౧. పచ్చయానులోమం

౧. విభఙ్గవారో

హేతుపచ్చయో

౧. సంకిలిట్ఠసంకిలేసికం ధమ్మం పటిచ్చ సంకిలిట్ఠసంకిలేసికో ధమ్మో ఉప్పజ్జతి హేతుపచ్చయా – సంకిలిట్ఠసంకిలేసికం ఏకం ఖన్ధం పటిచ్చ తయో ఖన్ధా…పే… ద్వే ఖన్ధే పటిచ్చ ద్వే ఖన్ధా. (౧)

సంకిలిట్ఠసంకిలేసికం ధమ్మం పటిచ్చ అసంకిలిట్ఠసంకిలేసికో ధమ్మో ఉప్పజ్జతి హేతుపచ్చయా – సంకిలిట్ఠసంకిలేసికే ఖన్ధే పటిచ్చ చిత్తసముట్ఠానం రూపం. (౨)

సంకిలిట్ఠసంకిలేసికం ధమ్మం పటిచ్చ సంకిలిట్ఠసంకిలేసికో చ అసంకిలిట్ఠసంకిలేసికో చ ధమ్మా ఉప్పజ్జన్తి హేతుపచ్చయా – సంకిలిట్ఠసంకిలేసికం ఏకం ఖన్ధం పటిచ్చ తయో ఖన్ధా చిత్తసముట్ఠానఞ్చ రూపం…పే… ద్వే ఖన్ధే పటిచ్చ ద్వే ఖన్ధా చిత్తసముట్ఠానఞ్చ రూపం. (౩)

అసంకిలిట్ఠసంకిలేసికం ధమ్మం పటిచ్చ అసంకిలిట్ఠసంకిలేసికో ధమ్మో ఉప్పజ్జతి హేతుపచ్చయా – అసంకిలిట్ఠసంకిలేసికం ఏకం ఖన్ధం పటిచ్చ తయో ఖన్ధా చిత్తసముట్ఠానఞ్చ రూపం…పే… ద్వే ఖన్ధే పటిచ్చ ద్వే ఖన్ధా చిత్తసముట్ఠానఞ్చ రూపం; పటిసన్ధిక్ఖణే అసంకిలిట్ఠసంకిలేసికం ఏకం ఖన్ధం పటిచ్చ తయో ఖన్ధా కటత్తా చ రూపం…పే… ద్వే ఖన్ధే పటిచ్చ ద్వే ఖన్ధా కటత్తా చ రూపం; ఖన్ధే పటిచ్చ వత్థు, వత్థుం పటిచ్చ ఖన్ధా; ఏకం మహాభూతం పటిచ్చ తయో మహాభూతా…పే… మహాభూతే పటిచ్చ చిత్తసముట్ఠానం రూపం కటత్తారూపం ఉపాదారూపం. (౧)

౨. అసంకిలిట్ఠఅసంకిలేసికం ధమ్మం పటిచ్చ అసంకిలిట్ఠఅసంకిలేసికో ధమ్మో ఉప్పజ్జతి హేతుపచ్చయా – అసంకిలిట్ఠఅసంకిలేసికం ఏకం ఖన్ధం పటిచ్చ తయో ఖన్ధా…పే… ద్వే ఖన్ధే పటిచ్చ ద్వే ఖన్ధా. (౧)

అసంకిలిట్ఠఅసంకిలేసికం ధమ్మం పటిచ్చ అసంకిలిట్ఠసంకిలేసికో ధమ్మో ఉప్పజ్జతి హేతుపచ్చయా – అసంకిలిట్ఠఅసంకిలేసికే ఖన్ధే పటిచ్చ చిత్తసముట్ఠానం రూపం. (౨)

అసంకిలిట్ఠఅసంకిలేసికం ధమ్మం పటిచ్చ అసంకిలిట్ఠసంకిలేసికో చ అసంకిలిట్ఠఅసంకిలేసికో చ ధమ్మా ఉప్పజ్జన్తి హేతుపచ్చయా – అసంకిలిట్ఠఅసంకిలేసికం ఏకం ఖన్ధం పటిచ్చ తయో ఖన్ధా చిత్తసముట్ఠానఞ్చ రూపం…పే… ద్వే ఖన్ధే పటిచ్చ ద్వే ఖన్ధా చిత్తసముట్ఠానఞ్చ రూపం. (౩)

అసంకిలిట్ఠసంకిలేసికఞ్చ అసంకిలిట్ఠఅసంకిలేసికఞ్చ ధమ్మం పటిచ్చ అసంకిలిట్ఠసంకిలేసికో ధమ్మో ఉప్పజ్జతి హేతుపచ్చయా – అసంకిలిట్ఠఅసంకిలేసికే ఖన్ధే చ మహాభూతే చ పటిచ్చ చిత్తసముట్ఠానం రూపం. (౧)

సంకిలిట్ఠసంకిలేసికఞ్చ అసంకిలిట్ఠసంకిలేసికఞ్చ ధమ్మం పటిచ్చ అసంకిలిట్ఠసంకిలేసికో ధమ్మో ఉప్పజ్జతి హేతుపచ్చయా – సంకిలిట్ఠసంకిలేసికే ఖన్ధే చ మహాభూతే చ పటిచ్చ చిత్తసముట్ఠానం రూపం (సంఖిత్తం). (౧)