౩౫. సాఖమాలపూజికాయ వత్థుమ్హి అయమానుపుబ్బీకథా
అమ్హాకం భగవా దసపారమియో పూరేత్వా అనుక్కమేన తుసితభవనే నిబ్బత్తో దేవేహి ఆరాధితో సక్కరాజకులే పటిసన్ధిం గహేత్వా మాతుకుచ్ఛితో నిక్ఖన్తో అనుక్కమేన పరమాభిసమ్బోధిం పత్వా తతో పట్ఠాయ పఞ్చచత్తాలీససంవచ్ఛరాని ఠత్వా చతురాసీతిధమ్మక్ఖన్ధసహస్సాని దేసేత్వా గణనపథమతీతే సత్తే భవకన్తారతో సన్తారేత్వా సబ్బబుద్ధకిచ్చాని నిట్ఠాపేత్వా కుసినారాయం ఉపవత్తనే మల్లానం సాలవనే యమకసాలాన మన్తరే ఉత్తరసీసకం పఞ్ఞత్తే మఞ్చకే వేసాఖపుణ్ణదివసే దక్ఖిణేన పస్సేన సతో సమ్పజానో అనుట్ఠానసేయ్యాయ నిపన్నో పచ్ఛిమయామే భిక్ఖూ ఓవదిత్వా బలవపచ్చూ-స సమయే మహాపథవింకమ్పేన్తో అనుపాదిసేసాయ నిబ్బాణధాతుయా పరినిబ్బాయి, నిబ్బుతే పన భగవతి లోకనాథే ఆనన్దత్థేరో మల్లరాజూనం ఏతం పవత్తిం ఆరోచేసి. తతో కోసినారకా చ దేవబ్రహ్మాదయో చ సన్నిపతిత్వా నచ్చగీతవాదితేహి మాలాగన్ధాదీహి చ సక్కరోన్తా గరుకరోన్తా మానేన్తా పూజేన్తా చేలవితానాదయో కరోన్తా భగవతో సరీరం నగరమజ్ఝే యత్థ మకుటబన్ధనం నామ మల్లానం చేతియం, తత్థ నేత్వా చక్కవత్తిస్స సరీరం వియ అహతేన వత్థేన వేఠేత్వా తతో విహతేన కప్పాసేన వేఠేత్వాతి ఏవం పఞ్చదుస్సయుగసతేహి వేఠేత్వా ఆయసాయ తేలదోణియా పక్ఖిపిత్వా అఞ్ఞిస్సాయ ఆయసాయ దోణియా పటికుజ్జిత్వా సబ్బగన్ధానం చితకం కరిత్వా భగవతో సరీరం చితకం ఆరోపేసుం. అథ మహాకస్సపత్థేరేన భగవతో పాదే సిరసా వన్దితే దేవతానుభావేన చితకో సమన్తా ఏకప్పహారేనేవ పజ్జలి. భగవతో పన సరీరే దడ్ఢే సుమనమకుళసదిసా ధాతుయో అవసిస్సింసు. తస్మిం కిర సమయే కోసలరఞ్ఞో జనపదే అఞ్ఞతరా గామవాసికా ఇత్థీ భగవతి పరినిబ్బుతే సాధుకీళ్హం ఆగచ్ఛమానా అన్తరామగ్గే అత్తనో సరీరే ఉప్పన్నవాతరోగేన ఉపద్దుతా సాధుకీళ్హం సమ్పాపుణితుం అసక్కోన్తీ సత్థు ఆళాహనం గన్త్వా భగవతో ధాతుసరీరే తీణి సాఖపుప్ఫాని పూజేత్వా పసన్నమానసా పఞ్చపతిట్ఠితేన వన్దిత్వా గతా తాయ ఏవ రత్తియా మజ్ఝిమయామే కాలం కత్వా తావతింసభవనే తింసయోజనికే కనకవిమానే నిబ్బత్తి. తస్సా పుబ్బకమ్మపకాసనత్థం చక్కమత్తాని సాఖపుప్ఫాని తత్త తత్థ ఓలమ్బన్తి. తేహేవ సబ్బం విమానం ఏకోభాసీ [ఏకోభాసి తతో ఇతిసబ్బత్థ] అహోసి. తతో సుగన్ధకరణ్డకం వియ చ అహోసి, సా పన అత్తనో సోభగ్గప్పత్తం అత్తభావఞ్చ విమానసమ్పదఞ్చ పరివారసమ్పత్తియో చ దిస్వా విమ్హితమానసా పుబ్బే కతేన [పుబ్బేకిస్సమే. పుబ్బేకతేనమే ఇతిచకత్థచి] కేన మే పుఞ్ఞకమ్మేనా యం లద్ధాతి ఓలోకన్తీ భగవతో ధాతుసరీరస్మిం పూజితాని తీణి సాఖపుప్ఫాని దిస్వా పసన్నమానసా మహాచక్కప్పమాణం సాఖమాలం హత్థేన ధారేన్తీ ధాతుపూజనత్థాయ అగమాసి. తదా తత్థ సన్నిపతితా మనుస్సా తస్సా రూపసమ్పదఞ్చ హత్తే మహన్తం సాఖమాలఞ్చ దిస్వా విమ్హితమానసా అమ్మ త్వం కత్థ వాసికా. కత్థ పనిమం పుప్ఫం పటిలద్ధన్తి పుచ్ఛింసు, తం సుత్వా దేవధీతా అత్తనా భగవతో ధాతుసరీరస్స పూజితసాఖమాలత్తయానుభావేన పటిలద్ధసమ్పత్తియో చ దిబ్బవిమానఞ్చ పుబ్బే మతకలేవరం చాతి సబ్బం తేసం దస్సేత్వా ధమ్మదేసనావసానే ఆహ.
౧. సమాగతా భవన్తా భో, పస్సన్తు మమ సమ్పదం;
కతమప్పేన కారేన, సమ్మాసమ్బుద్ధధాతుయా.
౨. సాఖమాలాని తీణేవ, హీయ్యోహం మునిధాతుయా;
పూజయిత్వాన సన్తుట్ఠా, నివత్తా తాయ రత్తియా.
౩. మరన్తీ ఖరవాతేన, తమహం సుచరితం సరిం;
తేనాహం పుఞ్ఞకమ్మేన, తావతింసూపగాఅహుం.
౪. తత్థ మే ఆసి పాసాదో, తింసయోజనముగ్గతో;
కూటాగారవరాకిణ్ణో, సాఖమాలాతి [సాధమాలో ఇతిపికత్థచి], విస్సుతో.
౫. యథా సబ్బసుగన్ధేహి, కరణ్డం పరిభావితం;
తథా దిబ్బసుగన్ధేహి, గన్ధితం భవనం మమ.
౬. చక్కమత్తా సాఖపుప్ఫా, తత్థ తత్థూపలమ్బరే [తతవత్థుపలబ్బరే ఇతిపికత్థచి];
దిబ్బగన్ధా పవాయన్తి, మధుబ్బభనిసేవితా.
౭. భస్సన్తి ఏకపుప్ఫస్మా, తుమ్బమత్తా హి రేణవో;
తేహి పిఞ్జరితా దేవా, కీళన్తి చ లలన్తిచ.
౮. పీళన్ధిత్వాన మాలాధయా, సుదిబ్బా భరణానిచ;
సహచ్ఛరా దేవపుత్తా, నచ్చగీతాదిబ్యావటా.
౯. పస్సథేమం భుజఙ్గా భో, సత్తా మోహేన పారుతా;
హీయ్యో మతం పవిద్ధం మే, పూతిభూతం కలేవరం.
౧౦. పుళవేహి సమాకిణ్ణం, మక్ఖికాగణకీళితం;
కాకసోణాదిసత్తాన, మాహారం కుణపాలయం.
౧౧. పత్థేన్తి పురిసా పుబ్బే, అనేకోపాయనేన తం;
దట్ఠుమ్పిదాని నిచ్ఛన్తి, తణ్హాయఞ్ఞాణతా అహో.
౧౨. లోకపజ్జోతకస్సాహం, విమలస్స యసస్సినో;
ధాతుం హీయ్యో మహిం సమ్మా, అజ్జ సగ్గే పతిట్ఠితా.
౧౩. హిత్వానే తాదిసం కాయం, లద్ధందాని మమేదిసం;
దిబ్బత్తభావం సోభాహి, భాసమాన ముదిక్ఖథ.
౧౪. భాసమానాయ మే వాచం, సుణోథేత్థ సమాగతా;
నత్థేవాకతపుఞ్ఞస్స, అణుమత్తం భవే సుఖం.
౧౫. బిన్దుమత్తమ్పి యో పుఞ్ఞ, బీజం రోపేతి సాసనే;
న హా నత్థఫలం [నహపనన్తఫలం ఇతిపికత్థచి] హోతి, యావ నిబ్బాణపత్తియాతి.
ఏవం సా దేవతా అత్తనా పటిలద్ధదిబ్బవిభవం దస్సేత్వా జనకాయం ఓవదిత్వా దిబ్బసాఖపుప్ఫేహి జినధాతుం పూజేత్వా మనుస్సానం పస్సన్తానంయేవ సద్ధిం విమానేన దేవలోకమేవ అగమాసి. తం దిస్వా మహాజనో దానాదీని పుఞ్ఞాని కత్వా దేవలోకం పూరేసీతి.
౧౬. ఏవఞ్హి సా పుప్ఫమత్తేన ధాతుం,
పూజేత్వ దేవేసు అలత్థ భూతిం;
తుమ్హేపి భోన్తో తిదివేసు సాతం,
కామత్థ చే కత్థ పుఞ్ఞాని సాధుంతి.
సాఖమాలపూజికాయ వత్థుం పఞ్చమం.