౩. తతియవగ్గో

(౩౧) ౧౧. అసఞ్ఞకథా

౩౮౧. అసఞ్ఞసత్తేసు సఞ్ఞా అత్థీతి? ఆమన్తా. సఞ్ఞాభవో సఞ్ఞాగతి సఞ్ఞాసత్తావాసో సఞ్ఞాసంసారో సఞ్ఞాయోని సఞ్ఞత్తభావపటిలాభోతి? న హేవం వత్తబ్బే…పే….

నను అసఞ్ఞభవో అసఞ్ఞగతి అసఞ్ఞసత్తావాసో అసఞ్ఞసంసారో అసఞ్ఞయోని అసఞ్ఞత్తభావపటిలాభోతి? ఆమన్తా. హఞ్చి అసఞ్ఞభవో అసఞ్ఞగతి అసఞ్ఞసత్తావాసో అసఞ్ఞసంసారో అసఞ్ఞయోని అసఞ్ఞత్తభావపటిలాభో, నో చ వత రే వత్తబ్బే – ‘‘అసఞ్ఞసత్తేసు సఞ్ఞా అత్థీ’’తి.

అసఞ్ఞసత్తేసు సఞ్ఞా అత్థీతి? ఆమన్తా. పఞ్చవోకారభవో గతి సత్తావాసో సంసారో యోని అత్తభావపటిలాభోతి? న హేవం వత్తబ్బే…పే….

నను ఏకవోకారభవో గతి సత్తావాసో సంసారో యోని అత్తభావపటిలాభోతి? ఆమన్తా. హఞ్చి ఏకవోకారభవో గతి సత్తావాసో సంసారో యోని అత్తభావపటిలాభో, నో చ వత రే వత్తబ్బే – ‘‘అసఞ్ఞసత్తేసు సఞ్ఞా అత్థీ’’తి.

అసఞ్ఞసత్తేసు సఞ్ఞా అత్థీతి? ఆమన్తా. తాయ సఞ్ఞాయ సఞ్ఞాకరణీయం కరోతీతి? న హేవం వత్తబ్బే…పే….

౩౮౨. మనుస్సేసు సఞ్ఞా అత్థి, సో చ సఞ్ఞాభవో సఞ్ఞాగతి సఞ్ఞాసత్తావాసో సఞ్ఞాసంసారో సఞ్ఞాయోని సఞ్ఞత్తభావపటిలాభోతి? ఆమన్తా. అసఞ్ఞసత్తేసు సఞ్ఞా అత్థి, సో చ సఞ్ఞాభవో సఞ్ఞాగతి సత్తావాసో సంసారో యోని అత్తభావపటిలాభోతి? న హేవం వత్తబ్బే…పే….

మనుస్సేసు సఞ్ఞా అత్థి, సో చ పఞ్చవోకారభవో గతి సత్తావాసో సంసారో యోని అత్తభావపటిలాభోతి? ఆమన్తా. అసఞ్ఞసత్తేసు సఞ్ఞా అత్థి, సో చ పఞ్చవోకారభవో గతి సత్తావాసో సంసారో యోని అత్తభావపటిలాభోతి? న హేవం వత్తబ్బే…పే….

మనుస్సేసు సఞ్ఞా అత్థి, తాయ సఞ్ఞాయ సఞ్ఞాకరణీయం కరోతీతి? ఆమన్తా. అసఞ్ఞసత్తేసు సఞ్ఞా అత్థి, తాయ సఞ్ఞాయ సఞ్ఞాకరణీయం కరోతీతి? న హేవం వత్తబ్బే…పే….

అసఞ్ఞసత్తేసు సఞ్ఞా అత్థి, సో చ అసఞ్ఞభవో అసఞ్ఞగతి అసఞ్ఞసత్తావాసో అసఞ్ఞసంసారో అసఞ్ఞయోని అసఞ్ఞత్తభావపటిలాభోతి? ఆమన్తా. మనుస్సేసు సఞ్ఞా అత్థి, సో చ అసఞ్ఞభవో అసఞ్ఞగతి…పే… అసఞ్ఞత్తభావపటిలాభోతి? న హేవం వత్తబ్బే…పే….

అసఞ్ఞసత్తేసు సఞ్ఞా అత్థి, సో చ ఏకవోకారభవో గతి సత్తావాసో సంసారో యోని అత్తభావపటిలాభోతి? ఆమన్తా. మనుస్సేసు సఞ్ఞా అత్థి, సో చ ఏకవోకారభవో గతి…పే… అత్తభావపటిలాభోతి? న హేవం వత్తబ్బే…పే….

అసఞ్ఞసత్తేసు సఞ్ఞా అత్థి, న చ తాయ సఞ్ఞాయ సఞ్ఞాకరణీయం కరోతీతి? ఆమన్తా. మనుస్సేసు సఞ్ఞా అత్థి, న చ తాయ సఞ్ఞాయ సఞ్ఞాకరణీయం కరోతీతి? న హేవం వత్తబ్బే…పే….

౩౮౩. న వత్తబ్బం – ‘‘అసఞ్ఞసత్తేసు సఞ్ఞా అత్థీ’’తి? ఆమన్తా. నను వుత్తం భగవతా – ‘‘సన్తి, భిక్ఖవే, అసఞ్ఞసత్తా నామ దేవా; సఞ్ఞుప్పాదా చ పన తే దేవా తమ్హా కాయా చవన్తీ’’తి [దీ. ని. ౧.౬౮]! అత్థేవ సుత్తన్తోతి? ఆమన్తా. తేన హి అసఞ్ఞసత్తేసు సఞ్ఞా అత్థీతి.

అసఞ్ఞసత్తేసు సఞ్ఞా అత్థీతి? కిఞ్చి [కఞ్చి (స్యా.)] కాలే అత్థి, కిఞ్చి కాలే నత్థీతి. కిఞ్చి కాలే సఞ్ఞసత్తా కిఞ్చి కాలే అసఞ్ఞసత్తా, కిఞ్చి కాలే సఞ్ఞభవో కిఞ్చి కాలే అసఞ్ఞభవో, కిఞ్చి కాలే పఞ్చవోకారభవో కిఞ్చి కాలే ఏకవోకారభవోతి? న హేవం వత్తబ్బే…పే….

అసఞ్ఞసత్తేసు సఞ్ఞా కిఞ్చి కాలే అత్థి, కిఞ్చి కాలే నత్థీతి? ఆమన్తా. కం కాలం అత్థి, కం కాలం నత్థీతి? చుతికాలే ఉపపత్తికాలే అత్థి, ఠితికాలే నత్థీతి. చుతికాలే ఉపపత్తికాలే సఞ్ఞసత్తా, ఠితికాలే అసఞ్ఞసత్తా; చుతికాలే ఉపపత్తికాలే సఞ్ఞభవో, ఠితికాలే అసఞ్ఞభవో; చుతికాలే ఉపపత్తికాలే పఞ్చవోకారభవో, ఠితికాలే ఏకవోకారభవోతి? న హేవం వత్తబ్బే…పే….

అసఞ్ఞకథా నిట్ఠితా.