౫. పఞ్చమవగ్గో

(౪౪) ౨. అసేఖఞాణకథా

౪౨౧. సేఖస్స అసేఖం ఞాణం అత్థీతి? ఆమన్తా. సేఖో అసేఖం ధమ్మం జానాతి పస్సతి, దిట్ఠం విదితం సచ్ఛికతం ఉపసమ్పజ్జ విహరతి, కాయేన ఫుసిత్వా విహరతీతి? న హేవం వత్తబ్బే…పే… నను సేఖో అసేఖం ధమ్మం న జానాతి న పస్సతి, అదిట్ఠం అవిదితం అసచ్ఛికతం న ఉపసమ్పజ్జ విహరతి, న కాయేన ఫుసిత్వా విహరతీతి? ఆమన్తా. హఞ్చి సేఖో అసేఖం ధమ్మం న జానాతి న పస్సతి, అదిట్ఠం అవిదితం అసచ్ఛికతం న ఉపసమ్పజ్జ విహరతి, న కాయేన ఫుసిత్వా విహరతి, నో చ వత రే వత్తబ్బే – ‘‘సేఖస్స అసేఖం ఞాణం అత్థీ’’తి.

అసేఖస్స అసేఖం ఞాణం అత్థి, అసేఖో అసేఖం ధమ్మం జానాతి పస్సతి, దిట్ఠం విదితం సచ్ఛికతం ఉపసమ్పజ్జ విహరతి, కాయేన ఫుసిత్వా విహరతీతి? ఆమన్తా. సేఖస్స అసేఖం ఞాణం అత్థి, సేఖో అసేఖం ధమ్మం జానాతి పస్సతి, దిట్ఠం విదితం సచ్ఛికతం ఉపసమ్పజ్జ విహరతి, కాయేన ఫుసిత్వా విహరతీతి? న హేవం వత్తబ్బే…పే….

౪౨౨. సేఖస్స అసేఖం ఞాణం అత్థి, సేఖో అసేఖం ధమ్మం న జానాతి న పస్సతి, అదిట్ఠం అవిదితం అసచ్ఛికతం న ఉపసమ్పజ్జ విహరతి, న కాయేన ఫుసిత్వా విహరతీతి? ఆమన్తా. అసేఖస్స అసేఖం ఞాణం అత్థి, అసేఖో అసేఖం ధమ్మం న జానాతి న పస్సతి, అదిట్ఠం అవిదితం అసచ్ఛికతం న ఉపసమ్పజ్జ విహరతి, న కాయేన ఫుసిత్వా విహరతీతి? న హేవం వత్తబ్బే…పే….

సేఖస్స అసేఖం ఞాణం అత్థీతి? ఆమన్తా. గోత్రభునో పుగ్గలస్స సోతాపత్తిమగ్గే ఞాణం అత్థీతి? న హేవం వత్తబ్బే…పే… సోతాపత్తిఫలసచ్ఛికిరియాయ పటిపన్నస్స పుగ్గలస్స సోతాపత్తిఫలే ఞాణం అత్థీతి? న హేవం వత్తబ్బే…పే… సకదాగామిఫల… అనాగామిఫల… అరహత్తసచ్ఛికిరియాయ పటిపన్నస్స పుగ్గలస్స అరహత్తే ఞాణం అత్థీతి? న హేవం వత్తబ్బే…పే….

౪౨౩. న వత్తబ్బం – ‘‘సేఖస్స అసేఖం ఞాణం అత్థీ’’తి? ఆమన్తా. నను ఆయస్మా ఆనన్దో సేఖో – ‘‘భగవా ఉళారో’’తి జానాతి, ‘‘సారిపుత్తో థేరో, మహామోగ్గల్లానో థేరో ఉళారో’’తి జానాతీతి? ఆమన్తా. హఞ్చి ఆయస్మా ఆనన్దో సేఖో – ‘‘భగవా ఉళారో’’తి జానాతి, ‘‘సారిపుత్తో థేరో, మహామోగ్గల్లానో థేరో ఉళారో’’తి జానాతి, తేన వత రే వత్తబ్బే – ‘‘సేఖస్స అసేఖం ఞాణం అత్థీ’’తి.

అసేఖఞాణకథా నిట్ఠితా.