౫. సేసకసిణనిద్దేసో

ఆపోకసిణకథా

౯౧. ఇదాని పథవీకసిణానన్తరే ఆపోకసిణే విత్థారకథా హోతి. యథేవ హి పథవీకసిణం, ఏవం ఆపోకసిణమ్పి భావేతుకామేన సుఖనిసిన్నేన ఆపస్మిం నిమిత్తం గణ్హితబ్బం, కతే వా అకతే వాతి సబ్బం విత్థారేతబ్బం. యథా చ ఇధ, ఏవం సబ్బత్థ. ఇతో పరఞ్హి ఏత్తకమ్పి అవత్వా విసేసమత్తమేవ వక్ఖామ.

ఇధాపి పుబ్బేకతాధికారస్స పుఞ్ఞవతో అకతే ఆపస్మిం పోక్ఖరణియా వా తళాకే వా లోణియం వా సముద్దే వా నిమిత్తం ఉప్పజ్జతి చూళసివత్థేరస్స వియ. తస్స కిరాయస్మతో లాభసక్కారం పహాయ వివిత్తవాసం వసిస్సామీతి మహాతిత్థే నావమారూహిత్వా జమ్బుదీపం గచ్ఛతో అన్తరా మహాసముద్దం ఓలోకయతో తప్పటిభాగం కసిణనిమిత్తం ఉదపాది.

అకతాధికారేన చత్తారో కసిణదోసే పరిహరన్తేన నీలపీతలోహితోదాతవణ్ణానమఞ్ఞతరవణ్ణం ఆపం అగహేత్వా యం పన భూమిం అసమ్పత్తమేవ ఆకాసే సుద్ధవత్థేన గహితం ఉదకం, అఞ్ఞం వా తథారూపం విప్పసన్నం అనావిలం, తేన పత్తం వా కుణ్డికం వా సమతిత్తికం పూరేత్వా విహారపచ్చన్తే వుత్తప్పకారే పటిచ్ఛన్నే ఓకాసే ఠపేత్వా సుఖనిసిన్నేన న వణ్ణో పచ్చవేక్ఖితబ్బో. న లక్ఖణం మనసి కాతబ్బం. నిస్సయసవణ్ణమేవ కత్వా ఉస్సదవసేన పణ్ణత్తిధమ్మే చిత్తం ఠపేత్వా అమ్బు, ఉదకం, వారి, సలిలన్తిఆదీసు ఆపోనామేసు పాకటనామవసేనేవ ‘‘ఆపో ఆపో’’తి భావేతబ్బం.

తస్సేవం భావయతో అనుక్కమేన వుత్తనయేనేవ నిమిత్తద్వయం ఉప్పజ్జతి. ఇధ పన ఉగ్గహనిమిత్తం చలమానం వియ ఉపట్ఠాతి, సచే ఫేణపుప్ఫుళకమిస్సం ఉదకం హోతి, తాదిసమేవ ఉపట్ఠాతి, కసిణదోసో పఞ్ఞాయతి. పటిభాగనిమిత్తం పన నిప్పరిప్ఫన్దం ఆకాసే ఠపితమణితాలవణ్టం వియ మణిమయాదాసమణ్డలమివ చ హుత్వా ఉపట్ఠాతి. సో తస్స సహ ఉపట్ఠానేనేవ ఉపచారజ్ఝానం, వుత్తనయేనేవ చతుక్కపఞ్చకజ్ఝానాని చ పాపుణాతీతి. ఆపోకసిణం.

తేజోకసిణకథా

౯౨. తేజోకసిణం భావేతుకామేనాపి తేజస్మిం నిమిత్తం గణ్హితబ్బం. తత్థ కతాధికారస్స పుఞ్ఞవతో అకతే నిమిత్తం గణ్హన్తస్స దీపసిఖాయ వా ఉద్ధనే వా పత్తపచనట్ఠానే వా దవదాహే వా యత్థ కత్థచి అగ్గిజాలం ఓలోకేన్తస్స నిమిత్తం ఉప్పజ్జతి చిత్తగుత్తత్థేరస్స వియ. తస్స హాయస్మతో ధమ్మస్సవనదివసే ఉపోసథాగారం పవిట్ఠస్స దీపసిఖం ఓలోకేన్తస్సేవ నిమిత్తం ఉప్పజ్జి.

ఇతరేన పన కాతబ్బం. తత్రిదం కరణవిధానం, సినిద్ధాని సారదారూని ఫాలేత్వా సుక్ఖాపేత్వా ఘటికం ఘటికం కత్వా పతిరూపం రుక్ఖమూలం వా మణ్డపం వా గన్త్వా పత్తపచనాకారేన రాసిం కత్వా ఆలిమ్పేత్వా కటసారకే వా చమ్మే వా పటే వా విదత్థిచతురఙ్గులప్పమాణం ఛిద్దం కాతబ్బం. తం పురతో ఠపేత్వా వుత్తనయేనేవ నిసీదిత్వా హేట్ఠా తిణకట్ఠం వా ఉపరి ధూమసిఖం వా అమనసికరిత్వా వేమజ్ఝే ఘనజాలాయ నిమిత్తం గణ్హితబ్బం, నీలన్తి వా పీతన్తి వాతిఆదివసేన వణ్ణో న పచ్చవేక్ఖితబ్బో, ఉణ్హత్తవసేన లక్ఖణం న మనసి కాతబ్బం. నిస్సయసవణ్ణమేవ కత్వా ఉస్సదవసేన పణ్ణత్తిధమ్మే చిత్తం ఠపేత్వా పావకో, కణ్హవత్తనీ, జాతవేదో, హుతాసనోతిఆదీసు అగ్గినామేసు పాకటనామవసేనేవ ‘‘తేజో తేజో’’తి భావేతబ్బం.

తస్సేవం భావయతో అనుక్కమేన వుత్తనయేనేవ నిమిత్తద్వయం ఉప్పజ్జతి. తత్థ ఉగ్గహనిమిత్తం జాలం ఛిజ్జిత్వా ఛిజ్జిత్వా పతనసదిసం హుత్వా ఉపట్ఠాతి. అకతే గణ్హన్తస్స పన కసిణదోసో పఞ్ఞాయతి, అలాతఖణ్డం వా అఙ్గారపిణ్డో వా ఛారికా వా ధూమో వా ఉపట్ఠాతి. పటిభాగనిమిత్తం నిచ్చలం ఆకాసే ఠపితరత్తకమ్బలక్ఖణ్డం వియ సువణ్ణతాలవణ్టం వియ కఞ్చనత్థమ్భో వియ చ ఉపట్ఠాతి. సో తస్స సహ ఉపట్ఠానేనేవ ఉపచారజ్ఝానం, వుత్తనయేనేవ చతుక్కపఞ్చకజ్ఝానాని చ పాపుణాతీతి. తేజోకసిణం.

వాయోకసిణకథా

౯౩. వాయోకసిణం భావేతుకామేనాపి వాయుస్మిం నిమిత్తం గణ్హితబ్బం. తఞ్చ ఖో దిట్ఠవసేన వా ఫుట్ఠవసేన వా. వుత్తఞ్హేతం అట్ఠకథాసు ‘‘వాయోకసిణం ఉగ్గణ్హన్తో వాయుస్మిం నిమిత్తం గణ్హాతి, ఉచ్ఛగ్గం వా ఏరితం సమేరితం ఉపలక్ఖేతి, వేళగ్గం వా…పే… రుక్ఖగ్గం వా కేసగ్గం వా ఏరితం సమేరితం ఉపలక్ఖేతి, కాయస్మిం వా ఫుట్ఠం ఉపలక్ఖేతీ’’తి. తస్మా సమసీసట్ఠితం ఘనపత్తం ఉచ్ఛుం వా వేళుం వా రుక్ఖం వా చతురఙ్గులప్పమాణం ఘనకేసస్స పురిసస్స సీసం వా వాతేన పహరియమానం దిస్వా ‘‘అయం వాతో ఏతస్మిం ఠానే పహరతీ’’తి సతిం ఠపేత్వా, యం వా పనస్స వాతపానన్తరికాయ వా భిత్తిఛిద్దేన వా పవిసిత్వా వాతో కాయప్పదేసం పహరతి, తత్థ సతిం ఠపేత్వా వాతమాలుతఅనిలాదీసు వాయునామేసు పాకటనామవసేనేవ ‘‘వాతో వాతో’’తి భావేతబ్బం. ఇధ ఉగ్గహనిమిత్తవడ్ఢనతో ఓతారితమత్తస్స పాయాసస్స ఉసుమవట్టిసదిసం చలం హుత్వా ఉపట్ఠాతి. పటిభాగనిమిత్తం సన్నిసిన్నం హోతి నిచ్చలం. సేసం వుత్తనయేనేవ వేదితబ్బన్తి. వాయోకసిణం.

నీలకసిణకథా

౯౪. తదనన్తరం పన నీలకసిణం ఉగ్గణ్హన్తో నీలకస్మిం నిమిత్తం గణ్హాతి పుప్ఫస్మిం వా వత్థస్మిం వా వణ్ణధాతుయా వాతి వచనతో కతాధికారస్స పుఞ్ఞవతో తావ తథారూపం మాలాగచ్ఛం వా పూజాఠానేసు పుప్ఫసన్థరం వా నీలవత్థమణీనం వా అఞ్ఞతరం దిస్వావ నిమిత్తం ఉప్పజ్జతి. ఇతరేన నీలుప్పలగిరికణ్ణికాదీని పుప్ఫాని గహేత్వా యథా కేసరం వా వణ్టం వా న పఞ్ఞాయతి, ఏవం చఙ్గోటకం వా కరణ్డపటలం వా పత్తేహియేవ సమతిత్తికం పూరేత్వా సన్థరితబ్బం. నీలవణ్ణేన వా వత్థేన భణ్డికం బన్ధిత్వా పూరేతబ్బం. ముఖవట్టియం వా అస్స భేరితలమివ బన్ధితబ్బం. కంసనీలపలాసనీలఅఞ్జననీలానం వా అఞ్ఞతరేన ధాతునా పథవీకసిణే వుత్తనయేన సంహారిమం వా భిత్తియంయేవ వా కసిణమణ్డలం కత్వా విసభాగవణ్ణేన పరిచ్ఛిన్దితబ్బం. తతో పథవీకసిణే వుత్తనయేన ‘‘నీలం నీల’’న్తి మనసికారో పవత్తేతబ్బో. ఇధాపి ఉగ్గహనిమిత్తే కసిణదోసో పఞ్ఞాయతి, కేసరదణ్డకపత్తన్తరికాదీని ఉపట్ఠహన్తి. పటిభాగనిమిత్తం కసిణమణ్డలతో ముఞ్చిత్వా ఆకాసే మణితాలవణ్టసదిసం ఉపట్ఠాతి. సేసం వుత్తనయేనేవ వేదితబ్బన్తి. నీలకసిణం.

పీతకసిణకథా

౯౫. పీతకసిణేపి ఏసేవ నయో. వుత్తఞ్హేతం పీతకసిణం ఉగ్గణ్హన్తో పీతకస్మిం నిమిత్తం గణ్హాతి పుప్ఫస్మిం వా వత్థస్మిం వా వణ్ణధాతుయా వాతి. తస్మా ఇధాపి కతాధికారస్స పుఞ్ఞవతో తథారూపం మాలాగచ్ఛం వా పుప్ఫసన్థరం వా పీతవత్థధాతూనం వా అఞ్ఞతరం దిస్వావ నిమిత్తం ఉప్పజ్జతి చిత్తగుత్తత్థేరస్స వియ. తస్స కిరాయస్మతో చిత్తలపబ్బతే పత్తఙ్గపుప్ఫేహి కతం ఆసనపూజం పస్సతో సహ దస్సనేనేవ ఆసనప్పమాణం నిమిత్తం ఉదపాది. ఇతరేన కణికారపుప్ఫాదినా వా పీతవత్థేన వా ధాతునా వా నీలకసిణే వుత్తనయేనేవ కసిణం కత్వా ‘‘పీతకం పీతక’’న్తి మనసికారో పవత్తేతబ్బో. సేసం తాదిసమేవాతి. పీతకసిణం.

లోహితకసిణకథా

౯౬. లోహితకసిణేపి ఏసేవ నయో. వుత్తఞ్హేతం లోహితకసిణం ఉగ్గణ్హన్తో లోహితకస్మిం నిమిత్తం గణ్హాతి పుప్ఫస్మిం వా వత్థస్మిం వా వణ్ణధాతుయా వాతి. తస్మా ఇధాపి కతాధికారస్స పుఞ్ఞవతో తథారూపం బన్ధుజీవకాదిమాలాగచ్ఛం వా పుప్ఫసన్థరం వా లోహితకవత్థమణిధాతూనం వా అఞ్ఞతరం దిస్వావ నిమిత్తం ఉప్పజ్జతి. ఇతరేన జయసుమనబన్ధుజీవకరత్తకోరణ్డకాదిపుప్ఫేహి వా రత్తవత్థేన వా ధాతునా వా నీలకసిణే వుత్తనయేనేవ కసిణం కత్వా ‘‘లోహితకం లోహితక’’న్తి మనసికారో పవత్తేతబ్బో. సేసం తాదిసమేవాతి. లోహితకసిణం.

ఓదాతకసిణకథా

౯౭. ఓదాతకసిణేపి ఓదాతకసిణం ఉగ్గణ్హన్తో ఓదాతస్మిం నిమిత్తం గణ్హాతి పుప్ఫస్మిం వా వత్థస్మిం వా వణ్ణధాతుయా వాతి వచనతో కతాధికారస్స తావ పుఞ్ఞవతో తథారూపం మాలాగచ్ఛం వా వస్సికసుమనాదిపుప్ఫసన్థరం వా కుముదపదుమరాసిం వా ఓదాతవత్థధాతూనం వా అఞ్ఞతరం దిస్వావ నిమిత్తం ఉప్పజ్జతి, తిపుమణ్డలరజతమణ్డలచన్దమణ్డలేసుపి ఉప్పజ్జతియేవ. ఇతరేన వుత్తప్పకారేహి ఓదాతపుప్ఫేహి వా ఓదాతవత్థేన వా ధాతునా వా నీలకసిణే వుత్తనయేనేవ కసిణం కత్వా ‘‘ఓదాతం ఓదాత’’న్తి మనసికారో పవత్తేతబ్బో. సేసం తాదిసమేవాతి. ఓదాతకసిణం.

ఆలోకకసిణకథా

౯౮. ఆలోకకసిణే పన ఆలోకకసిణం ఉగ్గణ్హన్తో ఆలోకస్మిం నిమిత్తం గణ్హాతి భిత్తిఛిద్దే వా తాళచ్ఛిద్దే వా వాతపానన్తరికాయ వాతి వచనతో కతాధికారస్స తావ పుఞ్ఞవతో యం భిత్తిఛిద్దాదీనం అఞ్ఞతరేన సూరియాలోకో వా చన్దాలోకో వా పవిసిత్వా భిత్తియం వా భూమియం వా మణ్డలం సముట్ఠాపేతి, ఘనపణ్ణరుక్ఖసాఖన్తరేన వా ఘనసాఖామణ్డపన్తరేన వా నిక్ఖమిత్వా భూమియమేవ మణ్డలం సముట్ఠాపేతి, తం దిస్వావ నిమిత్తం ఉప్పజ్జతి. ఇతరేనాపి తదేవ వుత్తప్పకారమోభాసమణ్డలం ‘‘ఓభాసో ఓభాసో’’తి వా ‘‘ఆలోకో ఆలోకో’’తి వా భావేతబ్బం. తథా అసక్కోన్తేన ఘటే దీపం జాలేత్వా ఘటముఖం పిదహిత్వా ఘటే ఛిద్దం కత్వా భిత్తిముఖం ఠపేతబ్బం. తేన ఛిద్దేన దీపాలోకో నిక్ఖమిత్వా భిత్తియం మణ్డలం కరోతి, తం ఆలోకో ఆలోకోతి భావేతబ్బం. ఇదమితరేహి చిరట్ఠితికం హోతి. ఇధ ఉగ్గహనిమిత్తం భిత్తియం వా భూమియం వా ఉట్ఠితమణ్డలసదిసమేవ హోతి. పటిభాగనిమిత్తం ఘనవిప్పసన్నఆలోకపుఞ్జసదిసం. సేసం తాదిసమేవాతి. ఆలోకకసిణం.

పరిచ్ఛిన్నాకాసకసిణకథా

౯౯. పరిచ్ఛిన్నాకాసకసిణేపి ఆకాసకసిణం ఉగ్గణ్హన్తో ఆకాసస్మిం నిమిత్తం గణ్హాతి భిత్తిఛిద్దే వా తాళచ్ఛిద్దే వా వాతపానన్తరికాయ వాతి వచనతో కతాధికారస్స తావ పుఞ్ఞవతో భిత్తిఛిద్దాదీసు అఞ్ఞతరం దిస్వావ నిమిత్తం ఉప్పజ్జతి. ఇతరేన సుచ్ఛన్నమణ్డపే వా చమ్మకటసారకాదీనం వా అఞ్ఞతరస్మిం విదత్థిచతురఙ్గులప్పమాణం ఛిద్దం కత్వా తదేవ వా భిత్తిఛిద్దాదిభేదం ఛిద్దం ‘‘ఆకాసో ఆకాసో’’తి భావేతబ్బం. ఇధ ఉగ్గహనిమిత్తం సద్ధిం భిత్తిపరియన్తాదీహి ఛిద్దసదిసమేవ హోతి, వడ్ఢియమానమ్పి న వడ్ఢతి. పటిభాగనిమిత్తమాకాసమణ్డలమేవ హుత్వా ఉపట్ఠాతి, వడ్ఢియమానఞ్చ వడ్ఢతి. సేసం పథవీకసిణే వుత్తనయేనేవ వేదితబ్బన్తి. పరిచ్ఛిన్నాకాసకసిణం.

ఇతి కసిణాని దసబలో,

దస యాని అవోచ సబ్బధమ్మదసో;

రూపావచరమ్హి చతుక్కపఞ్చకజ్ఝానహేతూని.

ఏవం తాని చ తేసఞ్చ,

భావనానయమిమం విదిత్వాన;

తేస్వేవ అయం భియ్యో,

పకిణ్ణకకథాపి విఞ్ఞేయ్యా.

పకిణ్ణకకథా

౧౦౦. ఇమేసు హి పథవీకసిణవసేన ఏకోపి హుత్వా బహుధా హోతీతిఆదిభావో, ఆకాసే వా ఉదకే వా పథవిం నిమ్మినిత్వా పదసా గమనం, ఠాననిసజ్జాదికప్పనం వా, పరిత్తఅప్పమాణనయేన అభిభాయతనపటిలాభోతి ఏవమాదీని ఇజ్ఝన్తి.

ఆపోకసిణవసేన పథవియం ఉమ్ముజ్జననిమ్ముజ్జనం, ఉదకవుట్ఠిసముప్పాదనం, నదీసముద్దాదినిమ్మానం, పథవీపబ్బతపాసాదాదీనం కమ్పనన్తి ఏవమాదీని ఇజ్ఝన్తి.

తేజోకసిణవసేన ధూమాయనా, పజ్జలనా, అఙ్గారవుట్ఠిసముప్పాదనం, తేజసా తేజోపరియాదానం, యదేవ సో ఇచ్ఛతి తస్స డహనసమత్థతా, దిబ్బేన చక్ఖునా రూపదస్సనత్థాయ ఆలోకకరణం, పరినిబ్బానసమయే తేజోధాతుయా సరీరజ్ఝాపనన్తి ఏవమాదీని ఇజ్ఝన్తి.

వాయోకసిణవసేన వాయుగతిగమనం, వాతవుట్ఠిసముప్పాదనన్తి ఏవమాదీని ఇజ్ఝన్తి.

నీలకసిణవసేన నీలరూపనిమ్మానం, అన్ధకారకరణం, సువణ్ణదుబ్బణ్ణనయేన అభిభాయతనపటిలాభో, సుభవిమోక్ఖాధిగమోతి ఏవమాదీని ఇజ్ఝన్తి.

పీతకసిణవసేన పీతకరూపనిమ్మానం, సువణ్ణన్తి అధిముచ్చనా, వుత్తనయేనేవ అభిభాయతనపటిలాభో, సుభవిమోక్ఖాధిగమో చాతి ఏవమాదీని ఇజ్ఝన్తి.

లోహితకసిణవసేన లోహితకరూపనిమ్మానం, వుత్తనయేనేవ అభిభాయతనపటిలాభో, సుభవిమోక్ఖాధిగమోతి ఏవమాదీని ఇజ్ఝన్తి.

ఓదాతకసిణవసేన ఓదాతరూపనిమ్మానం, థినమిద్ధస్స దూరభావకరణం, అన్ధకారవిధమనం, దిబ్బేన చక్ఖునా రూపదస్సనత్థాయ ఆలోకకరణన్తి ఏవమాదీని ఇజ్ఝన్తి.

ఆలోకకసిణవసేన సప్పభారూపనిమ్మానం, థినమిద్ధస్స దూరభావకరణం, అన్ధకారవిధమనం, దిబ్బేన చక్ఖునా రూపదస్సనత్థం ఆలోకకరణన్తి ఏవమాదీని ఇజ్ఝన్తి.

ఆకాసకసిణవసేన పటిచ్ఛన్నానం వివటకరణం, అన్తోపథవీపబ్బతాదీసుపి ఆకాసం నిమ్మినిత్వా ఇరియాపథకప్పనం, తిరోకుడ్డాదీసు అసజ్జమానగమనన్తి ఏవమాదీని ఇజ్ఝన్తి.

సబ్బానేవ ఉద్ధం అధో తిరియం అద్వయం అప్పమాణన్తి ఇమం పభేదం లభన్తి. వుత్తఞ్హేతం ‘‘పథవీకసిణమేకో సఞ్జానాతి. ఉద్ధమధోతిరియం అద్వయమప్పమాణ’’న్తిఆది.

తత్థ ఉద్ధన్తి ఉపరిగగనతలాభిముఖం. అధోతి హేట్ఠాభూమితలాభిముఖం. తిరియన్తి ఖేత్తమణ్డలమివ సమన్తా పరిచ్ఛిన్దితం. ఏకచ్చో హి ఉద్ధమేవ కసిణం వడ్ఢేతి, ఏకచ్చో అధో, ఏకచ్చో సమన్తతో. తేన తేన వా కారణేన ఏవం పసారేతి. ఆలోకమివ దిబ్బచక్ఖునా రూపదస్సనకామో. తేన వుత్తం ఉద్ధమధోతిరియన్తి. అద్వయన్తి ఇదం పన ఏకస్స అఞ్ఞభావానుపగమనత్థం వుత్తం. యథా హి ఉదకం పవిట్ఠస్స సబ్బదిసాసు ఉదకమేవ హోతి, న అఞ్ఞం, ఏవమేవ పథవీకసిణం పథవీకసిణమేవ హోతి, నత్థి తస్స అఞ్ఞో కసిణసమ్భేదోతి. ఏసేవ నయో సబ్బత్థ. అప్పమాణన్తి ఇదం తస్స ఫరణఅప్పమాణవసేన వుత్తం. తఞ్హి చేతసా ఫరన్తో సకలమేవ ఫరతి. న అయమస్స ఆది ఇదం మజ్ఝన్తి పమాణం గణ్హాతీతి.

౧౦౧. యే చ తే సత్తా కమ్మావరణేన వా సమన్నాగతా కిలేసావరణేన వా సమన్నాగతా విపాకావరణేన వా సమన్నాగతా అసద్ధా అచ్ఛన్దికా దుప్పఞ్ఞా అభబ్బా నియామం ఓక్కమితుం కుసలేసు ధమ్మేసు సమ్మత్తన్తి వుత్తా, తేసమేకస్సాపేకకసిణేపి భావనా న ఇజ్ఝతి. తత్థ కమ్మావరణేన సమన్నాగతాతి ఆనన్తరియకమ్మసమఙ్గినో. కిలేసావరణేన సమన్నాగతాతి నియతమిచ్ఛాదిట్ఠికా చేవ ఉభతోబ్యఞ్జనకపణ్డకా చ. విపాకావరణేన సమన్నాగతాతి అహేతుకద్విహేతుకపటిసన్ధికా. అసద్ధాతి బుద్ధాదీసు సద్ధావిరహితా. అచ్ఛన్దికాతి అపచ్చనీకపటిపదాయం ఛన్దవిరహితా. దుప్పఞ్ఞాతి లోకియలోకుత్తరసమ్మాదిట్ఠియా విరహితా. అభబ్బా నియామం ఓక్కమితుం కుసలేసు ధమ్మేసు సమ్మత్తన్తి కుసలేసు ధమ్మేసు నియామసఙ్ఖాతం సమ్మత్తసఙ్ఖాతఞ్చ అరియమగ్గం ఓక్కమితుం అభబ్బాతి అత్థో. న కేవలఞ్చ కసిణేయేవ, అఞ్ఞేసుపి కమ్మట్ఠానేసు ఏతేసమేకస్సపి భావనా న ఇజ్ఝతి. తస్మా విగతవిపాకావరణేనపి కులపుత్తేన కమ్మావరణఞ్చ కిలేసావరణఞ్చ ఆరకా పరివజ్జేత్వా సద్ధమ్మస్సవనసప్పురిసూపనిస్సయాదీహి సద్ధఞ్చ ఛన్దఞ్చ పఞ్ఞఞ్చ వడ్ఢేత్వా కమ్మట్ఠానానుయోగే యోగో కరణీయోతి.

ఇతి సాధుజనపామోజ్జత్థాయ కతే విసుద్ధిమగ్గే

సమాధిభావనాధికారే

సేసకసిణనిద్దేసో నామ

పఞ్చమో పరిచ్ఛేదో.