౭. ఏకచ్చం అత్థీతికథా

౧. అతీతాదిఏకచ్చకథా

౨౯౯. అతీతం అత్థీతి? ఏకచ్చం అత్థి, ఏకచ్చం నత్థీతి. ఏకచ్చం నిరుద్ధం, ఏకచ్చం న నిరుద్ధం; ఏకచ్చం విగతం, ఏకచ్చం అవిగతం; ఏకచ్చం అత్థఙ్గతం, ఏకచ్చం న అత్థఙ్గతం; ఏకచ్చం అబ్భత్థఙ్గతం, ఏకచ్చం న అబ్భత్థఙ్గతన్తి? న హేవం వత్తబ్బే…పే….

అతీతం ఏకచ్చం అత్థి, ఏకచ్చం నత్థీతి? ఆమన్తా. అతీతా అవిపక్కవిపాకా ధమ్మా ఏకచ్చే అత్థి, ఏకచ్చే నత్థీతి? న హేవం వత్తబ్బే…పే… అతీతం ఏకచ్చం అత్థి, ఏకచ్చం నత్థీతి? ఆమన్తా. అతీతా విపక్కవిపాకా ధమ్మా ఏకచ్చే అత్థి, ఏకచ్చే నత్థీతి? న హేవం వత్తబ్బే…పే… అతీతం ఏకచ్చం అత్థి, ఏకచ్చం నత్థీతి? ఆమన్తా. అతీతా అవిపాకా ధమ్మా ఏకచ్చే అత్థి ఏకచ్చే నత్థీతి? న హేవం వత్తబ్బే…పే….

అతీతం ఏకచ్చం అత్థి ఏకచ్చం నత్థీతి? ఆమన్తా. కిం అత్థి కిం నత్థీతి? అతీతా అవిపక్కవిపాకా ధమ్మా – తే అత్థి; అతీతా విపక్కవిపాకా ధమ్మా – తే నత్థీతి. అతీతా అవిపక్కవిపాకా ధమ్మా – తే అత్థీతి? ఆమన్తా. అతీతా విపక్కవిపాకా ధమ్మా – తే అత్థీతి? న హేవం వత్తబ్బే…పే… అతీతా అవిపక్కవిపాకా ధమ్మా – తే అత్థీతి? ఆమన్తా. అతీతా అవిపాకా ధమ్మా – తే అత్థీతి [అతీతా అవిపక్కవిపాకా ధమ్మా తే నత్థీతి (క.)]? న హేవం వత్తబ్బే…పే….

అతీతా విపక్కవిపాకా ధమ్మా – తే నత్థీతి? ఆమన్తా. అతీతా అవిపక్కవిపాకా ధమ్మా – తే నత్థీతి? న హేవం వత్తబ్బే …పే….

అతీతా అవిపాకా [విపక్కవిపాకా (స్యా.), అవిపక్కవిపాకా (క.)] ధమ్మా – తే నత్థీతి? ఆమన్తా. అతీతా అవిపక్కవిపాకా [అవిపాకా (స్యా.)] ధమ్మా – తే నత్థీతి? న హేవం వత్తబ్బే…పే….

అతీతా అవిపక్కవిపాకా ధమ్మా – తే అత్థీతి? ఆమన్తా. నను అతీతా అవిపక్కవిపాకా ధమ్మా నిరుద్ధాతి? ఆమన్తా. హఞ్చి అతీతా అవిపక్కవిపాకా ధమ్మా నిరుద్ధా, నో చ వత రే వత్తబ్బే – ‘‘అతీతా అవిపక్కవిపాకా ధమ్మా – తే [ధమ్మా నిరుద్ధా తే (స్యా. క.)] అత్థీ’’తి.

అతీతా అవిపక్కవిపాకా ధమ్మా నిరుద్ధా – తే అత్థీతి? ఆమన్తా. అతీతా విపక్కవిపాకా ధమ్మా నిరుద్ధా – తే అత్థీతి? న హేవం వత్తబ్బే…పే… అతీతా అవిపక్కవిపాకా ధమ్మా నిరుద్ధా – తే అత్థీతి? ఆమన్తా. అతీతా అవిపాకా [అవిపక్కవిపాకా (సీ. క.)] ధమ్మా నిరుద్ధా – తే అత్థీతి? న హేవం వత్తబ్బే…పే….

అతీతా విపక్కవిపాకా ధమ్మా నిరుద్ధా – తే నత్థీతి? ఆమన్తా. అతీతా అవిపక్కవిపాకా ధమ్మా నిరుద్ధా – తే నత్థీతి? న హేవం వత్తబ్బే…పే….

అతీతా అవిపాకా [విపక్కవిపాకా (స్యా.), అవిపక్కవిపాకా (క.)] ధమ్మా నిరుద్ధా – తే నత్థీతి? ఆమన్తా. అతీతా అవిపక్కవిపాకా [అవిపాకా (స్యా.)] ధమ్మా నిరుద్ధా – తే నత్థీతి? న హేవం వత్తబ్బే…పే….

అతీతా అవిపక్కవిపాకా ధమ్మా నిరుద్ధా – తే అత్థీతి? ఆమన్తా. అతీతా విపక్కవిపాకా ధమ్మా నిరుద్ధా – తే నత్థీతి? ఆమన్తా. అతీతా ఏకదేసం విపక్కవిపాకా ధమ్మా ఏకదేసం అవిపక్కవిపాకా ధమ్మా నిరుద్ధా – తే ఏకచ్చే అత్థి ఏకచ్చే నత్థీతి? న హేవం వత్తబ్బే…పే….

న వత్తబ్బం – ‘‘అతీతా అవిపక్కవిపాకా ధమ్మా – తే అత్థీ’’తి? ఆమన్తా. నను అతీతా అవిపక్కవిపాకా ధమ్మా విపచ్చిస్సన్తీతి? ఆమన్తా. హఞ్చి అతీతా అవిపక్కవిపాకా ధమ్మా విపచ్చిస్సన్తి, తేన వత రే వత్తబ్బే – ‘‘అతీతా అవిపక్కవిపాకా ధమ్మా – తే అత్థీ’’తి.

అతీతా అవిపక్కవిపాకా ధమ్మా విపచ్చిస్సన్తీతి కత్వా తే అత్థీతి? ఆమన్తా. విపచ్చిస్సన్తీతి కత్వా పచ్చుప్పన్నాతి? న హేవం వత్తబ్బే…పే… విపచ్చిస్సన్తీతి కత్వా పచ్చుప్పన్నాతి? ఆమన్తా. పచ్చుప్పన్నా ధమ్మా నిరుజ్ఝిస్సన్తీతి కత్వా తే నత్థీతి? న హేవం వత్తబ్బే…పే….

౨. అనాగతాదిఏకచ్చకథా

౩౦౦. అనాగతం అత్థీతి? ఏకచ్చం అత్థి, ఏకచ్చం నత్థీతి. ఏకచ్చం జాతం, ఏకచ్చం అజాతం; ఏకచ్చం సఞ్జాతం, ఏకచ్చం అసఞ్జాతం; ఏకచ్చం నిబ్బత్తం, ఏకచ్చం అనిబ్బత్తం; ఏకచ్చం పాతుభూతం, ఏకచ్చం అపాతుభూతన్తి? న హేవం వత్తబ్బే…పే….

అనాగతం ఏకచ్చం అత్థి, ఏకచ్చం నత్థీతి? ఆమన్తా. అనాగతా ఉప్పాదినో ధమ్మా ఏకచ్చే అత్థి, ఏకచ్చే నత్థీతి? న హేవం వత్తబ్బే…పే… అనాగతం ఏకచ్చం అత్థి, ఏకచ్చం నత్థీతి? ఆమన్తా. అనాగతా అనుప్పాదినో ధమ్మా ఏకచ్చే అత్థి, ఏకచ్చే నత్థీతి? న హేవం వత్తబ్బే…పే….

అనాగతం ఏకచ్చం అత్థి, ఏకచ్చం నత్థీతి? ఆమన్తా. కిం అత్థి, కిం నత్థీతి? అనాగతా ఉప్పాదినో ధమ్మా – తే అత్థి; అనాగతా అనుప్పాదినో ధమ్మా – తే నత్థీతి. అనాగతా ఉప్పాదినో ధమ్మా – తే అత్థీతి? ఆమన్తా. అనాగతా అనుప్పాదినో ధమ్మా – తే అత్థీతి? న హేవం వత్తబ్బే…పే… అనాగతా అనుప్పాదినో ధమ్మా – తే నత్థీతి? ఆమన్తా. అనాగతా ఉప్పాదినో ధమ్మా – తే నత్థీతి? న హేవం వత్తబ్బే…పే….

అనాగతా ఉప్పాదినో ధమ్మా – తే అత్థీతి? ఆమన్తా. నను అనాగతా ఉప్పాదినో ధమ్మా అజాతాతి? ఆమన్తా. హఞ్చి అనాగతా ఉప్పాదినో ధమ్మా అజాతా, నో చ వత రే వత్తబ్బే – ‘‘అనాగతా ఉప్పాదినో ధమ్మా – తే అత్థీ’’తి.

అనాగతా ఉప్పాదినో ధమ్మా అజాతా – తే అత్థీతి? ఆమన్తా. అనాగతా అనుప్పాదినో ధమ్మా అజాతా – తే అత్థీతి? న హేవం వత్తబ్బే…పే… అనాగతా అనుప్పాదినో ధమ్మా అజాతా – తే నత్థీతి? ఆమన్తా. అనాగతా ఉప్పాదినో ధమ్మా అజాతా – తే నత్థీతి? న హేవం వత్తబ్బే…పే….

న వత్తబ్బం – ‘‘అనాగతా ఉప్పాదినో ధమ్మా – తే అత్థీ’’తి? ఆమన్తా. నను అనాగతా ఉప్పాదినో ధమ్మా ఉప్పజ్జిస్సన్తీతి? ఆమన్తా. హఞ్చి అనాగతా ఉప్పాదినో ధమ్మా ఉప్పజ్జిస్సన్తి, తేన వత రే వత్తబ్బే – ‘‘అనాగతా ఉప్పాదినో ధమ్మా – తే అత్థీ’’తి.

అనాగతా ఉప్పాదినో ధమ్మా ఉప్పజ్జిస్సన్తీతి కత్వా తే అత్థీతి? ఆమన్తా. ఉప్పజ్జిస్సన్తీతి కత్వా పచ్చుప్పన్నాతి? న హేవం వత్తబ్బే…పే… ఉప్పజ్జిస్సన్తీతి కత్వా పచ్చుప్పన్నాతి? ఆమన్తా. పచ్చుప్పన్నా ధమ్మా నిరుజ్ఝిస్సన్తీతి కత్వా తే నత్థీతి? న హేవం వత్తబ్బే…పే….

ఏకచ్చం అత్థీతికథా నిట్ఠితా.