౨. అనాగతాదిఏకచ్చకథా

౩౦౦. అనాగతం అత్థీతి? ఏకచ్చం అత్థి, ఏకచ్చం నత్థీతి. ఏకచ్చం జాతం, ఏకచ్చం అజాతం; ఏకచ్చం సఞ్జాతం, ఏకచ్చం అసఞ్జాతం; ఏకచ్చం నిబ్బత్తం, ఏకచ్చం అనిబ్బత్తం; ఏకచ్చం పాతుభూతం, ఏకచ్చం అపాతుభూతన్తి? న హేవం వత్తబ్బే…పే….

అనాగతం ఏకచ్చం అత్థి, ఏకచ్చం నత్థీతి? ఆమన్తా. అనాగతా ఉప్పాదినో ధమ్మా ఏకచ్చే అత్థి, ఏకచ్చే నత్థీతి? న హేవం వత్తబ్బే…పే… అనాగతం ఏకచ్చం అత్థి, ఏకచ్చం నత్థీతి? ఆమన్తా. అనాగతా అనుప్పాదినో ధమ్మా ఏకచ్చే అత్థి, ఏకచ్చే నత్థీతి? న హేవం వత్తబ్బే…పే….

అనాగతం ఏకచ్చం అత్థి, ఏకచ్చం నత్థీతి? ఆమన్తా. కిం అత్థి, కిం నత్థీతి? అనాగతా ఉప్పాదినో ధమ్మా – తే అత్థి; అనాగతా అనుప్పాదినో ధమ్మా – తే నత్థీతి. అనాగతా ఉప్పాదినో ధమ్మా – తే అత్థీతి? ఆమన్తా. అనాగతా అనుప్పాదినో ధమ్మా – తే అత్థీతి? న హేవం వత్తబ్బే…పే… అనాగతా అనుప్పాదినో ధమ్మా – తే నత్థీతి? ఆమన్తా. అనాగతా ఉప్పాదినో ధమ్మా – తే నత్థీతి? న హేవం వత్తబ్బే…పే….

అనాగతా ఉప్పాదినో ధమ్మా – తే అత్థీతి? ఆమన్తా. నను అనాగతా ఉప్పాదినో ధమ్మా అజాతాతి? ఆమన్తా. హఞ్చి అనాగతా ఉప్పాదినో ధమ్మా అజాతా, నో చ వత రే వత్తబ్బే – ‘‘అనాగతా ఉప్పాదినో ధమ్మా – తే అత్థీ’’తి.

అనాగతా ఉప్పాదినో ధమ్మా అజాతా – తే అత్థీతి? ఆమన్తా. అనాగతా అనుప్పాదినో ధమ్మా అజాతా – తే అత్థీతి? న హేవం వత్తబ్బే…పే… అనాగతా అనుప్పాదినో ధమ్మా అజాతా – తే నత్థీతి? ఆమన్తా. అనాగతా ఉప్పాదినో ధమ్మా అజాతా – తే నత్థీతి? న హేవం వత్తబ్బే…పే….

న వత్తబ్బం – ‘‘అనాగతా ఉప్పాదినో ధమ్మా – తే అత్థీ’’తి? ఆమన్తా. నను అనాగతా ఉప్పాదినో ధమ్మా ఉప్పజ్జిస్సన్తీతి? ఆమన్తా. హఞ్చి అనాగతా ఉప్పాదినో ధమ్మా ఉప్పజ్జిస్సన్తి, తేన వత రే వత్తబ్బే – ‘‘అనాగతా ఉప్పాదినో ధమ్మా – తే అత్థీ’’తి.

అనాగతా ఉప్పాదినో ధమ్మా ఉప్పజ్జిస్సన్తీతి కత్వా తే అత్థీతి? ఆమన్తా. ఉప్పజ్జిస్సన్తీతి కత్వా పచ్చుప్పన్నాతి? న హేవం వత్తబ్బే…పే… ఉప్పజ్జిస్సన్తీతి కత్వా పచ్చుప్పన్నాతి? ఆమన్తా. పచ్చుప్పన్నా ధమ్మా నిరుజ్ఝిస్సన్తీతి కత్వా తే నత్థీతి? న హేవం వత్తబ్బే…పే….

ఏకచ్చం అత్థీతికథా నిట్ఠితా.