౪౦. కుణ్డలియా వత్థుమ్హి అయమానుపుబ్బీకథా

లఙ్కాదీపే రోహణజపదే మహాగామో నామ అహోసి, తత్థ తిస్సవిహారం నామ అనేకసతభిక్ఖూహి సమాకిణ్ణం అనేకపరివేణపతిమణ్డితం విహారం అహోసి. తత్థేకో తిస్సో నామ సామణేరో పటివసతి. సో ఏకస్మింసమయే జనపదచారికం చరన్తో పాసాణవాపిగామే భిక్ఖం చరిత్వా యాపనమత్తం భత్తం సప్పినా సద్ధిం లభిత్వా నిక్ఖమ్మ గామద్వారం పత్వా మహాగామాభిముఖో గచ్ఛన్తో మనుస్సే ఉదకఫాసుకట్ఠానం పుచ్ఛి. తేహి భన్తే తుమ్హాకం అభిముఖే అవిదూరట్ఠానే కకుబన్దకన్దరం నామ సన్దమానసీతలోదకం ధవలవాలుకాతలం తత్థ తుమ్హే గన్త్వా నహాత్వా సీతలచ్ఛాయాయ వాలుకాతలే నిసిన్నో భత్తకిచ్చం కత్వా గచ్ఛథాతి వుత్తే సామణేరో సాధూతి వత్వా తత్థ గన్త్వా ఫాసుకట్ఠానే నిసిన్నో భత్తం భుఞ్జితుమారభి. తదా ఏకేన వనకమ్మికేన సద్ధింఅరఞ్ఞం గతా ఏకా సునఖీ తస్మిం కన్దరే ఏకస్మిం పబ్భారట్ఠానే దారకే విజాయిత్వా ఛాతజ్ఝత్తా పవేధమానగత్తా దారకానం సమీపేనిపన్నా సామణేరస్స పత్తే ఆహారగన్ధం ఘాయిత్వా నిపన్నట్ఠానతో వుట్ఠాయ పవేధమానా తస్స సమీపం ఆగమ్మ నఙ్గుట్ఠం చాలేన్తీ అట్ఠాసి, సామణేరో తం దిస్వా కమ్పితమానసో అత్తనో భోజనత్థాయ వట్టితం పథమాలోపం తస్సా పురతో ఠపేసి, తతో సా సోమనస్సా తం భుఞ్జి. తం దిస్వా తుట్ఠో పునప్పునం ఆలోపం కరోన్తో తస్సా భత్తం దత్వా పత్తం ధోవిత్వా థవికాయ పక్ఖిపిత్వా అగమాసి. తతో సా సునఖీ సామణేరగతేన పసాదేన తతో చుతా జమ్బుదీపే దేవపుత్తనగరే రాజానం పటిచ్చ తస్స మహేసియా కుచ్ఛిమ్హి పటిసన్ధిం గణ్హిత్వా దసమాసచ్చయేన మాతుకుచ్ఛితో నిక్ఖమి, అథస్సా సిఖామఙ్గలదివసే సమ్పత్తే మాతాపితరో పనస్సా కుణ్డలావట్టకేసత్తా కుణ్డలాతి నామ మకంసు. సా అనుక్కమేన సోళసవస్సుద్దేసికా అహోసి, తస్మిం కిర సమయే తిస్సో సామణేరో మహాబోధిం వన్దిస్సామీతి నావం అభిరుయ్హ జమ్బుదీపం గన్త్వా అనుపుబ్బేన దేవపుత్తనగరం పత్వా సునివత్థో సుపారుతో యుగమత్తదసో భిక్ఖాయ చరన్తో మహావీథిం సమ్పాపుణి. రాజధీతా సీహపఞ్జరం ఉగ్ఘాటేత్వా అన్తరవీథిం ఓలోకేన్తీ భిక్ఖన్తం సామణేరం దిస్వా పుబ్బసినేహం పటిలభి, తస్మింఖణే తస్సా జాతిస్సరఞాణం అహోసి. సా కిర పుబ్బే భిక్ఖుణీ హుత్వా పణ్ణసూచియా సద్ధిం పోత్థకఞ్చ పదీపియతేలఞ్చ దత్వా జాతిస్సరా భవేయ్యంతి పత్థనం ఠపేసి, తతో సాజాతిం అనుస్సరన్తీ సామణేరేన అత్తనో కతూపకారం దిత్వా సోమనస్సా నం పక్కోసాపేత్వా రాజగేహే ఆసనం పఞ్ఞాపేత్వా తత్థ నిసిన్నం నానగ్గరస భోజనేన పరివిసిత్వా ఓనీతపత్తపాణిం సామణేరం ఉపసఙ్కమిత్వా వన్దిత్వా ఏకమన్తం నిసిన్నా తేన సద్ధిం సల్లపన్తీ ఏవమాహ.

౧. న సఞ్జానాసి మం ధీర, పుబ్బేహం తవ దాసికా;

తేనాహం సుఖితా ఆసిం, తస్మా త్వమసి ఇస్సరోతి.

తం సుత్వా సామణేరో ఆహ.

౨. నత్థి మే తాదిసీ దాసీ, న సఞ్జానామి తం అహం;

కాసి త్వం కస్స వా ధీతా, తం మే అక్ఖాహి పుచ్ఛితాతి.

తతో సా తం సారాపేన్తీ ఆహ.

౩. సారాపేమి తువం అజ్జ, యథా జానాసిమం ఇసే;

బుజ్ఝస్సు బోధితో దాని, మయా జాతింసరన్తియా.

౪. పాసాణవాపిగామమ్హి, తమ్బపణ్ణిమ్హి రోహణే;

భిక్ఖిత్వాన తువం భన్తే, యదా కకుబన్దకన్దరే.

౫. నిసీదిత్వాన త్వం భత్తం, భుత్తకాలం సరిస్ససి;

తదాహం సునఖీ ఆసిం, విజాతా లద్ధగోచరా.

౬. దారకే ఖాదితుం మయ్హ, మాసన్నా ఖుదపీళితా;

పవేధమానసబ్బఙ్గా, అట్ఠాసిం తవ సన్తికే.

౭. దిస్వా తం మం తదా భన్తే, వేధమానం బుభుక్ఖితం;

ఛిన్నభత్తో తువం హుత్వా, మమం భత్తేన తోసయీ.

౮. తదాహం ముదుచిత్తేన, చిత్తం తయి పసాదయిం;

తేనాహం పుఞ్ఞకమ్మేన, దుతియే అత్తసమ్భవే.

౯. ఇధ రాజకులే జాతా, సబ్బకామసమిద్ధినీ;

చిత్తప్పసాదమత్తేన, లోకనాథస్స సాసనే.

౧౦. తదహుపబ్బజితస్సాపి, ఈదిసా హోన్తి సమ్పదా;

కీదిసం హోతి సమ్బుద్ధే, పసాదేన ఫలం అహో.

౧౧. అఞ్ఞాని పన కిచ్చాని, పహాయాత్తహితే రతో;

అతన్దితో దివారత్తిం, సరాతు రతనత్తయంతి.

ఏవం సామణేరేన కతూపకారం సారాపేత్వా భన్తే తవ దాసియా అనుగ్గహం పటిచ్చ ఇధేవ వసథాతి నిమన్తిత్వా తేన సమ్పటిచ్ఛితే మహన్తం విహారం కారాపేత్వా సామణేరం ఆదిం కత్వా అనేకభిక్ఖుసతే నిమన్తేత్వా విహారే వసాపేత్వా సులభం కత్వా చతుపచ్చయేహి ఉపట్ఠాసి. సామణేరోపి సునఖియా దిన్నదానం అనుస్సరిత్వా తుట్ఠో బుద్ధానుస్సతిం మనసికరోన్తో న చిరేనవ అరహత్తం పత్వా తస్మింయేవ విహారే వసన్తో ఆయుపరియోసానే తత్థేవ పరినిబ్బాయీతి.

౧౨. తియద్ధేసు తిలోకస్మిం, నత్థి వత్థుత్తయం వినా;

సత్తాన మఞ్ఞ మిచ్ఛత్థ, దాయకం సురపాదపం.

కుణ్డలియా వత్థుం దసమం.

మహాసేనవగ్గో చతుత్థో.

ఏత్తావతా జమ్బుదీపుప్పత్తికథా సమత్తా.