౪. సీలానుస్సతికథావణ్ణనా

౧౫౮. అహో వత సీలాని అఖణ్డాని, అహో వత అచ్ఛిద్దానీతి ఏవం సబ్బత్థ యోజేతబ్బం. అహో వతాతి చ సమ్భావనే నిపాతో. తేనాహ ‘‘అఖణ్డతాదిగుణవసేనా’’తి. అఖణ్డభావాదిసమ్పత్తివసేనాతి అత్థో. పరస్స సీలాని అనుస్సరియమానాని పియమనాపభావావహనేన కేవలం మేత్తాయ పదట్ఠానం హోన్తి, న విసుం కమ్మట్ఠానన్తి ఆహ ‘‘అత్తనో సీలాని అనుస్సరితబ్బానీ’’తి. చాగాదీసుపి ఏసేవ నయో.

యేసన్తి సీలాదీనం. పటిపాటియా సమాదానే సమాదానక్కమేన, ఏకజ్ఝం సమాదానే ఉద్దేసక్కమేన సీలానం ఆదిఅన్తం వేదితబ్బం. పరియన్తే ఛిన్నసాటకో వియాతి వత్థన్తే, దసన్తే వా ఛిన్నవత్థం వియ, విసదిసూదాహరణం చేతం. ఏవం సేసానిపి ఉదాహరణాని. వినివేధవసేన ఛిన్నసాటకో వినివిద్ధసాటకో. విసభాగవణ్ణేన గావీ వియాతి సమ్బన్ధో. సబలరహితాని వా అసబలాని. తథా అకమ్మాసాని. సత్తవిధమేథునసంయోగో హేట్ఠా సీలకథాయం వుత్తో ఏవ. కోధూపనాహాదీహీతి ఆది-సద్దేన మక్ఖపళాసఇస్సామచ్ఛరియమాయాసాఠేయ్యమానాతిమానాదయో గహితా. తానియేవ అఖణ్డాదిగుణాని సీలాని. సీలస్స తణ్హాదాసబ్యతో మోచనం వివట్టూపనిస్సయభావాపాదనం. తతో ఏవ తంసమఙ్గీపుగ్గలో సేరీ సయంవసీ భుజిస్సో నామ హోతి. తేనాహ ‘‘భుజిస్సభావకరణేన భుజిస్సానీ’’తి. ‘‘ఇమినాహం సీలేన దేవో వా భవేయ్యం దేవఞ్ఞతరో వా, తత్థ నిచ్చో ధువో సస్సతో’’తి, ‘‘సీలేన సుద్ధీ’’తి చ ఏవమాదినా తణ్హాదిట్ఠీహి అపరామట్ఠత్తా అయం తే సీలేసు దోసోతి చతూసు విపత్తీసు యాయ కాయచి విపత్తియా దస్సనేన పరామట్ఠుం అనుద్ధంసేతుం. సమాధిసంవత్తనప్పయోజనాని సమాధిసంవత్తనికాని.

౧౫౯. సిక్ఖాయ సగారవోతి సీలధనం నిస్సాయ పటిలద్ధసమాదానత్తా సాతిసయం సిక్ఖాయ సగారవో సప్పతిస్సో హోతి. సభాగవుత్తీతి సమ్పన్నసీలేహి సభాగవుత్తికో, తాయ ఏవ వా సిక్ఖాయ సభాగవుత్తి. యో హి సిక్ఖాగారవరహితో, సో తాయ విసభాగవుత్తి నామ హోతి విలోమనతో. యథా పరేహి సద్ధిం అత్తనో ఛిద్దం న హోతి, ఏవం ధమ్మామిసేహి పటిసన్థరణం పటిసన్థారో. సిక్ఖాయ సగారవత్తా ఏవ తత్థ అప్పమత్తో హోతి. అత్తానువాదభయం పరానువాదభయం దణ్డభయం దుగ్గతిభయన్తి ఏవమాదీని భయాని ఇమస్స దూరసముస్సారితానీతి ఆహ ‘‘అత్తానువాదాదిభయవిరహితో’’తి. సేసం సువిఞ్ఞేయ్యమేవ.