౧౯. ఏకూనవీసతిమవగ్గో

(౧౮౭) ౨. సుఞ్ఞతాకథా

౮౩౨. సుఞ్ఞతా సఙ్ఖారక్ఖన్ధపరియాపన్నాతి? ఆమన్తా. అనిమిత్తం సఙ్ఖారక్ఖన్ధపరియాపన్నన్తి? న హేవం వత్తబ్బే…పే… సుఞ్ఞతా సఙ్ఖారక్ఖన్ధపరియాపన్నాతి? ఆమన్తా. అప్పణిహితో సఙ్ఖారక్ఖన్ధపరియాపన్నోతి? న హేవం వత్తబ్బే…పే… అనిమిత్తం న వత్తబ్బం – ‘‘సఙ్ఖారక్ఖన్ధపరియాపన్న’’న్తి? ఆమన్తా. సుఞ్ఞతా న వత్తబ్బా – ‘‘సఙ్ఖారక్ఖన్ధపరియాపన్నా’’తి? న హేవం వత్తబ్బే…పే… అప్పణిహితో న వత్తబ్బో – ‘‘సఙ్ఖారక్ఖన్ధపరియాపన్నో’’తి? ఆమన్తా. సుఞ్ఞతా న వత్తబ్బా – ‘‘సఙ్ఖారక్ఖన్ధపరియాపన్నా’’తి? న హేవం వత్తబ్బే…పే….

సుఞ్ఞతా సఙ్ఖారక్ఖన్ధపరియాపన్నాతి? ఆమన్తా. సఙ్ఖారక్ఖన్ధో న అనిచ్చో న సఙ్ఖతో న పటిచ్చసముప్పన్నో న ఖయధమ్మో న వయధమ్మో న విరాగధమ్మో న నిరోధధమ్మో న విపరిణామధమ్మోతి? న హేవం వత్తబ్బే…పే… నను సఙ్ఖారక్ఖన్ధో అనిచ్చో సఙ్ఖతో పటిచ్చసముప్పన్నో ఖయధమ్మో వయధమ్మో విరాగధమ్మో నిరోధధమ్మో విపరిణామధమ్మోతి? ఆమన్తా. హఞ్చి సఙ్ఖారక్ఖన్ధో అనిచ్చో…పే… విపరిణామధమ్మో, నో చ వత రే వత్తబ్బే – ‘‘సుఞ్ఞతా సఙ్ఖారక్ఖన్ధపరియాపన్నా’’తి.

౮౩౩. రూపక్ఖన్ధస్స సుఞ్ఞతా సఙ్ఖారక్ఖన్ధపరియాపన్నాతి? ఆమన్తా. సఙ్ఖారక్ఖన్ధస్స సుఞ్ఞతా రూపక్ఖన్ధపరియాపన్నాతి? న హేవం వత్తబ్బే…పే… వేదనాక్ఖన్ధస్స…పే… సఞ్ఞాక్ఖన్ధస్స… విఞ్ఞాణక్ఖన్ధస్స సుఞ్ఞతా సఙ్ఖారక్ఖన్ధపరియాపన్నాతి? ఆమన్తా. సఙ్ఖారక్ఖన్ధస్స సుఞ్ఞతా విఞ్ఞాణక్ఖన్ధపరియాపన్నాతి? న హేవం వత్తబ్బే…పే….

సఙ్ఖారక్ఖన్ధస్స సుఞ్ఞతా న వత్తబ్బా – ‘‘రూపక్ఖన్ధపరియాపన్నా’’తి? ఆమన్తా. రూపక్ఖన్ధస్స సుఞ్ఞతా న వత్తబ్బా – ‘‘సఙ్ఖారక్ఖన్ధపరియాపన్నా’’తి? న హేవం వత్తబ్బే…పే… సఙ్ఖారక్ఖన్ధస్స సుఞ్ఞతా న వత్తబ్బా – ‘‘వేదనాక్ఖన్ధపరియాపన్నా…పే… సఞ్ఞాక్ఖన్ధపరియాపన్నా… విఞ్ఞాణక్ఖన్ధపరియాపన్నా’’తి? ఆమన్తా. విఞ్ఞాణక్ఖన్ధస్స సుఞ్ఞతా న వత్తబ్బా – ‘‘సఙ్ఖారక్ఖన్ధపరియాపన్నా’’తి? న హేవం వత్తబ్బే…పే….

౮౩౪. న వత్తబ్బం – సుఞ్ఞతా సఙ్ఖారక్ఖన్ధపరియాపన్నా’’తి? ఆమన్తా. నను వుత్తం భగవతా – ‘‘సుఞ్ఞమిదం, భిక్ఖవే, సఙ్ఖారా అత్తేన వా అత్తనియేన వా’’తి [మ. ని. ౩.౬౯ ఆనేఞ్జసప్పాయే]! అత్థేవ సుత్తన్తోతి? ఆమన్తా. తేన హి సుఞ్ఞతా సఙ్ఖారక్ఖన్ధపరియాపన్నాతి.

సుఞ్ఞతాకథా నిట్ఠితా.