౪. చతుత్థవగ్గో

(౪౨) ౧౦. సబ్బసంయోజనప్పహానకథా

౪౧౩. సబ్బసంయోజనానం పహానం అరహత్తన్తి? ఆమన్తా. అరహత్తమగ్గేన సబ్బే సంయోజనా పహీయన్తీతి? న హేవం వత్తబ్బే…పే….

అరహత్తమగ్గేన సబ్బే సంయోజనా పహీయన్తీతి? ఆమన్తా. అరహత్తమగ్గేన సక్కాయదిట్ఠిం విచికిచ్ఛం సీలబ్బతపరామాసం పజహతీతి? న హేవం వత్తబ్బే…పే….

అరహత్తమగ్గేన సక్కాయదిట్ఠిం విచికిచ్ఛం సీలబ్బతపరామాసం పజహతీతి? ఆమన్తా. నను తిణ్ణం సంయోజనానం పహానం సోతాపత్తిఫలం వుత్తం భగవతాతి? ఆమన్తా. హఞ్చి తిణ్ణం సంయోజనానం పహానం సోతాపత్తిఫలం వుత్తం భగవతా, నో చ వత రే వత్తబ్బే – ‘‘అరహత్తమగ్గేన సబ్బే సంయోజనా పహీయన్తీ’’తి.

౪౧౪. అరహత్తమగ్గేన సబ్బే సంయోజనా పహీయన్తీతి? ఆమన్తా. అరహత్తమగ్గేన ఓళారికం కామరాగం ఓళారికం బ్యాపాదం పజహతీతి? న హేవం వత్తబ్బే…పే….

౪౧౫. అరహత్తమగ్గేన ఓళారికం కామరాగం ఓళారికం బ్యాపాదం పజహతీతి? ఆమన్తా. నను కామరాగబ్యాపాదానం తనుభావం సకదాగామిఫలం వుత్తం భగవతాతి? ఆమన్తా. హఞ్చి కామరాగబ్యాపాదానం తనుభావం సకదాగామిఫలం వుత్తం భగవతా, నో చ వత రే వత్తబ్బే – ‘‘అరహత్తమగ్గేన సబ్బే సంయోజనా పహీయన్తీ’’తి.

అరహత్తమగ్గేన సబ్బే సంయోజనా పహీయన్తీతి? ఆమన్తా. అరహత్తమగ్గేన అణుసహగతం కామరాగం అణుసహగతం బ్యాపాదం పజహతీతి? న హేవం వత్తబ్బే…పే….

౪౧౬. అరహత్తమగ్గేన అణుసహగతం కామరాగం అణుసహగతం బ్యాపాదం పజహతీతి? ఆమన్తా. నను కామరాగబ్యాపాదానం అనవసేసప్పహానం అనాగామిఫలం వుత్తం భగవతాతి? ఆమన్తా. హఞ్చి కామరాగబ్యాపాదానం అనవసేసప్పహానం అనాగామిఫలం వుత్తం భగవతా, నో చ వత రే వత్తబ్బే – ‘‘అరహత్తమగ్గేన సబ్బే సంయోజనా పహీయన్తీ’’తి.

అరహత్తమగ్గేన సబ్బే సంయోజనా పహీయన్తీతి? ఆమన్తా. నను రూపరాగఅరూపరాగమానఉద్ధచ్చఅవిజ్జాయ అనవసేసప్పహానం అరహత్తం వుత్తం భగవతాతి? ఆమన్తా. హఞ్చి రూపరాగఅరూపరాగమానఉద్ధచ్చఅవిజ్జాయ అనవసేసప్పహానం అరహత్తం వుత్తం భగవతా, నో చ వత రే వత్తబ్బే – ‘‘అరహత్తమగ్గేన సబ్బే సంయోజనా పహీయన్తీ’’తి.

౪౧౭. న వత్తబ్బం – ‘‘సబ్బసంయోజనానం పహానం అరహత్త’’న్తి? ఆమన్తా. నను అరహతో సబ్బే సంయోజనా పహీనాతి? ఆమన్తా. హఞ్చి అరహతో సబ్బే సంయోజనా పహీనా, తేన వత రే వత్తబ్బే – ‘‘సబ్బసంయోజనానం పహానం అరహత్త’’న్తి.

సబ్బసంయోజనప్పహానకథా నిట్ఠితా.

చతుత్థవగ్గో.

తస్సుద్దానం –

గిహిస్స అరహా, సహ ఉపపత్తియా అరహా, అరహతో సబ్బే ధమ్మా అనాసవా, అరహా చతూహి ఫలేహి సమన్నాగతో, ఏవమేవం ఛహి ఉపేక్ఖాహి, బోధియా బుద్ధో, సలక్ఖణసమన్నాగతో, బోధిసత్తో ఓక్కన్తనియామో చరితబ్రహ్మచరియో, పటిపన్నకో ఫలేన సమన్నాగతో, సబ్బసంయోజనానం పహానం అరహత్తన్తి.