౬. ఛట్ఠవగ్గో

(౬౨) ౧౦. కాయకమ్మం సనిదస్సనన్తికథా

౪౬౯. కాయకమ్మం సనిదస్సనన్తి? ఆమన్తా. రూపం రూపాయతనం రూపధాతు నీలం పీతకం లోహితకం ఓదాతం చక్ఖువిఞ్ఞేయ్యం చక్ఖుస్మిం పటిహఞ్ఞతి చక్ఖుస్స ఆపాథం ఆగచ్ఛతీతి? న హేవం వత్తబ్బే…పే….

కాయకమ్మం సనిదస్సనన్తి? ఆమన్తా. చక్ఖుఞ్చ పటిచ్చ కాయకమ్మఞ్చ ఉప్పజ్జతి చక్ఖువిఞ్ఞాణన్తి? న హేవం వత్తబ్బే…పే….

చక్ఖుఞ్చ పటిచ్చ కాయకమ్మఞ్చ ఉప్పజ్జతి చక్ఖువిఞ్ఞాణన్తి? ఆమన్తా. ‘‘చక్ఖుఞ్చ పటిచ్చ కాయకమ్మఞ్చ ఉప్పజ్జతి చక్ఖువిఞ్ఞాణ’’న్తి – అత్థేవ సుత్తన్తోతి? నత్థి. ‘‘చక్ఖుఞ్చ పటిచ్చ రూపే చ ఉప్పజ్జతి చక్ఖువిఞ్ఞాణ’’న్తి – అత్థేవ సుత్తన్తోతి? ఆమన్తా. హఞ్చి ‘‘చక్ఖుఞ్చ పటిచ్చ రూపే చ ఉప్పజ్జతి చక్ఖువిఞ్ఞాణ’’న్తి – అత్థేవ సుత్తన్తో, నో చ వత రే వత్తబ్బే – ‘‘చక్ఖుఞ్చ పటిచ్చ కాయకమ్మఞ్చ ఉప్పజ్జతి చక్ఖువిఞ్ఞాణ’’న్తి.

౪౭౦. న వత్తబ్బం – ‘‘కాయకమ్మం సనిదస్సన’’న్తి? ఆమన్తా. నను పస్సతి అభిక్కమన్తం పటిక్కమన్తం ఆలోకేన్తం విలోకేన్తం సమిఞ్జేన్తం పసారేన్తన్తి? ఆమన్తా. హఞ్చి పస్సతి అభిక్కమన్తం పటిక్కమన్తం ఆలోకేన్తం విలోకేన్తం సమిఞ్జేన్తం పసారేన్తం, తేన వత రే వత్తబ్బే – ‘‘కాయకమ్మం సనిదస్సన’’న్తి.

కాయకమ్మం సనిదస్సనన్తికథా నిట్ఠితా.

ఛట్ఠవగ్గో.

తస్సుద్దానం –

నియమో అసఙ్ఖతో, పటిచ్చసముప్పాదో అసఙ్ఖతో, చత్తారి సచ్చాని అసఙ్ఖతాని, చత్తారో ఆరుప్పా అసఙ్ఖతా, నిరోధసమాపత్తి అసఙ్ఖతా, ఆకాసో అసఙ్ఖతో, ఆకాసో సనిదస్సనో, చత్తారో మహాభూతా, పఞ్చిన్ద్రియాని, తథేవ కాయకమ్మన్తి.