౨. దుతియవగ్గో

(౧౯) ౧౦. వోహారకథా

౩౪౭. బుద్ధస్స భగవతో వోహారో లోకుత్తరోతి? ఆమన్తా. లోకుత్తరే సోతే పటిహఞ్ఞతి నో లోకియే, లోకుత్తరేన విఞ్ఞాణేన పటివిజానన్తి నో లోకియేన, సావకా పటివిజానన్తి నో పుథుజ్జనాతి? న హేవం వత్తబ్బే…పే….

నను బుద్ధస్స భగవతో వోహారో లోకియే సోతే పటిహఞ్ఞతీతి? ఆమన్తా. హఞ్చి బుద్ధస్స భగవతో వోహారో లోకియే సోతే పటిహఞ్ఞతి, నో చ వత రే వత్తబ్బే – ‘‘బుద్ధస్స భగవతో వోహారో లోకుత్తరో’’తి.

నను బుద్ధస్స భగవతో వోహారం లోకియేన విఞ్ఞాణేన పటివిజానన్తీతి? ఆమన్తా. హఞ్చి బుద్ధస్స భగవతో వోహారం లోకియేన విఞ్ఞాణేన పటివిజానన్తి, నో చ వత రే వత్తబ్బే – ‘‘బుద్ధస్స భగవతో వోహారో లోకుత్తరో’’తి.

నను బుద్ధస్స భగవతో వోహారం పుథుజ్జనా పటివిజానన్తీతి? ఆమన్తా. హఞ్చి బుద్ధస్స భగవతో వోహారం పుథుజ్జనా పటివిజానన్తి, నో చ వత రే వత్తబ్బే – ‘‘బుద్ధస్స భగవతో వోహారో లోకుత్తరో’’తి.

౩౪౮. బుద్ధస్స భగవతో వోహారో లోకుత్తరోతి? ఆమన్తా. మగ్గో ఫలం నిబ్బానం, సోతాపత్తిమగ్గో సోతాపత్తిఫలం, సకదాగామిమగ్గో సకదాగామిఫలం, అనాగామిమగ్గో అనాగామిఫలం, అరహత్తమగ్గో అరహత్తఫలం, సతిపట్ఠానం సమ్మప్పధానం ఇద్ధిపాదో ఇన్ద్రియం బలం బోజ్ఝఙ్గోతి? న హేవం వత్తబ్బే…పే….

బుద్ధస్స భగవతో వోహారో లోకుత్తరోతి? ఆమన్తా. అత్థి కేచి బుద్ధస్స భగవతో వోహారం సుణన్తీతి? ఆమన్తా. లోకుత్తరో ధమ్మో సోతవిఞ్ఞేయ్యో, సోతస్మిం పటిహఞ్ఞతి, సోతస్స ఆపాథం ఆగచ్ఛతీతి? న హేవం వత్తబ్బే…పే….

నను లోకుత్తరో ధమ్మో న సోతవిఞ్ఞేయ్యో, న సోతస్మిం పటిహఞ్ఞతి, న సోతస్స ఆపాథం ఆగచ్ఛతీతి? ఆమన్తా. హఞ్చి లోకుత్తరో ధమ్మో న సోతవిఞ్ఞేయ్యో, న సోతస్మిం పటిహఞ్ఞతి, న సోతస్స ఆపాథం ఆగచ్ఛతి, నో చ వత రే వత్తబ్బే – ‘‘బుద్ధస్స భగవతో వోహారో లోకుత్తరో’’తి.

౩౪౯. బుద్ధస్స భగవతో వోహారో లోకుత్తరోతి? ఆమన్తా. అత్థి కేచి బుద్ధస్స భగవతో వోహారే రజ్జేయ్యున్తి? ఆమన్తా. లోకుత్తరో ధమ్మో రాగట్ఠానియో రజనీయో కమనీయో మదనీయో బన్ధనీయో ముచ్ఛనీయోతి? న హేవం వత్తబ్బే…పే….

నను లోకుత్తరో ధమ్మో న రాగట్ఠానియో న రజనీయో న కమనీయో న మదనీయో న బన్ధనీయో న ముచ్ఛనీయోతి? ఆమన్తా. హఞ్చి లోకుత్తరో ధమ్మో న రాగట్ఠానియో న రజనీయో న కమనీయో న మదనీయో న బన్ధనీయో న ముచ్ఛనీయో, నో చ వత రే వత్తబ్బే – ‘‘బుద్ధస్స భగవతో వోహారో లోకుత్తరో’’తి.

బుద్ధస్స భగవతో వోహారో లోకుత్తరోతి? ఆమన్తా. అత్థి కేచి బుద్ధస్స భగవతో వోహారే దుస్సేయ్యున్తి? ఆమన్తా. లోకుత్తరో ధమ్మో దోసట్ఠానియో కోపట్ఠానియో పటిఘట్ఠానియోతి? న హేవం వత్తబ్బే…పే….

నను లోకుత్తరో ధమ్మో న దోసట్ఠానియో న కోపట్ఠానియో న పటిఘట్ఠానియోతి? ఆమన్తా. హఞ్చి లోకుత్తరో ధమ్మో న దోసట్ఠానియో న కోపట్ఠానియో న పటిఘట్ఠానియో, నో చ వత రే వత్తబ్బే – ‘‘బుద్ధస్స భగవతో వోహారో లోకుత్తరో’’తి.

బుద్ధస్స భగవతో వోహారో లోకుత్తరోతి? ఆమన్తా. అత్థి కేచి బుద్ధస్స భగవతో వోహారే ముయ్హేయ్యున్తి? ఆమన్తా. లోకుత్తరో ధమ్మో మోహట్ఠానియో అఞ్ఞాణకరణో అచక్ఖుకరణో పఞ్ఞానిరోధికో విఘాతపక్ఖికో అనిబ్బానసంవత్తనికోతి? న హేవం వత్తబ్బే…పే….

నను లోకుత్తరో ధమ్మో న మోహట్ఠానియో న అఞ్ఞాణకరణో న అచక్ఖుకరణో పఞ్ఞావుద్ధికో అవిఘాతపక్ఖికో నిబ్బానసంవత్తనికోతి? ఆమన్తా. హఞ్చి లోకుత్తరో ధమ్మో న మోహట్ఠానియో న అఞ్ఞాణకరణో న అచక్ఖుకరణో పఞ్ఞావుద్ధికో అవిఘాతపక్ఖికో నిబ్బానసంవత్తనికో, నో చ వత రే వత్తబ్బే – ‘‘బుద్ధస్స భగవతో వోహారో లోకుత్తరో’’తి.

౩౫౦. బుద్ధస్స భగవతో వోహారో లోకుత్తరోతి? ఆమన్తా. యే కేచి బుద్ధస్స భగవతో వోహారం సుణన్తి, సబ్బే తే మగ్గం భావేన్తీతి? న హేవం వత్తబ్బే…పే….

యే కేచి బుద్ధస్స భగవతో వోహారం సుణన్తి, సబ్బే తే మగ్గం భావేన్తీతి? ఆమన్తా. బాలపుథుజ్జనా బుద్ధస్స భగవతో వోహారం సుణన్తి, బాలపుథుజ్జనా మగ్గం భావేన్తీతి? న హేవం వత్తబ్బే…పే… మాతుఘాతకో మగ్గం భావేతి…పే… పితుఘాతకో… అరహన్తఘాతకో… రుహిరుప్పాదకో… సఙ్ఘభేదకో బుద్ధస్స భగవతో వోహారం సుణాతి, సఙ్ఘభేదకో మగ్గం భావేతీతి? న హేవం వత్తబ్బే…పే….

౩౫౧. లబ్భా సోవణ్ణమయాయ లట్ఠియా ధఞ్ఞపుఞ్జోపి సువణ్ణపుఞ్జోపి ఆచిక్ఖితున్తి? ఆమన్తా. ఏవమేవం భగవా లోకుత్తరేన వోహారేన లోకియమ్పి లోకుత్తరమ్పి ధమ్మం వోహరతీతి.

లబ్భా ఏలణ్డియాయ లట్ఠియా ధఞ్ఞపుఞ్జోపి సువణ్ణపుఞ్జోపి ఆచిక్ఖితున్తి? ఆమన్తా. ఏవమేవం భగవా లోకియేన వోహారేన లోకియమ్పి లోకుత్తరమ్పి ధమ్మం వోహరతీతి.

౩౫౨. బుద్ధస్స భగవతో వోహారో లోకియం వోహరన్తస్స లోకియో హోతి, లోకుత్తరం వోహరన్తస్స లోకుత్తరో హోతీతి? ఆమన్తా. లోకియం వోహరన్తస్స లోకియే సోతే పటిహఞ్ఞతి, లోకుత్తరం వోహరన్తస్స లోకుత్తరే సోతే పటిహఞ్ఞతి; లోకియం వోహరన్తస్స లోకియేన విఞ్ఞాణేన పటివిజానన్తి, లోకుత్తరం వోహరన్తస్స లోకుత్తరేన విఞ్ఞాణేన పటివిజానన్తి; లోకియం వోహరన్తస్స పుథుజ్జనా పటివిజానన్తి, లోకుత్తరం వోహరన్తస్స సావకా పటివిజానన్తీతి? న హేవం వత్తబ్బే…పే….

న వత్తబ్బం – ‘‘బుద్ధస్స భగవతో వోహారో లోకియం వోహరన్తస్స లోకియో హోతి, లోకుత్తరం వోహరన్తస్స లోకుత్తరో హోతీతి? ఆమన్తా. నను భగవా లోకియమ్పి లోకుత్తరమ్పి ధమ్మం వోహరతీతి? ఆమన్తా. హఞ్చి భగవా లోకియమ్పి లోకుత్తరమ్పి ధమ్మం వోహరతి, తేన వత రే వత్తబ్బే – ‘‘బుద్ధస్స భగవతో వోహారో లోకియం వోహరన్తస్స లోకియో హోతి, లోకుత్తరం వోహరన్తస్స లోకుత్తరో హోతీ’’తి.

బుద్ధస్స భగవతో వోహారో లోకియం వోహరన్తస్స లోకియో హోతి, లోకుత్తరం వోహరన్తస్స లోకుత్తరో హోతీతి? ఆమన్తా. మగ్గం వోహరన్తస్స మగ్గో హోతి, అమగ్గం వోహరన్తస్స అమగ్గో హోతి, ఫలం వోహరన్తస్స ఫలం హోతి, అఫలం వోహరన్తస్స అఫలం హోతి, నిబ్బానం వోహరన్తస్స నిబ్బానం హోతి, అనిబ్బానం వోహరన్తస్స అనిబ్బానం హోతి, సఙ్ఖతం వోహరన్తస్స సఙ్ఖతం హోతి, అసఙ్ఖతం వోహరన్తస్స అసఙ్ఖతం హోతి, రూపం వోహరన్తస్స రూపం హోతి, అరూపం వోహరన్తస్స అరూపం హోతి, వేదనం వోహరన్తస్స వేదనా హోతి, అవేదనం వోహరన్తస్స అవేదనా హోతి, సఞ్ఞం వోహరన్తస్స సఞ్ఞా హోతి, అసఞ్ఞం వోహరన్తస్స అసఞ్ఞా హోతి, సఙ్ఖారే వోహరన్తస్స సఙ్ఖారా హోన్తి, అసఙ్ఖారే వోహరన్తస్స అసఙ్ఖారా హోన్తి, విఞ్ఞాణం వోహరన్తస్స విఞ్ఞాణం హోతి, అవిఞ్ఞాణం వోహరన్తస్స అవిఞ్ఞాణం హోతీతి? న హేవం వత్తబ్బే…పే….

వోహారకథా నిట్ఠితా.