(౧౮౬) ౧. కిలేసజహనకథా

౮౨౮. అతీతే కిలేసే జహతీతి? ఆమన్తా. నిరుద్ధం నిరోధేతి, విగతం విగమేతి, ఖీణం ఖేపేతి, అత్థఙ్గతం అత్థఙ్గమేతి, అబ్భత్థఙ్గతం అబ్భత్థఙ్గమేతీతి? న హేవం వత్తబ్బే…పే… అతీతే కిలేసే జహతీతి? ఆమన్తా. నను అతీతం నిరుద్ధన్తి? ఆమన్తా. హఞ్చి అతీతం నిరుద్ధం, నో చ వత రే వత్తబ్బే – ‘‘అతీతే కిలేసే జహతీ’’తి. అతీతే కిలేసే జహతీతి? ఆమన్తా. నను అతీతం నత్థీతి? ఆమన్తా. హఞ్చి అతీతం నత్థి, నో చ వత రే వత్తబ్బే – ‘‘అతీతే కిలేసే జహతీ’’తి.

౮౨౯. అనాగతే కిలేసే జహతీతి? ఆమన్తా. అజాతం అజనేతి, అసఞ్జాతం అసఞ్జనేతి, అనిబ్బత్తం అనిబ్బత్తేతి, అపాతుభూతం అపాతుభావేతీతి? న హేవం వత్తబ్బే…పే… అనాగతే కిలేసే జహతీతి? ఆమన్తా. నను అనాగతం అజాతన్తి? ఆమన్తా. హఞ్చి అనాగతం అజాతం, నో చ వత రే వత్తబ్బే – ‘‘అనాగతే కిలేసే జహతీ’’తి. అనాగతే కిలేసే జహతీతి? ఆమన్తా. నను అనాగతం నత్థీతి? ఆమన్తా. హఞ్చి అనాగతం నత్థి, నో చ వత రే వత్తబ్బే – ‘‘అనాగతే కిలేసే జహతీ’’తి.

౮౩౦. పచ్చుప్పన్నే కిలేసే జహతీతి? ఆమన్తా. రత్తో రాగం జహతి, దుట్ఠో దోసం జహతి, మూళ్హో మోహం జహతి, కిలిట్ఠో కిలేసే జహతీతి? న హేవం వత్తబ్బే…పే… రాగేన రాగం జహతి, దోసేన దోసం జహతి, మోహేన మోహం జహతి, కిలేసేహి కిలేసే జహతీతి? న హేవం వత్తబ్బే…పే….

రాగో చిత్తసమ్పయుత్తో, మగ్గో చిత్తసమ్పయుత్తోతి? ఆమన్తా. ద్విన్నం చిత్తానం సమోధానం హోతీతి? న హేవం వత్తబ్బే…పే….

రాగో అకుసలో, మగ్గో కుసలోతి? ఆమన్తా. కుసలాకుసలా సావజ్జానవజ్జా హీనపణీతా కణ్హసుక్కసప్పటిభాగా ధమ్మా సమ్ముఖీభావం ఆగచ్ఛన్తీతి? న హేవం వత్తబ్బే…పే….

కుసలాకుసలా సావజ్జానవజ్జా హీనపణీతా కణ్హసుక్కసప్పటిభాగా ధమ్మా సమ్ముఖీభావం ఆగచ్ఛన్తీతి? ఆమన్తా. నను వుత్తం భగవతా – ‘‘చత్తారిమాని, భిక్ఖవే, సువిదూరవిదూరాని! కతమాని చత్తారి? నభఞ్చ, భిక్ఖవే, పథవీ చ – ఇదం పఠమం సువిదూరవిదూరం…పే… తస్మా సతం ధమ్మో అసబ్భి ఆరకా’’తి. అత్థేవ సుత్తన్తోతి? ఆమన్తా. తేన హి న వత్తబ్బం – ‘‘కుసలాకుసలా…పే… సమ్ముఖీభావం ఆగచ్ఛన్తీ’’తి.

౮౩౧. న వత్తబ్బం – ‘‘అతీతే కిలేసే జహతి, అనాగతే కిలేసే జహతి, పచ్చుప్పన్నే కిలేసే జహతీ’’తి? ఆమన్తా. నత్థి కిలేసే జహతీతి? న హేవం వత్తబ్బే…పే… తేన హి అతీతే కిలేసే జహతి, అనాగతే కిలేసే జహతి, పచ్చుప్పన్నే కిలేసే జహతీతి.

కిలేసజహనకథా నిట్ఠితా.