్స నిస్సయపచ్చయేన పచ్చయో. ద్వే ఖన్ధా ద్విన్నం ఖన్ధానం నిస్సయపచ్చయేన పచ్చయో. (౧)

కుసలో ధమ్మో అబ్యాకతస్స ధమ్మస్స నిస్సయపచ్చయేన పచ్చయో – కుసలా ఖన్ధా చిత్తసముట్ఠానానం రూపానం నిస్సయపచ్చయేన పచ్చయో. (౨)

కుసలో ధమ్మో కుసలస్స చ అబ్యాకతస్స చ ధమ్మస్స నిస్సయపచ్చయేన పచ్చయో – కుసలో ఏకో ఖన్ధో తిణ్ణన్నం ఖన్ధానం చిత్తసముట్ఠానానఞ్చ రూపానం నిస్సయపచ్చయేన పచ్చయో. తయో ఖన్ధా ఏకస్స ఖన్ధస్స చిత్తసముట్ఠానానఞ్చ రూపానం నిస్సయపచ్చయేన పచ్చయో. ద్వే ఖన్ధా ద్విన్నం ఖన్ధానం చిత్తసముట్ఠానానఞ్చ రూపానం నిస్సయపచ్చయేన పచ్చయో. (౩)

అకుసలో ధమ్మో అకుసలస్స ధమ్మస్స నిస్సయపచ్చయేన పచ్చయో – అకుసలో ఏకో ఖన్ధో తిణ్ణన్నం ఖన్ధానం నిస్సయపచ్చయేన పచ్చయో. తయో ఖన్ధా ఏకస్స ఖన్ధస్స నిస్సయపచ్చయేన పచ్చయో. ద్వే ఖన్ధా ద్విన్నం ఖన్ధానం నిస్సయపచ్చయేన పచ్చయో. (౧)

అకుసలో ధమ్మో అబ్యాకతస్స ధమ్మస్స నిస్సయపచ్చయేన పచ్చయో – అకుసలా ఖన్ధా చిత్తసముట్ఠానానం రూపానం నిస్సయపచ్చయేన పచ్చయో. (౨)

అకుసలో ధమ్మో అకుసలస్స చ అబ్యాకతస్స చ ధమ్మస్స నిస్సయపచ్చయేన పచ్చయో – అకుసలో ఏకో ఖన్ధో తిణ్ణన్నం ఖన్ధానం చిత్తసముట్ఠానానఞ్చ రూపానం నిస్సయపచ్చయేన పచ్చయో. తయో ఖన్ధా ఏకస్స ఖన్ధస్స చిత్తసముట్ఠానానఞ్చ రూపానం నిస్సయపచ్చయేన పచ్చయో. ద్వే ఖన్ధా ద్విన్నం ఖన్ధానం చిత్తసముట్ఠానానఞ్చ రూపానం నిస్సయపచ్చయేన పచ్చయో. (౩)

అబ్యాకతో ధమ్మో అబ్యాకతస్స ధమ్మస్స నిస్సయపచ్చయేన పచ్చయో – విపాకాబ్యాకతో కిరియాబ్యాకతో ఏకో ఖన్ధో తిణ్ణన్నం ఖన్ధానం చిత్తసముట్ఠానానఞ్చ రూపానం నిస్సయపచ్చయేన పచ్చయో. తయో ఖన్ధా ఏకస్స ఖన్ధస్స చిత్తసముట్ఠానానఞ్చ రూపానం నిస్సయపచ్చయేన పచ్చయో. ద్వే ఖన్ధా ద్విన్నం ఖన్ధానం చిత్తసముట్ఠానానఞ్చ రూపానం నిస్సయపచ్చయేన పచ్చయో. పటిసన్ధిక్ఖణే విపాకాబ్యాకతో ఏకో ఖన్ధో తిణ్ణన్నం ఖన్ధానం కటత్తా చ రూపానం నిస్సయపచ్చయేన పచ్చయో. తయో ఖన్ధా ఏకస్స ఖన్ధస్స కటత్తా చ రూపానం నిస్సయపచ్చయేన పచ్చయో. ద్వే ఖన్ధా ద్విన్నం ఖన్ధానం కటత్తా చ రూపానం నిస్సయపచ్చయేన పచ్చయో. ఖన్ధా వత్థుస్స నిస్సయపచ్చయేన పచ్చయో. వత్థు ఖన్ధానం నిస్సయపచ్చయేన పచ్చయో. ఏకం మహాభూతం తిణ్ణన్నం మహాభూతానం నిస్సయపచ్చయేన పచ్చయో. తయో మహాభూతా ఏకస్స మహాభూతస్స నిస్సయపచ్చయేన పచ్చయో. ద్వే మహాభూతా ద్విన్నం మహాభూతానం నిస్సయపచ్చయేన పచ్చయో. మహాభూతా చిత్తసముట్ఠానానం రూపానం, కటత్తారూపానం, ఉపాదారూపానం నిస్సయపచ్చయేన పచ్చయో; బాహిరం… ఆహారసముట్ఠానం… ఉతుసముట్ఠానం… అసఞ్ఞసత్తానం ఏకం మహాభూతం తిణ్ణన్నం మహాభూతానం నిస్సయపచ్చయేన పచ్చయో. తయో మహాభూతా ఏకస్స మహాభూతస్స నిస్సయపచ్చయేన పచ్చయో. ద్వే మహాభూతా ద్విన్నం మహాభూతానం నిస్సయపచ్చయేన పచ్చయో. మహాభూతా కటత్తారూపానం, ఉపాదారూపానం నిస్సయపచ్చయేన పచ్చయో. చక్ఖాయతనం చక్ఖువిఞ్ఞాణస్స నిస్సయపచ్చయేన పచ్చయో. సోతాయతనం…పే… ఘానాయతనం…పే… జివ్హాయతనం …పే… కాయాయతనం కాయవిఞ్ఞాణస్స నిస్సయపచ్చయేన పచ్చయో. వత్థు విపాకాబ్యాకతానం కిరియాబ్యాకతానం ఖన్ధానం నిస్సయపచ్చయేన పచ్చయో.

అబ్యాకతో ధమ్మో కుసలస్స ధమ్మస్స నిస్సయపచ్చయేన పచ్చయో – వత్థు కుసలానం ఖన్ధానం నిస్సయపచ్చయేన పచ్చయో. (౨)

అబ్యాకతో ధమ్మో అకుసలస్స ధమ్మస్స నిస్సయపచ్చయేన పచ్చయో – వత్థు అకుసలానం ఖన్ధానం నిస్సయపచ్చయేన పచ్చయో. (౩)

౪౨౨. కుసలో చ అబ్యాకతో చ ధమ్మా కుసలస్స ధమ్మస్స నిస్సయపచ్చయేన పచ్చయో – కుసలో ఏకో ఖన్ధో చ వత్థు చ తిణ్ణన్నం ఖన్ధానం నిస్సయపచ్చయేన పచ్చయో. తయో ఖన్ధా చ వత్థు చ ఏకస్స ఖన్ధస్స నిస్సయపచ్చయేన పచ్చయో. ద్వే ఖన్ధా చ వత్థు చ ద్విన్నం ఖన్ధానం నిస్సయపచ్చయేన పచ్చయో. (౧)

కుసలో చ అబ్యాకతో చ ధమ్మా అబ్యాకతస్స ధమ్మస్స నిస్సయపచ్చయేన పచ్చయో – కుసలా ఖన్ధా చ మహాభూతా చ చిత్తసముట్ఠానానం రూపానం నిస్సయపచ్చయేన పచ్చయో. (౨)

అకుసలో చ అబ్యాకతో చ ధమ్మా అకుసలస్స ధమ్మస్స నిస్సయపచ్చయేన పచ్చయో – అకుసలో ఏకో ఖన్ధో చ వత్థు చ తిణ్ణన్నం ఖన్ధానం నిస్సయపచ్చయేన పచ్చయో. తయో ఖన్ధా చ వత్థు చ ఏకస్స ఖన్ధస్స నిస్సయపచ్చయేన పచ్చయో. ద్వే ఖన్ధా చ వత్థు చ ద్విన్నం ఖన్ధానం నిస్సయపచ్చయేన పచ్చయో. (౧)

అకుసలో చ అబ్యాకతో చ ధమ్మా అబ్యాకతస్స ధమ్మస్స నిస్సయపచ్చయేన పచ్చయో – అకుసలా ఖన్ధా చ మహాభూతా చ చిత్తసముట్ఠానానం రూపానం నిస్సయపచ్చయేన పచ్చయో. (౨)

ఉపనిస్సయపచ్చయో

౪౨౩. కుసలో ధమ్మో కుసలస్స ధమ్మస్స ఉపనిస్సయపచ్చయేన పచ్చయో – ఆరమ్మణూపనిస్సయో, అనన్తరూపనిస్సయో, పకతూపనిస్సయో.

ఆరమ్మణూపనిస్సయో – దానం దత్వా సీలం సమాదియిత్వా ఉపోసథకమ్మం కత్వా, తం గరుం కత్వా పచ్చవేక్ఖతి, పుబ్బే సుచిణ్ణాని గరుం కత్వా పచ్చవేక్ఖతి, ఝానా వుట్ఠహిత్వా ఝానం గరుం కత్వా పచ్చవేక్ఖతి, సేక్ఖా గోత్రభుం గరుం కత్వా పచ్చవేక్ఖన్తి, వోదానం గరుం కత్వా పచ్చవేక్ఖన్తి, సేక్ఖా మగ్గా వుట్ఠహిత్వా మగ్గం గరుం కత్వా పచ్చవేక్ఖన్తి.

అనన్తరూపనిస్సయో – పురిమా పురిమా కుసలా ఖన్ధా పచ్ఛిమానం పచ్ఛిమానం కుసలానం ఖన్ధానం ఉపనిస్సయపచ్చయేన పచ్చయో. అనులోమం గోత్రభుస్స… అనులోమం వోదానస్స… గోత్రభు మగ్గస్స… వోదానం మగ్గస్స ఉపనిస్సయపచ్చయేన పచ్చయో.

పకతూపనిస్సయో – సద్ధం ఉపనిస్సాయ దానం దేతి, సీలం సమాదియతి, ఉపోసథకమ్మం కరోతి, ఝానం ఉప్పాదేతి, విపస్సనం ఉప్పాదేతి, మగ్గం ఉప్పాదేతి, అభిఞ్ఞం ఉప్పాదేతి, సమాపత్తిం ఉప్పాదేతి. సీలం…పే… సుతం…పే… చాగం…పే… పఞ్ఞం ఉపనిస్సయ దానం దేతి, సీలం సమాదియతి, ఉపోసథకమ్మం కరోతి, ఝానం ఉప్పాదేతి, విపస్సనం ఉప్పాదేతి, మగ్గం ఉప్పాదేతి, అభిఞ్ఞం ఉప్పాదేతి, సమాపత్తిం ఉప్పాదేతి. సద్ధా… సీలం… సుతం… చాగో… పఞ్ఞా … సద్ధాయ… సీలస్స… సుతస్స… చాగస్స… పఞ్ఞాయ ఉపనిస్సయపచ్చయేన పచ్చయో.

పఠమస్స ఝానస్స పరికమ్మం పఠమస్స ఝానస్స ఉపనిస్సయపచ్చయేన పచ్చయో. దుతియస్స ఝానస్స పరికమ్మం దుతియస్స ఝానస్స ఉపనిస్సయపచ్చయేన పచ్చయో. తతియస్స ఝానస్స పరికమ్మం తతియస్స ఝానస్స ఉపనిస్సయపచ్చయేన పచ్చయో. చతుత్థస్స ఝానస్స పరికమ్మం చతుత్థస్స ఝానస్స ఉపనిస్సయపచ్చయేన పచ్చయో. ఆకాసానఞ్చాయతనస్స పరికమ్మం ఆకాసానఞ్చాయతనస్స ఉపనిస్సయపచ్చయేన పచ్చయో. విఞ్ఞాణఞ్చాయతనస్స పరికమ్మం విఞ్ఞాణఞ్చాయతనస్స ఉపనిస్సయపచ్చయేన పచ్చయో. ఆకిఞ్చఞ్ఞాయతనస్స పరికమ్మం ఆకిఞ్చఞ్ఞాయతనస్స ఉపనిస్సయపచ్చయేన పచ్చయో. నేవసఞ్ఞానాసఞ్ఞాయతనస్స పరికమ్మం నేవసఞ్ఞానాసఞ్ఞాయతనస్స ఉపనిస్సయపచ్చయేన పచ్చయో. పఠమం ఝానం దుతియస్స ఝానస్స ఉపనిస్సయపచ్చయేన పచ్చయో. దుతియం ఝానం తతియస్స ఝానస్స ఉపనిస్సయపచ్చయేన పచ్చయో. తతియం ఝానం చతుత్థస్స ఝానస్స ఉపనిస్సయపచ్చయేన పచ్చయో. చతుత్థం ఝానం ఆకాసానఞ్చాయతనస్స ఉపనిస్సయపచ్చయేన పచ్చయో. ఆకాసానఞ్చాయతనం విఞ్ఞాణఞ్చాయతనస్స ఉపనిస్సయపచ్చయేన పచ్చయో. విఞ్ఞాణఞ్చాయతనం ఆకిఞ్చఞ్ఞాయతనస్స ఉపనిస్సయపచ్చయేన పచ్చయో. ఆకిఞ్చఞ్ఞాయతనం నేవసఞ్ఞానాసఞ్ఞాయతనస్స ఉపనిస్సయపచ్చయేన పచ్చయో. దిబ్బస్స చక్ఖుస్స పరికమ్మం దిబ్బస్స చక్ఖుస్స ఉపనిస్సయపచ్చయేన పచ్చయో. దిబ్బాయ సోతధాతుయా పరికమ్మం దిబ్బాయ సోతధాతుయా ఉపనిస్సయపచ్చయేన పచ్చయో. ఇద్ధివిధఞాణస్స పరికమ్మం ఇద్ధివిధఞాణస్స ఉపనిస్సయపచ్చయేన పచ్చయో. చేతోపరియఞాణస్స పరికమ్మం చేతోపరియఞాణస్స ఉపనిస్సయపచ్చయేన పచ్చయో. పుబ్బేనివాసానుస్సతిఞాణస్స పరికమ్మం పుబ్బేనివాసానుస్సతిఞాణస్స ఉపనిస్సయపచ్చయేన పచ్చయో. యథాకమ్మూపగఞాణస్స పరికమ్మం యథాకమ్మూపగఞాణస్స ఉపనిస్సయపచ్చయేన పచ్చయో. అనాగతంసఞాణస్స పరికమ్మం అనాగతంసఞాణస్స ఉపనిస్సయపచ్చయేన పచ్చయో. దిబ్బచక్ఖు దిబ్బాయ సోతధాతుయా ఉపనిస్సయపచ్చయేన పచ్చయో. దిబ్బసోతధాతు ఇద్ధివిధఞాణస్స ఉపనిస్సయపచ్చయేన పచ్చయో. ఇద్ధివిధఞాణం చేతోపరియఞాణస్స ఉపనిస్సయపచ్చయేన పచ్చయో. చేతోపరియఞాణం పుబ్బేనివాసానుస్సతిఞాణస్స ఉపనిస్సయపచ్చయేన పచ్చయో. పుబ్బేనివాసానుస్సతిఞాణం యథాకమ్మూపగఞాణస్స ఉపనిస్సయపచ్చయేన పచ్చయో. యథాకమ్మూపగఞాణం అనాగతంసఞాణస్స ఉపనిస్సయపచ్చయేన పచ్చయో. పఠమస్స మగ్గస్స పరికమ్మం పఠమస్స మగ్గస్స ఉపనిస్సయపచ్చయేన పచ్చయో. దుతియస్స మగ్గస్స పరికమ్మం దుతియస్స మగ్గస్స ఉపనిస్సయపచ్చయేన పచ్చయో. తతియస్స మగ్గస్స పరికమ్మం తతియస్స మగ్గస్స ఉపనిస్సయపచ్చయేన పచ్చయో. చతుత్థస్స మగ్గస్స పరికమ్మం చతుత్థస్స మగ్గస్స ఉపనిస్సయపచ్చయేన పచ్చయో. పఠమో మగ్గో దుతియస్స మగ్గస్స ఉపనిస్సయపచ్చయేన పచ్చయో. దుతియో మగ్గో తతియస్స మగ్గస్స ఉపనిస్సయపచ్చయేన పచ్చయో. తతియో మగ్గో చతుత్థస్స మగ్గస్స ఉపనిస్సయపచ్చయేన పచ్చయో. సేక్ఖా మగ్గం ఉపనిస్సాయ అనుప్పన్నం సమాపత్తిం ఉప్పాదేన్తి, ఉప్పన్నం సమాపజ్జన్తి, సఙ్ఖారే అనిచ్చతో దుక్ఖతో అనత్తతో విపస్సన్తి. మగ్గో సేక్ఖానం అత్థప్పటిసమ్భిదాయ, ధమ్మప్పటిసమ్భిదాయ, నిరుత్తిప్పటిసమ్భిదాయ, పటిభానప్పటిసమ్భిదాయ, ఠానాఠానకోసల్లస్స ఉపనిస్సయపచ్చయేన పచ్చయో. (౧)

కుసలో ధమ్మో అకుసలస్స ధమ్మస్స ఉపనిస్సయపచ్చయేన పచ్చయో – ఆరమ్మణూపనిస్సయో, పకతూపనిస్సయో.

ఆరమ్మణూపనిస్సయో – దానం దత్వా సీలం సమాదియిత్వా ఉపోసథకమ్మం కత్వా తం గరుం కత్వా అస్సాదేతి అభినన్దతి, తం గరుం కత్వా రాగో ఉప్పజ్జతి, దిట్ఠి ఉప్పజ్జతి. పుబ్బే సుచిణ్ణాని గరుం కత్వా అస్సాదేతి అభినన్దతి, తం గరుం కత్వా రాగో ఉప్పజ్జతి, దిట్ఠి ఉప్పజ్జతి. ఝానా వుట్ఠహిత్వా ఝానం గరుం కత్వా అస్సాదేతి అభినన్దతి, తం గరుం కత్వా రాగో ఉప్పజ్జతి, దిట్ఠి ఉప్పజ్జతి.

పకతూపనిస్సయో – సద్ధం ఉపనిస్సాయ మానం జప్పేతి, దిట్ఠిం గణ్హాతి. సీలం…పే… సుతం…పే… చాగం…పే… పఞ్ఞం ఉపనిస్సాయ మానం జప్పేతి, దిట్ఠిం గణ్హాతి. సద్ధా… సీలం… సుతం… చాగో… పఞ్ఞా రాగస్స… దోసస్స… మోహస్స… మానస్స… దిట్ఠియా… పత్థనాయ ఉపనిస్సయపచ్చయేన పచ్చయో. (౨)

కుసలో ధమ్మో అబ్యాకతస్స ధమ్మస్స ఉపనిస్సయపచ్చయేన పచ్చయో – ఆరమ్మణూపనిస్సయో, అనన్తరూపనిస్సయో, పకతూపనిస్సయో.

ఆరమ్మణూపనిస్సయో – అరహా మగ్గా వుట్ఠహిత్వా మగ్గం గరుం కత్వా పచ్చవేక్ఖతి.

అనన్తరూపనిస్సయో – కుసలం వుట్ఠానస్స… మగ్గో ఫలస్స… అనులోమం సేక్ఖాయ ఫలసమాపత్తియా… నిరోధా వుట్ఠహన్తస్స నేవసఞ్ఞానాసఞ్ఞాయతనకుసలం ఫలసమాపత్తియా ఉపనిస్సయపచ్చయేన పచ్చయో.

పకతూపనిస్సయో – సద్ధం ఉపనిస్సాయ అత్తానం ఆతాపేతి పరితాపేతి, పరియిట్ఠిమూలకం దుక్ఖం పచ్చనుభోతి. సీలం…పే… సుతం…పే… చాగం…పే… పఞ్ఞం ఉపనిస్సాయ అత్తానం ఆతాపేతి పరితాపేతి, పరియిట్ఠిమూలకం దుక్ఖం పచ్చనుభోతి. సద్ధా… సీలం… సుతం… చాగో… పఞ్ఞా కాయికస్స సుఖస్స… కాయికస్స దుక్ఖస్స… ఫలసమాపత్తియా ఉపనిస్సయపచ్చయేన పచ్చయో. కుసలం కమ్మం విపాకస్స ఉపనిస్సయపచ్చయేన పచ్చయో. అరహా మగ్గం ఉపనిస్సాయ అనుప్పన్నం కిరియసమాపత్తిం ఉప్పాదేతి, ఉప్పన్నం సమాపజ్జతి, సఙ్ఖారే అనిచ్చతో దుక్ఖతో అనత్తతో విపస్సతి. మగ్గో అరహతో అత్థప్పటిసమ్భిదాయ, ధమ్మప్పటిసమ్భిదాయ, నిరుత్తిప్పటిసమ్భిదాయ, పటిభానప్పటిసమ్భిదాయ, ఠానాఠానకోసల్లస్స ఉపనిస్సయపచ్చయేన పచ్చయో. మగ్గో ఫలసమాపత్తియా ఉపనిస్సయపచ్చయేన పచ్చయో. (౩)

అకుసలో ధమ్మో అకుసలస్స ధమ్మస్స ఉపనిస్సయపచ్చయేన పచ్చయో – ఆరమ్మణూపనిస్సయో, అనన్తరూపనిస్సయో, పకతూపనిస్సయో.

ఆరమ్మణూపనిస్సయో – రాగం గరుం కత్వా అస్సాదేతి అభినన్దతి, తం గరుం కత్వా రాగో ఉప్పజ్జతి, దిట్ఠి ఉప్పజ్జతి. దిట్ఠిం గరుం కత్వా అస్సాదేతి అభినన్దతి, తం గరుం కత్వా రాగో ఉప్పజ్జతి, దిట్ఠి ఉప్పజ్జతి.

అనన్తరూపనిస్సయో – పురిమా పురిమా అకుసలా ఖన్ధా పచ్ఛిమానం పచ్ఛిమానం అకుసలానం ఖన్ధానం ఉపనిస్సయపచ్చయేన పచ్చయో.

పకతూపనిస్సయో – రాగం ఉపనిస్సాయ పాణం హనతి, అదిన్నం ఆదియతి, ముసా భణతి, పిసుణం భణతి, ఫరుసం భణతి, సమ్ఫం పలపతి, సన్ధిం ఛిన్దతి, నిల్లోపం హరతి, ఏకాగారికం కరోతి, పరిపన్థే తిట్ఠతి, పరదారం గచ్ఛతి, గామఘాతం కరోతి, నిగమఘాతం కరోతి, మాతరం జీవితా వోరోపేతి, పితరం జీవితా వోరోపేతి, అరహన్తం జీవితా వోరోపేతి, దుట్ఠేన చిత్తేన తథాగతస్స లోహితం ఉప్పాదేతి, సఙ్ఘం భిన్దతి. దోసం ఉపనిస్సాయ…పే… మోహం ఉపనిస్సాయ…పే… మానం ఉపనిస్సాయ…పే… దిట్ఠిం ఉపనిస్సాయ…పే… పత్థనం ఉపనిస్సాయ పాణం హనతి…పే… సఙ్ఘం భిన్దతి. రాగో… దోసో… మోహో… మానో… దిట్ఠి… పత్థనా రాగస్స… దోసస్స… మోహస్స… మానస్స… దిట్ఠియా… పత్థనాయ ఉపనిస్సయపచ్చయేన పచ్చయో. పాణాతిపాతో పాణాతిపాతస్స ఉపనిస్సయపచ్చయేన పచ్చయో. పాణాతిపాతో అదిన్నాదానస్స…పే… కామేసుమిచ్ఛాచారస్స…పే… ముసావాదస్స…పే… పిసుణాయ వాచాయ…పే… ఫరుసాయ వాచాయ…పే… సమ్ఫప్పలాపస్స…పే… అభిజ్ఝాయ…పే… బ్యాపాదస్స…పే… మిచ్ఛాదిట్ఠియా ఉపనిస్సయపచ్చయేన పచ్చయో. అదిన్నాదానం అదిన్నాదానస్స… కామేసుమిచ్ఛాచారస్స… ముసావాదస్స… (సంఖిత్తం) మిచ్ఛాదిట్ఠియా… పాణాతిపాతస్స ఉపనిస్సయపచ్చయేన పచ్చయో. (చక్కం బన్ధితబ్బం.) కామేసుమిచ్ఛాచారో…పే… ముసావాదో…పే… పిసుణవాచా…పే… ఫరుసవాచా…పే… సమ్ఫప్పలాపో…పే… అభిజ్ఝా…పే… బ్యాపాదో…పే… మిచ్ఛాదిట్ఠి మిచ్ఛాదిట్ఠియా ఉపనిస్సయపచ్చయేన పచ్చయో. మిచ్ఛాదిట్ఠి పాణాతిపాతస్స… అదిన్నాదానస్స… కామేసుమిచ్ఛాచారస్స… ముసావాదస్స… పిసుణాయ వాచాయ… ఫరుసాయ వాచాయ… సమ్ఫప్పలాపస్స… అభిజ్ఝాయ… బ్యాపాదస్స ఉపనిస్సయపచ్చయేన పచ్చయో. మాతుఘాతికమ్మం మాతుఘాతికమ్మస్స ఉపనిస్సయపచ్చయేన పచ్చయో. మాతుఘాతికమ్మం పితుఘాతికమ్మస్స ఉపనిస్సయ…పే… అరహన్తఘాతికమ్మస్స… రుహిరుప్పాదకమ్మస్స… సఙ్ఘభేదకమ్మస్స… నియతమిచ్ఛాదిట్ఠియా ఉపనిస్సయపచ్చయేన పచ్చయో. పితుఘాతికమ్మం పితుఘాతికమ్మస్స… అరహన్తఘాతికమ్మస్స… రుహిరుప్పాదకమ్మస్స… సఙ్ఘభేదకమ్మస్స… నియతమిచ్ఛాదిట్ఠియా… మాతుఘాతికమ్మస్స ఉపనిస్సయపచ్చయేన పచ్చయో. అరహన్తఘాతికమ్మం అరహన్తఘాతికమ్మస్స… రుహిరుప్పాదకమ్మస్స…పే… రుహిరుప్పాదకమ్మం రుహిరుప్పాదకమ్మస్స…పే… సఙ్ఘభేదకమ్మం సఙ్ఘభేదకమ్మస్స…పే… నియతమిచ్ఛాదిట్ఠి నియతమిచ్ఛాదిట్ఠియా ఉపనిస్సయపచ్చయేన పచ్చయో. నియతమిచ్ఛాదిట్ఠి మాతుఘాతికమ్మస్స ఉపనిస్సయ…పే… అరహన్తఘాతికమ్మస్స… రుహిరుప్పాదకమ్మస్స… సఙ్ఘభేదకమ్మస్స ఉపనిస్సయపచ్చయేన పచ్చయో. (చక్కం కాతబ్బం.) (౧)

అకుసలో ధమ్మో కుసలస్స ధమ్మస్స ఉపనిస్సయపచ్చయేన పచ్చయో. పకతూపనిస్సయో – రాగం ఉపనిస్సాయ దానం దేతి, సీలం సమాదియతి, ఉపోసథకమ్మం కరోతి, ఝానం ఉప్పాదేతి, విపస్సనం ఉప్పాదేతి, మగ్గం ఉప్పాదేతి, అభిఞ్ఞం ఉప్పాదేతి, సమాపత్తిం ఉప్పాదేతి. దోసం…పే… మోహం…పే… మానం…పే… దిట్ఠిం…పే… పత్థనం ఉపనిస్సాయ దానం దేతి, సీలం సమాదియతి, ఉపోసథకమ్మం కరోతి, ఝానం ఉప్పాదేతి, విపస్సనం ఉప్పాదేతి, మగ్గం ఉప్పాదేతి, అభిఞ్ఞం ఉప్పాదేతి, సమాపత్తిం ఉప్పాదేతి. రాగో… దోసో… మోహో… మానో… దిట్ఠి… పత్థనా సద్ధాయ… సీలస్స… సుతస్స… చాగస్స … పఞ్ఞాయ ఉపనిస్సయపచ్చయేన పచ్చయో. పాణం హన్త్వా తస్స పటిఘాతత్థాయ దానం దేతి, సీలం సమాదియతి, ఉపోసథకమ్మం కరోతి, ఝానం ఉప్పాదేతి, విపస్సనం ఉప్పాదేతి, మగ్గం ఉప్పాదేతి, అభిఞ్ఞం ఉప్పాదేతి, సమాపత్తిం ఉప్పాదేతి. అదిన్నం ఆదియిత్వా…పే… ముసా భణిత్వా…పే… పిసుణం భణిత్వా…పే… ఫరుసం భణిత్వా…పే… సమ్ఫం పలపిత్వా…పే… సన్ధిం ఛిన్దిత్వా…పే… నిల్లోపం హరిత్వా…పే… ఏకాగారికం కరిత్వా…పే… పరిపన్థే ఠత్వా…పే… పరదారం గన్త్వా…పే… గామఘాతం కరిత్వా…పే… నిగమఘాతం కరిత్వా తస్స పటిఘాతత్థాయ దానం దేతి, సీలం సమాదియతి, ఉపోసథకమ్మం కరోతి, ఝానం ఉప్పాదేతి, విపస్సనం ఉప్పాదేతి, మగ్గం ఉప్పాదేతి, అభిఞ్ఞం ఉప్పాదేతి, సమాపత్తిం ఉప్పాదేతి. మాతరం జీవితా వోరోపేత్వా తస్స పటిఘాతత్థాయ దానం దేతి, సీలం సమాదియతి, ఉపోసథకమ్మం కరోతి. పితరం జీవితా వోరోపేత్వా…పే… అరహన్తం జీవితా వోరోపేత్వా…పే… దుట్ఠేన చిత్తేన తథాగతస్స లోహితం ఉప్పాదేత్వా…పే… సఙ్ఘం భిన్దిత్వా తస్స పటిఘాతత్థాయ దానం దేతి, సీలం సమాదియతి, ఉపోసథకమ్మం కరోతి. (౨)

అకుసలో ధమ్మో అబ్యాకతస్స ధమ్మస్స ఉపనిస్సయపచ్చయేన పచ్చయో – అనన్తరూపనిస్సయో, పకతూపనిస్సయో.

అనన్తరూపనిస్సయో – అకుసలం వుట్ఠానస్స ఉపనిస్సయపచ్చయేన పచ్చయో.

పకతూపనిస్సయో – రాగం ఉపనిస్సాయ అత్తానం ఆతాపేతి పరితాపేతి, పరియిట్ఠిమూలకం దుక్ఖం పచ్చనుభోతి. దోసం…పే… మోహం…పే… మానం …పే… దిట్ఠిం…పే… పత్థనం ఉపనిస్సాయ అత్తానం ఆతాపేతి పరితాపేతి, పరియిట్ఠిమూలకం దుక్ఖం పచ్చనుభోతి. రాగో… దోసో … మోహో… మానో… దిట్ఠి… పత్థనా కాయికస్స సుఖస్స… కాయికస్స దుక్ఖస్స… ఫలసమాపత్తియా ఉపనిస్సయపచ్చయేన పచ్చయో. అకుసలం కమ్మం విపాకస్స ఉపనిస్సయపచ్చయేన పచ్చయో. (౩)

అబ్యాకతో ధమ్మో అబ్యాకతస్స ధమ్మస్స ఉపనిస్సయపచ్చయేన పచ్చయో – ఆరమ్మణూపనిస్సయో, అనన్తరూపనిస్సయో, పకతూపనిస్సయో.

ఆరమ్మణూపనిస్సయో – అరహా ఫలం గరుం కత్వా పచ్చవేక్ఖతి, నిబ్బానం గరుం కత్వా పచ్చవేక్ఖతి, నిబ్బానం ఫలస్స ఉపనిస్సయపచ్చయేన పచ్చయో.

అనన్తరూపనిస్సయో – పురిమా పురిమా విపాకాబ్యాకతా, కిరియాబ్యాకతా ఖన్ధా పచ్ఛిమానం పచ్ఛిమానం విపాకాబ్యాకతానం కిరియాబ్యాకతానం ఖన్ధానం ఉపనిస్సయపచ్చయేన పచ్చయో. భవఙ్గం ఆవజ్జనాయ… కిరియం వుట్ఠానస్స… అరహతో అనులోమం ఫలసమాపత్తియా… నిరోధా వుట్ఠహన్తస్స నేవసఞ్ఞానాసఞ్ఞాయతనకిరియం ఫలసమాపత్తియా ఉపనిస్సయపచ్చయేన పచ్చయో.

పకతూపనిస్సయో – కాయికం సుఖం కాయికస్స సుఖస్స, కాయికస్స దుక్ఖస్స, ఫలసమాపత్తియా ఉపనిస్సయపచ్చయేన పచ్చయో. కాయికం దుక్ఖం కాయికస్స సుఖస్స, కాయికస్స దుక్ఖస్స, ఫలసమాపత్తియా ఉపనిస్సయపచ్చయేన పచ్చయో. ఉతు కాయికస్స సుఖస్స, కాయికస్స దుక్ఖస్స, ఫలసమాపత్తియా ఉపనిస్సయపచ్చయేన పచ్చయో. భోజనం కాయికస్స సుఖస్స, కాయికస్స దుక్ఖస్స, ఫలసమాపత్తియా ఉపనిస్సయపచ్చయేన పచ్చయో. సేనాసనం కాయికస్స సుఖస్స, కాయికస్స దుక్ఖస్స, ఫలసమాపత్తియా ఉపనిస్సయపచ్చయేన పచ్చయో. కాయికం సుఖం… కాయికం దుక్ఖం… ఉతు… భోజనం… సేనాసనం కాయికస్స సుఖస్స, కాయికస్స దుక్ఖస్స, ఫలసమాపత్తియా ఉపనిస్సయపచ్చయేన పచ్చయో. ఫలసమాపత్తి కాయికస్స సుఖస్స ఉపనిస్సయపచ్చయేన పచ్చయో.

అరహా కాయికం సుఖం ఉపనిస్సాయ అనుప్పన్నం కిరియసమాపత్తిం ఉప్పాదేతి, ఉప్పన్నం సమాపజ్జతి, సఙ్ఖారే అనిచ్చతో దుక్ఖతో అనత్తతో విపస్సతి. కాయికం దుక్ఖం… ఉతుం… భోజనం … సేనాసనం ఉపనిస్సాయ అనుప్పన్నం కిరియసమాపత్తిం ఉప్పాదేతి, ఉప్పన్నం సమాపజ్జతి, సఙ్ఖారే అనిచ్చతో దుక్ఖతో అనత్తతో విపస్సతి. (౧)

అబ్యాకతో ధమ్మో కుసలస్స ధమ్మస్స ఉపనిస్సయపచ్చయేన పచ్చయో – ఆరమ్మణూపనిస్సయో, అనన్తరూపనిస్సయో, పకతూపనిస్సయో.

ఆరమ్మణూపనిస్సయో – సేక్ఖా ఫలం గరుం కత్వా పచ్చవేక్ఖన్తి, నిబ్బానం గరుం కత్వా పచ్చవేక్ఖన్తి. నిబ్బానం గోత్రభుస్స… వోదానస్స… మగ్గస్స ఉపనిస్సయపచ్చయేన పచ్చయో.

అనన్తరూపనిస్సయో – ఆవజ్జనా కుసలానం ఖన్ధానం ఉపనిస్సయపచ్చయేన పచ్చయో.

పకతూపనిస్సయో – కాయికం సుఖం ఉపనిస్సాయ దానం దేతి, సీలం సమాదియతి, ఉపోసథకమ్మం కరోతి, ఝానం ఉప్పాదేతి, విపస్సనం ఉప్పాదేతి, మగ్గం ఉప్పాదేతి, అభిఞ్ఞం ఉప్పాదేతి, సమాపత్తిం ఉప్పాదేతి. కాయికం దుక్ఖం… ఉతుం… భోజనం… సేనాసనం ఉపనిస్సాయ దానం దేతి, సీలం సమాదియతి, ఉపోసథకమ్మం కరోతి, ఝానం ఉప్పాదేతి, విపస్సనం ఉప్పాదేతి, మగ్గం ఉప్పాదేతి, అభిఞ్ఞం ఉప్పాదేతి, సమాపత్తిం ఉప్పాదేతి. కాయికం సుఖం… కాయికం దుక్ఖం… ఉతు… భోజనం… సేనాసనం సద్ధాయ… సీలస్స… సుతస్స… చాగస్స… పఞ్ఞాయ ఉపనిస్సయపచ్చయేన పచ్చయో. (౨)

అబ్యాకతో ధమ్మో అకుసలస్స ధమ్మస్స ఉపనిస్సయపచ్చయేన పచ్చయో – ఆరమ్మణూపనిస్సయో, అనన్తరూపనిస్సయో, పకతూపనిస్సయో.

ఆరమ్మణూపనిస్సయో – చక్ఖుం గరుం కత్వా అస్సాదేతి అభినన్దతి, తం గరుం కత్వా రాగో ఉప్పజ్జతి, దిట్ఠి ఉప్పజ్జతి. సోతం…పే… ఘానం…పే… జివ్హం…పే… కాయం…పే… రూపే…పే… సద్దే…పే… గన్ధే…పే… రసే…పే… ఫోట్ఠబ్బే…పే… వత్థుం…పే… విపాకాబ్యాకతే కిరియాబ్యాకతే ఖన్ధే గరుం కత్వా అస్సాదేతి అభినన్దతి, తం గరుం కత్వా రాగో ఉప్పజ్జతి, దిట్ఠి ఉప్పజ్జతి.

అనన్తరూపనిస్సయో – ఆవజ్జనా అకుసలానం ఖన్ధానం ఉపనిస్సయపచ్చయేన పచ్చయో.

పకతూపనిస్సయో – కాయికం సుఖం ఉపనిస్సాయ పాణం హనతి, అదిన్నం ఆదియతి, ముసా భణతి, పిసుణం భణతి, ఫరుసం భణతి, సమ్ఫం పలపతి, సన్ధిం ఛిన్దతి, నిల్లోపం హరతి, ఏకాగారికం కరోతి, పరిపన్థే తిట్ఠతి, పరదారం గచ్ఛతి, గామఘాతం కరోతి, నిగమఘాతం కరోతి, మాతరం జీవితా వోరోపేతి, పితరం జీవితా వోరోపేతి, అరహన్తం జీవితా వోరోపేతి, దుట్ఠేన చిత్తేన తథాగతస్స లోహితం ఉప్పాదేతి, సఙ్ఘం భిన్దతి.

కాయికం దుక్ఖం…పే… ఉతుం…పే… భోజనం…పే… సేనాసనం ఉపనిస్సాయ పాణం హనతి… (సంఖిత్తం.) సఙ్ఘం భిన్దతి.

కాయికం సుఖం… కాయికం దుక్ఖం… ఉతు… భోజనం… సేనాసనం రాగస్స… దోసస్స… మోహస్స… మానస్స… దిట్ఠియా… పత్థనాయ ఉపనిస్సయపచ్చయేన పచ్చయో. (౩)

పురేజాతపచ్చయో

౪౨౪. అబ్యాకతో ధమ్మో అబ్యాకతస్స ధమ్మస్స పురేజాతపచ్చయేన పచ్చయో – ఆరమ్మణపురేజాతం, వత్థుపురేజాతం.

ఆరమ్మణపురేజాతం – అరహా చక్ఖుం అనిచ్చతో దుక్ఖతో అనత్తతో విపస్సతి. సోతం…పే… ఘానం…పే… జివ్హం…పే… కాయం…పే… రూపే…పే… సద్దే…పే… గన్ధే…పే… రసే…పే… ఫోట్ఠబ్బే…పే… వత్థుం అనిచ్చతో దుక్ఖతో అనత్తతో విపస్సతి, దిబ్బేన చక్ఖునా రూపం పస్సతి, దిబ్బాయ సోతధాతుయా సద్దం సుణాతి. రూపాయతనం చక్ఖువిఞ్ఞాణస్స పురేజాతపచ్చయేన పచ్చయో. సద్దాయతనం సోతవిఞ్ఞాణస్స…పే… గన్ధాయతనం ఘానవిఞ్ఞాణస్స…పే… రసాయతనం జివ్హావిఞ్ఞాణస్స…పే… ఫోట్ఠబ్బాయతనం కాయవిఞ్ఞాణస్స పురేజాతపచ్చయేన పచ్చయో.

వత్థుపురేజాతం – చక్ఖాయతనం చక్ఖువిఞ్ఞాణస్స పురేజాతపచ్చయేన పచ్చయో. సోతాయతనం సోతవిఞ్ఞాణస్స …పే… ఘానాయతనం ఘానవిఞ్ఞాణస్స…పే… జివ్హాయతనం జివ్హావిఞ్ఞాణస్స…పే… కాయాయతనం కాయవిఞ్ఞాణస్స పురేజాతపచ్చయేన పచ్చయో. వత్థు విపాకాబ్యాకతానం కిరియాబ్యాకతానం ఖన్ధానం పురేజాతపచ్చయేన పచ్చయో. (౧)

అబ్యాకతో ధమ్మో కుసలస్స ధమ్మస్స పురేజాతపచ్చయేన పచ్చయో – ఆరమ్మణపురేజాతం, వత్థుపురేజాతం.

ఆరమ్మణపురేజాతం – సేక్ఖా వా పుథుజ్జనా వా చక్ఖుం అనిచ్చతో దుక్ఖతో అనత్తతో విపస్సన్తి. సోతం…పే… ఘానం…పే… జివ్హం…పే… కాయం…పే… రూపే…పే… సద్దే…పే… గన్ధే…పే… రసే…పే… ఫోట్ఠబ్బే…పే… వత్థుం అనిచ్చతో దుక్ఖతో అనత్తతో విపస్సన్తి. దిబ్బేన చక్ఖునా రూపం పస్సన్తి. దిబ్బాయ సోతధాతుయా సద్దం సుణన్తి.

వత్థుపురేజాతం – వత్థు కుసలానం ఖన్ధానం పురేజాతపచ్చయేన పచ్చయో. (౨)

అబ్యాకతో ధమ్మో అకుసలస్స ధమ్మస్స పురేజాతపచ్చయేన పచ్చయో – ఆరమ్మణపురేజాతం, వత్థుపురేజాతం. ఆరమ్మణపురేజాతం – చక్ఖుం అస్సాదేతి అభినన్దతి, తం ఆరబ్భ రాగో ఉప్పజ్జతి, దిట్ఠి ఉప్పజ్జతి, విచికిచ్ఛా ఉప్పజ్జతి, ఉద్ధచ్చం ఉప్పజ్జతి, దోమనస్సం ఉప్పజ్జతి. సోతం…పే… ఘానం…పే… జివ్హం…పే… కాయం…పే… రూపే…పే… సద్దే…పే… గన్ధే…పే… రసే…పే… ఫోట్ఠబ్బే…పే… వత్థుం అస్సాదేతి అభినన్దతి, తం ఆరబ్భ రాగో ఉప్పజ్జతి…పే… దోమనస్సం ఉప్పజ్జతి.

వత్థుపురేజాతం – వత్థు అకుసలానం ఖన్ధానం పురేజాతపచ్చయేన పచ్చయో. (౩)

పచ్ఛాజాతపచ్చయో

౪౨౫. కుసలో ధమ్మో అబ్యాకతస్స ధమ్మస్స పచ్ఛాజాతపచ్చయేన పచ్చయో – పచ్ఛాజాతా కుసలా ఖన్ధా పురేజాతస్స ఇమస్స కాయస్స పచ్ఛాజాతపచ్చయేన పచ్చయో. (౧)

అకుసలో ధమ్మో అబ్యాకతస్స ధమ్మస్స పచ్ఛాజాతపచ్చయేన పచ్చయో – పచ్ఛాజాతా అకుసలా ఖన్ధా పురేజాతస్స ఇమస్స కాయస్స పచ్ఛాజాతపచ్చయేన పచ్చయో. (౧)

అబ్యాకతో ధమ్మో అబ్యాకతస్స ధమ్మస్స పచ్ఛాజాతపచ్చయేన పచ్చయో – పచ్ఛాజాతా విపాకాబ్యాకతా కిరియాబ్యాకతా ఖన్ధా పురేజాతస్స ఇమస్స కాయస్స పచ్ఛాజాతపచ్చయేన పచ్చయో. (౧)

ఆసేవనపచ్చయో

౪౨౬. కుసలో ధమ్మో కుసలస్స ధమ్మస్స ఆసేవనపచ్చయేన పచ్చయో – పురిమా పురిమా కుసలా ఖన్ధా పచ్ఛిమానం పచ్ఛిమానం కుసలానం ఖన్ధానం ఆసేవనపచ్చయేన పచ్చయో. అనులోమం గోత్రభుస్స… అనులోమం వోదానస్స… గోత్రభు మగ్గస్స… వోదానం మగ్గస్స ఆసేవనపచ్చయేన పచ్చయో. (౧)

అకుసలో ధమ్మో అకుసలస్స ధమ్మస్స ఆసేవనపచ్చయేన పచ్చయో – పురిమా పురిమా అకుసలా ఖన్ధా పచ్ఛిమానం పచ్ఛిమానం అకుసలానం ఖన్ధానం ఆసేవనపచ్చయేన పచ్చయో. (౧)

అబ్యాకతో ధమ్మో అబ్యాకతస్స ధమ్మస్స ఆసేవనపచ్చయేన పచ్చయో – పురిమా పురిమా కిరియాబ్యాకతా ఖన్ధా పచ్ఛిమానం పచ్ఛిమానం కిరియాబ్యాకతానం ఖన్ధానం ఆసేవనపచ్చయేన పచ్చయో. (౧)

కమ్మపచ్చయో

౪౨౭. కుసలో ధమ్మో కుసలస్స ధమ్మస్స కమ్మపచ్చయేన పచ్చయో – కుసలా చేతనా సమ్పయుత్తకానం ఖన్ధానం కమ్మపచ్చయేన పచ్చయో. (౧)

కుసలో ధమ్మో అబ్యాకతస్స ధమ్మస్స కమ్మపచ్చయేన పచ్చయో – సహజాతా, నానాక్ఖణికా [నానాఖణికా (క.)]. సహజాతా – కుసలా చేతనా చిత్తసముట్ఠానానం రూపానం కమ్మపచ్చయేన పచ్చయో.

నానాక్ఖణికా – కుసలా చేతనా విపాకానం ఖన్ధానం కటత్తా చ రూపానం కమ్మపచ్చయేన పచ్చయో. (౨)

కుసలో ధమ్మో కుసలస్స చ అబ్యాకతస్స చ ధమ్మస్స కమ్మపచ్చయేన పచ్చయో – కుసలా చేతనా సమ్పయుత్తకానం ఖన్ధానం చిత్తసముట్ఠానానఞ్చ రూపానం కమ్మపచ్చయేన పచ్చయో. (౩)

అకుసలో ధమ్మో అకుసలస్స ధమ్మస్స కమ్మపచ్చయేన పచ్చయో – అకుసలా చేతనా సమ్పయుత్తకానం ఖన్ధానం కమ్మపచ్చయేన పచ్చయో. (౧)

అకుసలో ధమ్మో అబ్యాకతస్స ధమ్మస్స కమ్మపచ్చయేన పచ్చయో – సహజాతా, నానాక్ఖణికా. సహజాతా – అకుసలా చేతనా చిత్తసముట్ఠానానం రూపానం కమ్మపచ్చయేన పచ్చయో. నానాక్ఖణికా – అకుసలా చేతనా విపాకానం ఖన్ధానం కటత్తా చ రూపానం కమ్మపచ్చయేన పచ్చయో. (౨)

అకుసలో ధమ్మో అకుసలస్స చ అబ్యాకతస్స చ ధమ్మస్స కమ్మపచ్చయేన పచ్చయో – అకుసలా చేతనా సమ్పయుత్తకానం ఖన్ధానం చిత్తసముట్ఠానానఞ్చ రూపానం కమ్మపచ్చయేన పచ్చయో. (౩)

అబ్యాకతో ధమ్మో అబ్యాకతస్స ధమ్మస్స కమ్మపచ్చయేన పచ్చయో – విపాకాబ్యాకతా కిరియాబ్యాకతా చేతనా సమ్పయుత్తకానం ఖన్ధానం, చిత్తసముట్ఠానానఞ్చ రూపానం కమ్మపచ్చయేన పచ్చయో. పటిసన్ధిక్ఖణే విపాకాబ్యాకతా చేతనా సమ్పయుత్తకానం ఖన్ధానం కటత్తా చ రూపానం కమ్మపచ్చయేన పచ్చయో. చేతనా వత్థుస్స కమ్మపచ్చయేన పచ్చయో. (౧)

విపాకపచ్చయో

౪౨౮. అబ్యాకతో ధమ్మో అబ్యాకతస్స ధమ్మస్స విపాకపచ్చయేన పచ్చయో – విపాకాబ్యాకతో ఏకో ఖన్ధో తిణ్ణన్నం ఖన్ధానం చిత్తసముట్ఠానానఞ్చ రూపానం విపాకపచ్చయేన పచ్చయో. తయో ఖన్ధా ఏకస్స ఖన్ధస్స చిత్తసముట్ఠానానఞ్చ రూపానం విపాకపచ్చయేన పచ్చయో. ద్వే ఖన్ధా ద్విన్నం ఖన్ధానం చిత్తసముట్ఠానానఞ్చ రూపానం విపాకపచ్చయేన పచ్చయో. పటిసన్ధిక్ఖణే విపాకాబ్యాకతో ఏకో ఖన్ధో తిణ్ణన్నం ఖన్ధానం కటత్తా చ రూపానం విపాకపచ్చయేన పచ్చయో. తయో ఖన్ధా ఏకస్స ఖన్ధస్స కటత్తా చ రూపానం విపాకపచ్చయేన పచ్చయో. ద్వే ఖన్ధా ద్విన్నం ఖన్ధానం కటత్తా చ రూపానం విపాకపచ్చయేన పచ్చయో. ఖన్ధా వత్థుస్స విపాకపచ్చయేన పచ్చయో. (౧)

ఆహారపచ్చయో

౪౨౯. కుసలో ధమ్మో కుసలస్స ధమ్మస్స ఆహారపచ్చయేన పచ్చయో – కుసలా ఆహారా సమ్పయుత్తకానం ఖన్ధానం ఆహారపచ్చయేన పచ్చయో. (౧)

కుసలో ధమ్మో అబ్యాకతస్స ధమ్మస్స ఆహారపచ్చయేన పచ్చయో – కుసలా ఆహారా చిత్తసముట్ఠానానం రూపానం ఆహారపచ్చయేన పచ్చయో. (౨)

కుసలో ధమ్మో కుసలస్స చ అబ్యాకతస్స చ ధమ్మస్స ఆహారపచ్చయేన పచ్చయో – కుసలా ఆహారా సమ్పయుత్తకానం ఖన్ధానం చిత్తసముట్ఠానానఞ్చ రూపానం ఆహారపచ్చయేన పచ్చయో. (౩)

అకుసలో ధమ్మో అకుసలస్స ధమ్మస్స ఆహారపచ్చయేన పచ్చయో – అకుసలా ఆహారా సమ్పయుత్తకానం ఖన్ధానం ఆహారపచ్చయేన పచ్చయో.

అకుసలో ధమ్మో అబ్యాకతస్స ధమ్మస్స ఆహారపచ్చయేన పచ్చయో – అకుసలా ఆహారా చిత్తసముట్ఠానానం రూపానం ఆహారపచ్చయేన పచ్చయో. (౨)

అకుసలో ధమ్మో అకుసలస్స చ అబ్యాకతస్స చ ధమ్మస్స ఆహారపచ్చయేన పచ్చయో – అకుసలా ఆహారా సమ్పయుత్తకానం ఖన్ధానం చిత్తసముట్ఠానానఞ్చ రూపానం ఆహారపచ్చయేన పచ్చయో. (౩)

అబ్యాకతో ధమ్మో అబ్యాకతస్స ధమ్మస్స ఆహారపచ్చయేన పచ్చయో – విపాకాబ్యాకతా కిరియాబ్యాకతా ఆహారా సమ్పయుత్తకానం ఖన్ధానం చిత్తసముట్ఠానానఞ్చ రూపానం ఆహారపచ్చయేన పచ్చయో. పటిసన్ధిక్ఖణే విపాకాబ్యాకతా ఆహారా సమ్పయుత్తకానం ఖన్ధానం కటత్తా చ రూపానం ఆహారపచ్చయేన పచ్చయో. కబళీకారో ఆహారో ఇమస్స కాయస్స ఆహారపచ్చయేన పచ్చయో. (౧)

ఇన్ద్రియపచ్చయో

౪౩౦. కుసలో ధమ్మో కుసలస్స ధమ్మస్స ఇన్ద్రియపచ్చయేన పచ్చయో – కుసలా ఇన్ద్రియా సమ్పయుత్తకానం ఖన్ధానం ఇన్ద్రియపచ్చయేన పచ్చయో. (౧)

కుసలో ధమ్మో అబ్యాకతస్స ధమ్మస్స ఇన్ద్రియపచ్చయేన పచ్చయో – కుసలా ఇన్ద్రియా చిత్తసముట్ఠానానం రూపానం ఇన్ద్రియపచ్చయేన పచ్చయో. (౨)

కుసలో ధమ్మో కుసలస్స చ అబ్యాకతస్స చ ధమ్మస్స ఇన్ద్రియపచ్చయేన పచ్చయో – కుసలా ఇన్ద్రియా సమ్పయుత్తకానం ఖన్ధానం చిత్తసముట్ఠానానఞ్చ రూపానం ఇన్ద్రియపచ్చయేన పచ్చయో. (౩)

అకుసలో ధమ్మో అకుసలస్స ధమ్మస్స ఇన్ద్రియపచ్చయేన పచ్చయో – అకుసలా ఇన్ద్రియా సమ్పయుత్తకానం ఖన్ధానం ఇన్ద్రియపచ్చయేన పచ్చయో. (౧)

అకుసలో ధమ్మో అబ్యాకతస్స ధమ్మస్స ఇన్ద్రియపచ్చయేన పచ్చయో – అకుసలా ఇన్ద్రియా చిత్తసముట్ఠానానం రూపానం ఇన్ద్రియపచ్చయేన పచ్చయో. (౨)

అకుసలో ధమ్మో అకుసలస్స చ అబ్యాకతస్స చ ధమ్మస్స ఇన్ద్రియపచ్చయేన పచ్చయో – అకుసలా ఇన్ద్రియా సమ్పయుత్తకానం ఖన్ధానం చిత్తసముట్ఠానానఞ్చ రూపానం ఇన్ద్రియపచ్చయేన పచ్చయో. (౩)