(౬౯) ౭. పథవీ కమ్మవిపాకోతికథా

౪౯౨. పథవీ కమ్మవిపాకోతి? ఆమన్తా. సుఖవేదనియా దుక్ఖవేదనియా అదుక్ఖమసుఖవేదనియా, సుఖాయ వేదనాయ సమ్పయుత్తా, దుక్ఖాయ వేదనాయ సమ్పయుత్తా, అదుక్ఖమసుఖాయ వేదనాయ సమ్పయుత్తా, ఫస్సేన సమ్పయుత్తా, వేదనాయ సమ్పయుత్తా, సఞ్ఞాయ సమ్పయుత్తా, చేతనాయ సమ్పయుత్తా, చిత్తేన సమ్పయుత్తా, సారమ్మణా; అత్థి తాయ ఆవట్టనా [ఆవజ్జనా (స్యా. కం.)] ఆభోగో సమన్నాహారో మనసికారో చేతనా పత్థనా పణిధీతి? న హేవం వత్తబ్బే…పే… నను న సుఖవేదనియా న దుక్ఖవేదనియా న అదుక్ఖమసుఖవేదనియా, న సుఖాయ వేదనాయ సమ్పయుత్తా, న దుక్ఖాయ వేదనాయ సమ్పయుత్తా, న అదుక్ఖమసుఖాయ వేదనాయ సమ్పయుత్తా, న ఫస్సేన సమ్పయుత్తా, న వేదనాయ సమ్పయుత్తా, న సఞ్ఞాయ సమ్పయుత్తా, న చేతనాయ సమ్పయుత్తా, న చిత్తేన సమ్పయుత్తా, అనారమ్మణా; నత్థి తాయ ఆవట్టనా ఆభోగో సమన్నాహారో మనసికారో చేతనా పత్థనా పణిధీతి? ఆమన్తా. హఞ్చి న సుఖవేదనియా న దుక్ఖవేదనియా…పే… అనారమ్మణా; నత్థి తాయ ఆవట్టనా…పే… పణిధి, నో చ వత రే వత్తబ్బే – ‘‘పథవీ కమ్మవిపాకో’’తి.

ఫస్సో కమ్మవిపాకో, ఫస్సో సుఖవేదనియో దుక్ఖవేదనియో అదుక్ఖమసుఖవేదనియో సుఖాయ వేదనాయ సమ్పయుత్తో దుక్ఖాయ…పే… అదుక్ఖమసుఖాయ వేదనాయ సమ్పయుత్తో ఫస్సేన సమ్పయుత్తో వేదనాయ సమ్పయుత్తో సఞ్ఞాయ సమ్పయుత్తో చేతనాయ సమ్పయుత్తో చిత్తేన సమ్పయుత్తో సారమ్మణో; అత్థి తస్స ఆవట్టనా…పే… పణిధీతి? ఆమన్తా. పథవీ కమ్మవిపాకో, పథవీ సుఖవేదనియా దుక్ఖవేదనియా అదుక్ఖమసుఖవేదనియా సుఖాయ వేదనాయ సమ్పయుత్తా దుక్ఖాయ…పే… అదుక్ఖమసుఖాయ వేదనాయ సమ్పయుత్తా ఫస్సేన సమ్పయుత్తా వేదనాయ సమ్పయుత్తా సఞ్ఞాయ సమ్పయుత్తా చేతనాయ సమ్పయుత్తా చిత్తేన సమ్పయుత్తా సారమ్మణా; అత్థి తాయ ఆవట్టనా ఆభోగో సమన్నాహారో మనసికారో చేతనా పత్థనా పణిధీతి? న హేవం వత్తబ్బే …పే… పథవీ కమ్మవిపాకో, పథవీ న సుఖవేదనియా న దుక్ఖవేదనియా…పే… అనారమ్మణా; నత్థి తాయ ఆవట్టనా…పే… పణిధీతి? ఆమన్తా. ఫస్సో కమ్మవిపాకో, ఫస్సో న సుఖవేదనియో న దుక్ఖవేదనియో …పే… అనారమ్మణో; నత్థి తస్స ఆవట్టనా…పే… పణిధీతి? న హేవం వత్తబ్బే…పే….

పథవీ కమ్మవిపాకోతి? ఆమన్తా. పథవీ పగ్గహనిగ్గహుపగా ఛేదనభేదనుపగాతి? ఆమన్తా. కమ్మవిపాకో పగ్గహనిగ్గహుపగో ఛేదనభేదనుపగోతి? న హేవం వత్తబ్బే…పే….

లబ్భా పథవీ కేతుం విక్కేతుం ఆఠపేతుం ఓచినితుం విచినితున్తి? ఆమన్తా. లబ్భా కమ్మవిపాకో కేతుం విక్కేతుం ఆఠపేతుం ఓచినితుం విచినితున్తి? న హేవం వత్తబ్బే…పే….

౪౯౩. పథవీ పరేసం సాధారణాతి? ఆమన్తా. కమ్మవిపాకో పరేసం సాధారణోతి? న హేవం వత్తబ్బే…పే….

కమ్మవిపాకో పరేసం సాధారణోతి? ఆమన్తా. నను వుత్తం భగవతా –

‘‘అసాధారణమఞ్ఞేసం, అచోరహరణో నిధి;

కయిరాథ మచ్చో పుఞ్ఞాని, సచే సుచరితం చరే’’తి [ఖు. పా. ౮.౯ ఖుద్దకపాఠే, థోకం విసదిసం].

అత్థేవ సుత్తన్తోతి? ఆమన్తా. తేన హి న వత్తబ్బం – ‘‘కమ్మవిపాకో పరేసం సాధారణో’’తి.

పథవీ కమ్మవిపాకోతి? ఆమన్తా. పఠమం పథవీ సణ్ఠాతి, పచ్ఛా సత్తా ఉప్పజ్జన్తీతి? ఆమన్తా. పఠమం విపాకో ఉప్పజ్జతి, పచ్ఛా విపాకపటిలాభాయ కమ్మం కరోన్తీతి? న హేవం వత్తబ్బే…పే….

పథవీ సబ్బసత్తానం కమ్మవిపాకోతి? ఆమన్తా. సబ్బే సత్తా పథవిం పరిభుఞ్జన్తీతి? న హేవం వత్తబ్బే…పే… సబ్బే సత్తా పథవిం పరిభుఞ్జన్తీతి? ఆమన్తా. అత్థి కేచి పథవిం అపరిభుఞ్జిత్వా పరినిబ్బాయన్తీతి? ఆమన్తా. అత్థి కేచి కమ్మవిపాకం అఖేపేత్వా పరినిబ్బాయన్తీతి? న హేవం వత్తబ్బే…పే….

పథవీ చక్కవత్తిసత్తస్స కమ్మవిపాకోతి? ఆమన్తా. అఞ్ఞే సత్తా పథవిం పరిభుఞ్జన్తీతి? ఆమన్తా. చక్కవత్తిసత్తస్స కమ్మవిపాకం అఞ్ఞే సత్తా పరిభుఞ్జన్తీతి? న హేవం వత్తబ్బే…పే… చక్కవత్తిసత్తస్స కమ్మవిపాకం అఞ్ఞే సత్తా పరిభుఞ్జన్తీతి? ఆమన్తా. చక్కవత్తిసత్తస్స ఫస్సం వేదనం సఞ్ఞం చేతనం చిత్తం సద్ధం వీరియం సతిం సమాధిం పఞ్ఞం అఞ్ఞే సత్తా పరిభుఞ్జన్తీతి? న హేవం వత్తబ్బే…పే….

౪౯౪. న వత్తబ్బం – ‘‘పథవీ కమ్మవిపాకో’’తి? ఆమన్తా. నను అత్థి ఇస్సరియసంవత్తనియం కమ్మం అధిపచ్చసంవత్తనియం కమ్మన్తి? ఆమన్తా. హఞ్చి అత్థి ఇస్సరియసంవత్తనియం కమ్మం అధిపచ్చసంవత్తనియం కమ్మం, తేన వత రే వత్తబ్బే – ‘‘పథవీ కమ్మవిపాకో’’తి.

పథవీ కమ్మవిపాకోతికథా నిట్ఠితా.