౧. విభఙ్గవారో

హేతుపచ్చయో

౩౩౮. కుసలం ధమ్మం సంసట్ఠో కుసలో ధమ్మో ఉప్పజ్జతి హేతుపచ్చయా – కుసలం ఏకం ఖన్ధం సంసట్ఠా తయో ఖన్ధా, తయో ఖన్ధే సంసట్ఠో ఏకో ఖన్ధో, ద్వే ఖన్ధే సంసట్ఠా ద్వే ఖన్ధా. (౧)

అకుసలం ధమ్మం సంసట్ఠో అకుసలో ధమ్మో ఉప్పజ్జతి హేతుపచ్చయా – అకుసలం ఏకం ఖన్ధం సంసట్ఠా తయో ఖన్ధా, తయో ఖన్ధే సంసట్ఠో ఏకో ఖన్ధో, ద్వే ఖన్ధే సంసట్ఠా ద్వే ఖన్ధా. (౧)

అబ్యాకతం ధమ్మం సంసట్ఠో అబ్యాకతో ధమ్మో ఉప్పజ్జతి హేతుపచ్చయా – విపాకాబ్యాకతం కిరియాబ్యాకతం ఏకం ఖన్ధం సంసట్ఠా తయో ఖన్ధా, తయో ఖన్ధే సంసట్ఠో ఏకో ఖన్ధో, ద్వే ఖన్ధే సంసట్ఠా ద్వే ఖన్ధా; పటిసన్ధిక్ఖణే విపాకాబ్యాకతం ఏకం ఖన్ధం సంసట్ఠా తయో ఖన్ధా, తయో ఖన్ధే సంసట్ఠో ఏకో ఖన్ధో, ద్వే ఖన్ధే సంసట్ఠా ద్వే ఖన్ధా. (౧)

ఆరమ్మణాదిపచ్చయా

౩౩౯. కుసలం ధమ్మం సంసట్ఠో కుసలో ధమ్మో ఉప్పజ్జతి ఆరమ్మణపచ్చయా… అధిపతిపచ్చయా… (అధిపతి పటిసన్ధిక్ఖణే నత్థి.) అనన్తరపచ్చయా… సమనన్తరపచ్చయా… సహజాతపచ్చయా… అఞ్ఞమఞ్ఞపచ్చయా… నిస్సయపచ్చయా… ఉపనిస్సయపచ్చయా. (సబ్బాని పదాని హేతుమూలకసదిసాని).

పురేజాతపచ్చయో

౩౪౦. కుసలం ధమ్మం సంసట్ఠో కుసలో ధమ్మో ఉప్పజ్జతి పురేజాతపచ్చయా – కుసలం ఏకం ఖన్ధం సంసట్ఠా తయో ఖన్ధా, తయో ఖన్ధే సంసట్ఠో ఏకో ఖన్ధో, ద్వే ఖన్ధే సంసట్ఠా ద్వే ఖన్ధా, వత్థుం పురేజాతపచ్చయా. (౧)

అకుసలం ధమ్మం సంసట్ఠో అకుసలో ధమ్మో ఉప్పజ్జతి పురేజాతపచ్చయా – అకుసలం ఏకం ఖన్ధం సంసట్ఠా తయో ఖన్ధా, తయో ఖన్ధే సంసట్ఠో ఏకో ఖన్ధో, ద్వే ఖన్ధే సంసట్ఠా ద్వే ఖన్ధా; వత్థుం పురేజాతపచ్చయా. (౧)

అబ్యాకతం ధమ్మం సంసట్ఠో అబ్యాకతో ధమ్మో ఉప్పజ్జతి పురేజాతపచ్చయా – విపాకాబ్యాకతం కిరియాబ్యాకతం ఏకం ఖన్ధం సంసట్ఠా తయో ఖన్ధా, తయో ఖన్ధే సంసట్ఠో ఏకో ఖన్ధో, ద్వే ఖన్ధే సంసట్ఠా ద్వే ఖన్ధా; వత్థుం పురేజాతపచ్చయా. (౧)

ఆసేవనపచ్చయో

౩౪౧. కుసలం ధమ్మం సంసట్ఠో…పే… అకుసలం ధమ్మం…పే… అబ్యాకతం ధమ్మం సంసట్ఠో అబ్యాకతో ధమ్మో ఉప్పజ్జతి ఆసేవనపచ్చయా – కిరియాబ్యాకతం ఏకం ఖన్ధం సంసట్ఠా…పే….

కమ్మపచ్చయో

౩౪౨. కుసలం ధమ్మం సంసట్ఠో కుసలో ధమ్మో ఉప్పజ్జతి కమ్మపచ్చయా…పే… అకుసలం ధమ్మం సంసట్ఠో…పే… అబ్యాకతం ధమ్మం సంసట్ఠో…పే….

విపాకపచ్చయో

౩౪౩. అబ్యాకతం ధమ్మం సంసట్ఠో అబ్యాకతో ధమ్మో ఉప్పజ్జతి విపాకపచ్చయా – విపాకాబ్యాకతం…పే….

ఆహారాదిపచ్చయా

౩౪౪. కుసలం ధమ్మం సంసట్ఠో కుసలో ధమ్మో ఉప్పజ్జతి ఆహారపచ్చయా… ఇన్ద్రియపచ్చయా … ఝానపచ్చయా… మగ్గపచ్చయా… సమ్పయుత్తపచ్చయా. (ఇమాని పదాని హేతుపచ్చయసదిసాని.)

విప్పయుత్తపచ్చయో

౩౪౫. కుసలం ధమ్మం సంసట్ఠో కుసలో ధమ్మో ఉప్పజ్జతి విప్పయుత్తపచ్చయా – కుసలం ఏకం ఖన్ధం సంసట్ఠా తయో ఖన్ధా…పే… ద్వే ఖన్ధే సంసట్ఠా ద్వే ఖన్ధా; వత్థుం విప్పయుత్తపచ్చయా.

అకుసలం ధమ్మం…పే… వత్థుం విప్పయుత్తపచ్చయా.

అబ్యాకతం ధమ్మం…పే… వత్థుం విప్పయుత్తపచ్చయా.

అత్థిఆదిపచ్చయా

౩౪౬. కుసలం ధమ్మం సంసట్ఠో కుసలో ధమ్మో ఉప్పజ్జతి అత్థిపచ్చయా… నత్థిపచ్చయా… విగతపచ్చయా… అవిగతపచ్చయా (హేతుపచ్చయసదిసం).