౨. దుతియవగ్గో

(౨౦) ౧౧. నిరోధకథా

౩౫౩. ద్వే నిరోధాతి? ఆమన్తా. ద్వే దుక్ఖనిరోధాతి? న హేవం వత్తబ్బే…పే… ద్వే దుక్ఖనిరోధాతి? ఆమన్తా. ద్వే నిరోధసచ్చానీతి? న హేవం వత్తబ్బే…పే… ద్వే నిరోధసచ్చానీతి? ఆమన్తా. ద్వే దుక్ఖసచ్చానీతి? న హేవం వత్తబ్బే…పే… ద్వే నిరోధసచ్చానీతి? ఆమన్తా. ద్వే సముదయసచ్చానీతి? న హేవం వత్తబ్బే…పే… ద్వే నిరోధసచ్చానీతి? ఆమన్తా. ద్వే మగ్గసచ్చానీతి? న హేవం వత్తబ్బే…పే….

ద్వే నిరోధసచ్చానీతి? ఆమన్తా. ద్వే తాణాని…పే… ద్వే లేణాని… ద్వే సరణాని… ద్వే పరాయణాని… ద్వే అచ్చుతాని… ద్వే అమతాని… ద్వే నిబ్బానానీతి? న హేవం వత్తబ్బే…పే….

ద్వే నిబ్బానానీతి? ఆమన్తా. అత్థి ద్విన్నం నిబ్బానానం ఉచ్చనీచతా హీనపణీతతా ఉక్కంసావకంసో సీమా వా భేదో వా రాజి వా అన్తరికా వాతి? న హేవం వత్తబ్బే…పే….

ద్వే నిరోధాతి? ఆమన్తా. నను అప్పటిసఙ్ఖానిరుద్ధే సఙ్ఖారే పటిసఙ్ఖా నిరోధేన్తీతి? ఆమన్తా. హఞ్చి అప్పటిసఙ్ఖానిరుద్ధే సఙ్ఖారే పటిసఙ్ఖా నిరోధేన్తి, నో చ వత రే వత్తబ్బే – ‘‘ద్వే నిరోధా’’తి.

న వత్తబ్బం – ‘‘ద్వే నిరోధా’’తి? ఆమన్తా. నను అప్పటిసఙ్ఖానిరుద్ధాపి సఙ్ఖారా అచ్చన్తభగ్గా, పటిసఙ్ఖానిరుద్ధాపి సఙ్ఖారా అచ్చన్తభగ్గాతి? ఆమన్తా. హఞ్చి అప్పటిసఙ్ఖానిరుద్ధాపి సఙ్ఖారా అచ్చన్తభగ్గా, పటిసఙ్ఖానిరుద్ధాపి సఙ్ఖారా అచ్చన్తభగ్గా, తేన వత రే వత్తబ్బే – ‘‘ద్వే నిరోధా’’తి.

ద్వే నిరోధాతి? ఆమన్తా. పటిసఙ్ఖానిరుద్ధాపి [పటిసఙ్ఖానిరుద్ధా (?)] సఙ్ఖారా అరియమగ్గం ఆగమ్మ నిరుద్ధాతి? ఆమన్తా. అప్పటిసఙ్ఖానిరుద్ధా సఙ్ఖారా అరియమగ్గం ఆగమ్మ నిరుద్ధాతి? న హేవం వత్తబ్బే…పే….

ద్వే నిరోధాతి? ఆమన్తా. పటిసఙ్ఖానిరుద్ధా సఙ్ఖారా న పున ఉప్పజ్జన్తీతి? ఆమన్తా. అప్పటిసఙ్ఖానిరుద్ధా సఙ్ఖారా న పున ఉప్పజ్జన్తీతి? న హేవం వత్తబ్బే…పే… తేన హి న వత్తబ్బం – ‘‘ద్వే నిరోధా’’తి.

నిరోధకథా నిట్ఠితా.

దుతియవగ్గో.

తస్సుద్దానం –

పరూపహారో అఞ్ఞాణం, కఙ్ఖా పరవితారణా;

వచీభేదో దుక్ఖాహారో, చిత్తట్ఠితి చ కుక్కుళా;

అనుపుబ్బాభిసమయో, వోహారో చ నిరోధకోతి.