(౭౪) ౨. అన్తరాభవకథా

౫౦౫. అత్థి అన్తరాభవోతి? ఆమన్తా. కామభవోతి? న హేవం వత్తబ్బే…పే… అత్థి అన్తరాభవోతి? ఆమన్తా. రూపభవోతి? న హేవం వత్తబ్బే…పే… అత్థి అన్తరాభవోతి? ఆమన్తా. అరూపభవోతి? న హేవం వత్తబ్బే…పే… అత్థి అన్తరాభవోతి? ఆమన్తా. కామభవస్స చ రూపభవస్స చ అన్తరే అత్థి అన్తరాభవోతి? న హేవం వత్తబ్బే…పే… అత్థి అన్తరాభవోతి? ఆమన్తా. రూపభవస్స చ అరూపభవస్స చ అన్తరే అత్థి అన్తరాభవోతి? న హేవం వత్తబ్బే…పే….

కామభవస్స చ రూపభవస్స చ అన్తరే నత్థి అన్తరాభవోతి? ఆమన్తా. హఞ్చి కామభవస్స చ రూపభవస్స చ అన్తరే నత్థి అన్తరాభవో, నో చ వత రే వత్తబ్బే – ‘‘అత్థి అన్తరాభవో’’తి. రూపభవస్స చ అరూపభవస్స చ అన్తరే నత్థి అన్తరాభవోతి? ఆమన్తా. హఞ్చి రూపభవస్స చ అరూపభవస్స చ అన్తరే నత్థి అన్తరాభవో, నో చ వత రే వత్తబ్బే – ‘‘అత్థి అన్తరాభవో’’తి.

౫౦౬. అత్థి అన్తరాభవోతి? ఆమన్తా. పఞ్చమీ సా యోని, ఛట్ఠమీ సా గతి, అట్ఠమీ సా విఞ్ఞాణట్ఠితి, దసమో సో సత్తావాసోతి? న హేవం వత్తబ్బే…పే… అత్థి అన్తరాభవోతి? ఆమన్తా. అన్తరాభవో భవో గతి సత్తావాసో సంసారో యోని విఞ్ఞాణట్ఠితి అత్తభావపటిలాభోతి? న హేవం వత్తబ్బే…పే… అత్థి అన్తరాభవూపగం కమ్మన్తి? న హేవం వత్తబ్బే…పే… అత్థి అన్తరాభవూపగా సత్తాతి? న హేవం వత్తబ్బే…పే… అన్తరాభవే సత్తా జాయన్తి జీయన్తి మీయన్తి చవన్తి ఉపపజ్జన్తీతి? న హేవం వత్తబ్బే…పే… అన్తరాభవే అత్థి రూపం వేదనా సఞ్ఞా సఙ్ఖారా విఞ్ఞాణన్తి? న హేవం వత్తబ్బే…పే… అన్తరాభవో పఞ్చవోకారభవోతి? న హేవం వత్తబ్బే…పే….

౫౦౭. అత్థి కామభవో, కామభవో భవో గతి సత్తావాసో సంసారో యోని విఞ్ఞాణట్ఠితి అత్తభావపటిలాభోతి? ఆమన్తా. అత్థి అన్తరాభవో, అన్తరాభవో భవో గతి సత్తావాసో సంసారో యోని విఞ్ఞాణట్ఠితి అత్తభావపటిలాభోతి? న హేవం వత్తబ్బే…పే… అత్థి కామభవూపగం కమ్మన్తి? ఆమన్తా. అత్థి అన్తరాభవూపగం కమ్మన్తి? న హేవం వత్తబ్బే…పే… అత్థి కామభవూపగా సత్తాతి? ఆమన్తా. అత్థి అన్తరాభవూపగా సత్తాతి? న హేవం వత్తబ్బే…పే… కామభవే సత్తా జాయన్తి జీయన్తి మీయన్తి చవన్తి ఉపపజ్జన్తీతి? ఆమన్తా. అన్తరాభవే సత్తా జాయన్తి జీయన్తి మీయన్తి చవన్తి ఉపపజ్జన్తీతి? న హేవం వత్తబ్బే…పే… కామభవే అత్థి రూపం వేదనా సఞ్ఞా సఙ్ఖారా విఞ్ఞాణన్తి? ఆమన్తా. అన్తరాభవే అత్థి రూపం వేదనా సఞ్ఞా సఙ్ఖారా విఞ్ఞాణన్తి? న హేవం వత్తబ్బే…పే… కామభవో పఞ్చవోకారభవోతి? ఆమన్తా. అన్తరాభవో పఞ్చవోకారభవోతి? న హేవం వత్తబ్బే…పే….

అత్థి రూపభవో, రూపభవో భవో గతి సత్తావాసో సంసారో యోని విఞ్ఞాణట్ఠితి అత్తభావపటిలాభోతి? ఆమన్తా. అత్థి అన్తరాభవో, అన్తరాభవో భవో గతి సత్తావాసో సంసారో యోని విఞ్ఞాణట్ఠితి అత్తభావపటిలాభోతి? న హేవం వత్తబ్బే…పే… అత్థి రూపభవూపగం కమ్మన్తి? ఆమన్తా. అత్థి అన్తరాభవూపగం కమ్మన్తి? న హేవం వత్తబ్బే…పే… అత్థి రూపభవూపగా సత్తాతి? ఆమన్తా. అత్థి అన్తరాభవూపగా సత్తాతి? న హేవం వత్తబ్బే…పే… రూపభవే సత్తా జాయన్తి జీయన్తి మీయన్తి చవన్తి ఉపపజ్జన్తీతి? ఆమన్తా. అన్తరాభవే సత్తా జాయన్తి జీయన్తి మీయన్తి చవన్తి ఉపపజ్జన్తీతి? న హేవం వత్తబ్బే…పే… రూపభవే అత్థి రూపం వేదనా సఞ్ఞా సఙ్ఖారా విఞ్ఞాణన్తి? ఆమన్తా. అన్తరాభవే అత్థి రూపం వేదనా సఞ్ఞా సఙ్ఖారా విఞ్ఞాణన్తి? న హేవం వత్తబ్బే…పే… రూపభవో పఞ్చవోకారభవోతి? ఆమన్తా. అన్తరాభవో పఞ్చవోకారభవోతి? న హేవం వత్తబ్బే…పే….

అత్థి అరూపభవో, అరూపభవో భవో గతి సత్తావాసో సంసారో యోని విఞ్ఞాణట్ఠితి అత్తభావపటిలాభోతి? ఆమన్తా. అత్థి అన్తరాభవో, అన్తరాభవో భవో గతి సత్తావాసో సంసారో యోని విఞ్ఞాణట్ఠితి అత్తభావపటిలాభోతి? న హేవం వత్తబ్బే…పే… అత్థి అరూపభవూపగం కమ్మన్తి? ఆమన్తా. అత్థి అన్తరాభవూపగం కమ్మన్తి? న హేవం వత్తబ్బే…పే… అత్థి అరూపభవూపగా సత్తాతి? ఆమన్తా. అత్థి అన్తరాభవూపగా సత్తాతి? న హేవం వత్తబ్బే…పే… అరూపభవే సత్తా జాయన్తి జీయన్తి మీయన్తి చవన్తి ఉపపజ్జన్తీతి? ఆమన్తా. అన్తరాభవే సత్తా జాయన్తి జీయన్తి మీయన్తి చవన్తి ఉపపజ్జన్తీతి? న హేవం వత్తబ్బే…పే… అరూపభవే అత్థి వేదనా సఞ్ఞా సఙ్ఖారా విఞ్ఞాణన్తి? ఆమన్తా. అన్తరాభవే అత్థి వేదనా సఞ్ఞా సఙ్ఖారా విఞ్ఞాణన్తి? న హేవం వత్తబ్బే…పే… అరూపభవో చతువోకారభవోతి? ఆమన్తా. అన్తరాభవో చతువోకారభవోతి? న హేవం వత్తబ్బే…పే….

౫౦౮. అత్థి అన్తరాభవోతి? ఆమన్తా. సబ్బేసఞ్ఞేవ సత్తానం అత్థి అన్తరాభవోతి? న హేవం వత్తబ్బే …పే… సబ్బేసఞ్ఞేవ సత్తానం నత్థి అన్తరాభవోతి? ఆమన్తా. హఞ్చి సబ్బేసఞ్ఞేవ సత్తానం నత్థి అన్తరాభవో, నో చ వత రే వత్తబ్బే – ‘‘అత్థి అన్తరాభవో’’తి.

అత్థి అన్తరాభవోతి? ఆమన్తా. ఆనన్తరియస్స పుగ్గలస్స అత్థి అన్తరాభవోతి? న హేవం వత్తబ్బే…పే… ఆనన్తరియస్స పుగ్గలస్స నత్థి అన్తరాభవోతి? ఆమన్తా. హఞ్చి ఆనన్తరియస్స పుగ్గలస్స నత్థి అన్తరాభవో, నో చ వత రే వత్తబ్బే – ‘‘అత్థి అన్తరాభవో’’తి.

న ఆనన్తరియస్స పుగ్గలస్స అత్థి అన్తరాభవోతి? ఆమన్తా. ఆనన్తరియస్స పుగ్గలస్స అత్థి అన్తరాభవోతి? న హేవం వత్తబ్బే…పే… ఆనన్తరియస్స పుగ్గలస్స నత్థి అన్తరాభవోతి? ఆమన్తా. న ఆనన్తరియస్స పుగ్గలస్స నత్థి అన్తరాభవోతి? న హేవం వత్తబ్బే…పే… నిరయూపగస్స పుగ్గలస్స…పే… అసఞ్ఞసత్తూపగస్స పుగ్గలస్స …పే… అరూపూపగస్స పుగ్గలస్స అత్థి అన్తరాభవోతి? న హేవం వత్తబ్బే…పే… అరూపూపగస్స పుగ్గలస్స నత్థి అన్తరాభవోతి? ఆమన్తా. హఞ్చి అరూపూపగస్స పుగ్గలస్స నత్థి అన్తరాభవో, నో చ వత రే వత్తబ్బే – ‘‘అత్థి అన్తరాభవో’’తి.

న అరూపూపగస్స పుగ్గలస్స అత్థి అన్తరాభవోతి? ఆమన్తా. అరూపూపగస్స పుగ్గలస్స అత్థి అన్తరాభవోతి? న హేవం వత్తబ్బే…పే… అరూపూపగస్స పుగ్గలస్స నత్థి అన్తరాభవోతి? ఆమన్తా. న అరూపూపగస్స పుగ్గలస్స నత్థి అన్తరాభవోతి? న హేవం వత్తబ్బే…పే….

౫౦౯. న వత్తబ్బం అత్థి అన్తరాభవోతి? ఆమన్తా. నను అన్తరాపరినిబ్బాయీ పుగ్గలో అత్థీతి? ఆమన్తా. హఞ్చి అన్తరాపరినిబ్బాయీ పుగ్గలో అత్థి, తేన వత రే [నో చ వత రే (సీ. క.), నో వత రే (స్యా.)] వత్తబ్బే – ‘‘అత్థి అన్తరాభవో’’తి.

అన్తరాపరినిబ్బాయీ పుగ్గలో అత్థీతి కత్వా అత్థి అన్తరాభవోతి? ఆమన్తా. ఉపహచ్చపరినిబ్బాయీ పుగ్గలో అత్థీతి కత్వా అత్థి ఉపహచ్చభవోతి? న హేవం వత్తబ్బే…పే… అన్తరాపరినిబ్బాయీ పుగ్గలో అత్థీతి కత్వా అత్థి అన్తరాభవోతి? ఆమన్తా. అసఙ్ఖారపరినిబ్బాయీ పుగ్గలో…పే… ససఙ్ఖారపరినిబ్బాయీ పుగ్గలో అత్థీతి కత్వా అత్థి ససఙ్ఖారభవోతి? న హేవం వత్తబ్బే…పే….

అన్తరాభవకథా నిట్ఠితా.