౮. అట్ఠమవగ్గో

(౮౩) ౧౧. కమ్మహేతుకథా

౫౪౬. కమ్మహేతు అరహా అరహత్తా పరిహాయతీతి? ఆమన్తా. కమ్మహేతు సోతాపన్నో సోతాపత్తిఫలా పరిహాయతీతి? న హేవం వత్తబ్బే…పే… కమ్మహేతు అరహా అరహత్తా పరిహాయతీతి? ఆమన్తా. కమ్మహేతు సకదాగామీ…పే… అనాగామీ అనాగామిఫలా పరిహాయతీతి? న హేవం వత్తబ్బే…పే….

కమ్మహేతు సోతాపన్నో సోతాపత్తిఫలా న పరిహాయతీతి? ఆమన్తా. కమ్మహేతు అరహా అరహత్తా న పరిహాయతీతి? న హేవం వత్తబ్బే …పే… కమ్మహేతు సకదాగామీ…పే… అనాగామీ అనాగామిఫలా న పరిహాయతీతి? ఆమన్తా. కమ్మహేతు అరహా అరహత్తా న పరిహాయతీతి? న హేవం వత్తబ్బే…పే….

కమ్మహేతు అరహా అరహత్తా పరిహాయతీతి? ఆమన్తా. పాణాతిపాతకమ్మస్స హేతూతి? న హేవం వత్తబ్బే…పే… అదిన్నాదానకమ్మస్స హేతు…పే… కామేసుమిచ్ఛాచారకమ్మస్స హేతు… ముసావాదకమ్మస్స హేతు… పిసుణవాచాకమ్మస్స హేతు… ఫరుసవాచాకమ్మస్స హేతు… సమ్ఫప్పలాపకమ్మస్స హేతు… మాతుఘాతకమ్మస్స [మాతుఘాతకకమ్మస్స (స్యా.), మాతుఘాతికమ్మస్స (క.) తథా పితుఘాతఅరహన్తఘాతకమ్మస్సాతిపదేసు] హేతు… పితుఘాతకమ్మస్స హేతు… అరహన్తఘాతకమ్మస్స హేతు… రుహిరుప్పాదకమ్మస్స హేతు…పే… సఙ్ఘభేదకమ్మస్స హేతూతి? న హేవం వత్తబ్బే…పే….

కతమస్స కమ్మస్స హేతూతి? హన్ద హి అరహన్తానం అబ్భాచిక్ఖతీతి. అరహన్తానం అబ్భాచిక్ఖనకమ్మస్స హేతు అరహా అరహత్తా పరిహాయతీతి? ఆమన్తా. యే కేచి అరహన్తానం అబ్భాచిక్ఖన్తి, సబ్బే తే అరహత్తం సచ్ఛికరోన్తీతి? న హేవం వత్తబ్బే…పే….

కమ్మహేతుకథా నిట్ఠితా.

అట్ఠమవగ్గో.

తస్సుద్దానం –

ఛ గతియో, అన్తరాభవో, పఞ్చేవ కామగుణా కామధాతు, పఞ్చేవ ఆయతనా కామా, రూపినో ధమ్మా రూపధాతు, అరూపినో ధమ్మా అరూపధాతు, సళాయతనికో అత్తభావో రూపధాతుయా, అత్థి రూపం అరూపేసు, రూపం కమ్మం, రూపం జీవితం, కమ్మహేతుకా పరిహాయతీతి.