౩. తతియవగ్గో

(౩౦) ౧౦. సంవరకథా

౩౭౯. అత్థి దేవేసు సంవరోతి? ఆమన్తా. అత్థి దేవేసు అసంవరోతి? న హేవం వత్తబ్బే…పే….

నత్థి దేవేసు అసంవరోతి? ఆమన్తా. నత్థి దేవేసు సంవరోతి? న హేవం వత్తబ్బే…పే….

నను అసంవరా సంవరో సీలం, అత్థి దేవేసు సంవరోతి? ఆమన్తా. అత్థి దేవేసు అసంవరో, యమ్హా అసంవరా సంవరో సీలన్తి? న హేవం వత్తబ్బే…పే….

ఆజానాహి నిగ్గహం. హఞ్చి అసంవరా సంవరో సీలం, అత్థి దేవేసు సంవరో, తేన వత రే వత్తబ్బే – ‘‘అత్థి దేవేసు అసంవరో, యమ్హా అసంవరా సంవరో సీల’’న్తి. యం తత్థ వదేసి – ‘‘వత్తబ్బే ఖో – ‘అసంవరా సంవరో సీలం, అత్థి దేవేసు సంవరో,’ నో చ వత్తబ్బే – ‘అత్థి దేవేసు అసంవరో, యమ్హా అసంవరా సంవరో సీల’’’న్తి మిచ్ఛా.

నో చే పన వత్తబ్బే – ‘‘అత్థి దేవేసు అసంవరో, యమ్హా అసంవరా సంవరో సీల’’న్తి, నో చ వత రే వత్తబ్బే – ‘‘అసంవరా సంవరో సీలం, అత్థి దేవేసు సంవరో’’తి. యం తత్థ వదేసి – ‘‘వత్తబ్బే ఖో ‘అసంవరా సంవరో సీలం, అత్థి దేవేసు సంవరో,’ నో చ వత్తబ్బే – ‘అత్థి దేవేసు అసంవరో, యమ్హా అసంవరా సంవరో సీల’’’న్తి మిచ్ఛా.

అత్థి మనుస్సేసు సంవరో, అత్థి తత్థ అసంవరోతి? ఆమన్తా. అత్థి దేవేసు సంవరో, అత్థి తత్థ అసంవరోతి? న హేవం వత్తబ్బే…పే….

అత్థి దేవేసు సంవరో, నత్థి తత్థ అసంవరోతి? ఆమన్తా. అత్థి మనుస్సేసు సంవరో, నత్థి తత్థ అసంవరోతి? న హేవం వత్తబ్బే…పే….

౩౮౦. అత్థి దేవేసు పాణాతిపాతా వేరమణీతి? ఆమన్తా. అత్థి దేవేసు పాణాతిపాతోతి? న హేవం వత్తబ్బే…పే….

అత్థి దేవేసు సురామేరయమజ్జపమాదట్ఠానా వేరమణీతి? ఆమన్తా. అత్థి దేవేసు సురామేరయమజ్జపమాదట్ఠానన్తి? న హేవం వత్తబ్బే…పే….

నత్థి దేవేసు పాణాతిపాతోతి? ఆమన్తా. నత్థి దేవేసు పాణాతిపాతా వేరమణీతి? న హేవం వత్తబ్బే…పే….

నత్థి దేవేసు సురామేరయమజ్జపమాదట్ఠానన్తి? ఆమన్తా. నత్థి దేవేసు సురామేరయమజ్జపమాదట్ఠానా వేరమణీతి? న హేవం వత్తబ్బే…పే….

అత్థి మనుస్సేసు పాణాతిపాతా వేరమణి, అత్థి తత్థ పాణాతిపాతోతి? ఆమన్తా. అత్థి దేవేసు పాణాతిపాతా వేరమణి, అత్థి తత్థ పాణాతిపాతోతి? న హేవం వత్తబ్బే…పే….

అత్థి మనుస్సేసు సురామేరయమజ్జపమాదట్ఠానా వేరమణి, అత్థి తత్థ సురామేరయమజ్జపమాదట్ఠానన్తి? ఆమన్తా. అత్థి దేవేసు సురామేరయమజ్జపమాదట్ఠానా వేరమణి, అత్థి తత్థ సురామేరయమజ్జపమాదట్ఠానన్తి? న హేవం వత్తబ్బే…పే….

అత్థి దేవేసు పాణాతిపాతా వేరమణి, నత్థి తత్థ పాణాతిపాతోతి? ఆమన్తా. అత్థి మనుస్సేసు పాణాతిపాతా వేరమణి, నత్థి తత్థ పాణాతిపాతోతి? న హేవం వత్తబ్బే…పే….

అత్థి దేవేసు సురామేరయమజ్జపమాదట్ఠానా వేరమణి, నత్థి తత్థ సురామేరయమజ్జపమాదట్ఠానన్తి? ఆమన్తా. అత్థి మనుస్సేసు సురామేరయమజ్జపమాదట్ఠానా వేరమణి, నత్థి తత్థ సురామేరయమజ్జపమాదట్ఠానన్తి? న హేవం వత్తబ్బే…పే….

నత్థి దేవేసు సంవరోతి? ఆమన్తా. సబ్బే దేవా పాణాతిపాతినో అదిన్నాదాయినో కామేసుమిచ్ఛాచారినో ముసావాదినో సురామేరయమజ్జపమాదట్ఠాయినోతి? న హేవం వత్తబ్బే…పే… తేన హి అత్థి దేవేసు సంవరోతి.

సంవరకథా నిట్ఠితా.