౩౦. సీవలిత్థేరస్స వత్థుమ్హి అయమానుపుబ్బీకథా
ఇతో కిర కప్పసతసహస్సమత్థకే పదుముత్తరో నామ సత్థా లోకే ఉదపాది ధమ్మదేసనాయ సత్తే అమతమహానిబ్బాణం పాపేన్తో, తస్మిం సమయే భగవా హంసావతియం సరాజికాయ పరిసాయ మజ్ఝే ఏకం భిక్ఖుం లాభీనం అగ్గట్ఠానే ఠపేసి. తదా రాజా తం దిస్వా తం ఠానం కామయమానో బుద్ధపముఖస్స సఙ్ఘస్స మహాదానం దత్వా భగవతో పాదమూలే సిరసా నిపజ్జి, తదాస్స భగవా అనాగతే గోతమస్స భగవతో సాసనే తం ఠానం లభిస్ససీతి వత్వా బ్యాకాసి. తం సుత్వా ముదితో రాజా పుఞ్ఞాని కత్వా దేవలోకే నిబ్బత్తి. తతో అపరభాగే బారాణసియం సేట్ఠిపుత్తో హుత్వా పచ్చేకబుద్ధసహస్సం చతుపచ్చయదానేన యావజీవం పటిజగ్గిత్వా దేవలోకే నిబ్బత్తో మహన్తం సమ్పత్తి మనుభవిత్వా తతో చుతో విపస్సిస్స భగవతో కాలే బన్ధుమతీనగరే అఞ్ఞతరస్మిం కులగేహే నిబ్బత్తి. సో తస్మిం సమయే సేనగుత్తట్ఠానే ఠత్వా రఞ్ఞో కమ్మం కరోతి, తదా నగరవాసినో ఉపాసకగణా విపస్సీసమ్మాసమ్బుద్ధం ఉపసఙ్కమ్మ వన్దిత్వా భగవా భన్తే ససావకో అమ్హాకం అనుగ్గహం కరోతూతి స్వాతనాయ నిమన్తేత్వా మహాదానం దత్వా సబ్బే ఏకచ్ఛన్దా భగవన్త ముద్దిస్స మహారహం మహాపరివేణం కారాపేత్వా పరివేణమహే మహాదానం దదన్తా దానగ్గే అసుకం నామ నత్థీతి న వత్తబ్బన్తి వత్వా దానం పటియాదేత్వా దానగ్గం ఓలోకేన్తా నవదధిఞ్చ పటలమధుఞ్చ అపస్సన్తా పురిసే పక్కోసిత్వా సహస్సం దత్వా దధిమధుం ఖిప్పం పరియేసిత్వా ఆనేథాతి పేసేసుం, తే సహస్సం గహేత్వా దధిమధుం ఉపధారేతుం తత్థ తత్థ విచరన్తా ద్వారన్తరే అట్ఠంసు, తదా అయం సేనగుత్తో రఞ్ఞో సభత్తం దధిమధుం ఆదాయ గచ్ఛన్తో మహాద్వారం సమ్పాపుణి, అథ తే దధిమధుం దిస్వా భో కహాపణం గహేత్వా ఇమం దేహీతి యాచింసు. తేన [తేనదస్సామి ఇతిపికత్తచి] న దస్సామీతి వుత్తే యావసహస్సం వడ్ఢేత్వా యాచింసు. తతో సేనగుత్తో ఇమం అప్పగ్ఘం సహస్సేన యాచథ, కి మనేన కరోథాతి పుచ్ఛి, తేహి సమ్బుద్ధత్థాయాతి వుత్తే తేనహి అహమేవ దస్సామీతి జీరమరిచాదీహి సక్ఖరమధుఫాణితాదయో యోజేత్వా దానగ్గం ఉపనామేసి. తం సత్థు ఆనుభావేన బుద్ధపముఖస్స అట్ఠసట్ఠిభిక్ఖుసతసహస్సస్స పహోణకం అహోసి. తతో సో తేన పుఞ్ఞకమ్మేన దేవమనుస్సలోకేసు సమ్పత్తి మనుభవిత్వా అపరభాగే అమ్హాకం భగవతో కాలే కోలియనగరే మహాలిలిచ్ఛవిరఞ్ఞో ఉపనిస్సాయ సుప్పియాయ నామ అగ్గమహేసియా కుచ్ఛిస్మిం పటిసన్ధిం గణ్హి. సో సత్తమాససత్తసంవచ్ఛరాని మాతుకుచ్ఛియం వసిత్వా సత్తదివసాని మూళ్హగబ్భో దుక్ఖమనుభవి. మాతుకుచ్ఛితో నిక్ఖమన్తస్స తస్స మాతాపితరో సీవలీతి నామ మకంసు. ఏవం మహాపుఞ్ఞస్స ఏత్తకం కాలం మాతుకుచ్ఛిమ్హి దుక్ఖానుభవనం అత్తనావ కతేన పాపబలేన అహోసి, సో కిర అతీతే రాజా హుత్వా అత్తనో సపత్తరఞ్ఞా సద్ధిం సఙ్గామేన్తో మాతరా సద్ధిం మన్తేసి. సా నగరం రున్ధిత్వా అమిత్తే గణ్హితుం సక్కాతి ఉపాయ మదాసి, సోపి తస్సా వచనేన నగరం రున్ధిత్వా సత్తమే దివసే అగ్గహేసి, తేన పాపకమ్మబలేన మాతాపుత్తానం ఏవం మహన్తం దుక్ఖం అహోసీతి. తతో సా పుత్తం విజాయనకాలే సత్తమే దివసే భగవన్తం అనుస్సరిత్వా సుఖేన భారం ముఞ్చి. తుట్ఠా సా సత్తమే దివసే బుద్ధపముఖస్స భిక్ఖుసఙ్ఘస్స మహాదానం అదాసి, అథస్సా పుత్తో సత్తవస్సికకాలే గేహా నిక్ఖమ్మ సత్థారం దిస్వా పబ్బజ్జం యాచి. సత్థా సారిపుత్తత్థేరస్స నియోజేసి, తతో సారిపుత్తత్థేరేన ఉపజ్ఝాయేన మోగ్గల్లానమాచరియం కత్వా పబ్బజి, అథ సో ఖురగ్గేయేవ అరహత్తం పత్వా బుద్ధసాసనం సోభేసి, సో పుబ్బే కతపుఞ్ఞానుభావేన మహాపుఞ్ఞో అహోసి లాభీనఞ్చ అగ్గో. అథేకస్మిం సమయే భగవా రేవతత్థేరం దస్సనాయ ఖదిరవనవిహారం గచ్ఛన్తో తింసభిక్ఖుసహస్సేహి సద్ధిం తింసయోజనికం ఛట్టితకన్తారం సమ్పాపుణి నిరూదకం అప్పభక్ఖం. యేభుయ్యేన దేవతా సీవలిత్థేరే పసన్నా. తస్మా భగవా సీవలిత్థేరం పురతో చారికం కత్వా దేవతాహి కారాపితే విహారే వసన్తో దేవతాహి సజ్జితదానం పరిభుఞ్జన్తో రేవతత్థేరం సంపాపుణిత్వా గతకమ్మం నిట్ఠాపేత్వా జేతవనమాగమ్మ లాభీనం అగ్గట్ఠానే తం ఠపేసీతి. తేన వుత్తం అపదానే.
౧. పదుముత్తరో నామ జినో, సబ్బధమ్మేసు చక్ఖుమా;
ఇతో సతసహస్సమ్హి, కప్పే ఉప్పజ్జి నాయకో.
౨. సీలం తస్స అసఙ్ఖ్యేయ్యం, సమాధి వజిరూపమో [వజిరూపమా ఇతికత్థచి];
అసంఖియం ఞాణవరం, విముత్తి చ అనోపమా.
౩. మనుజామరనాగానం, బ్రహ్మానఞ్చ సమాగమే;
సమణబ్రాహ్మణాకిణ్ణే, ధమ్మం దేసేతి నాయకో.
౪. ససావకం మహాలాభిం, పుఞ్ఞవన్తం జుతిన్ధరం,
ఠపేసి ఏతదగ్గమ్హి, పరిసాసు విసారదో.
౫. తదాహం ఖత్తియో ఆసిం, పురే హంసవతీవ్హయే [హంసావతవ్హయే ఇతిసబ్బత్థ];
సుత్వా జినస్స తం వాక్యం, సావకస్స గుణం బహుం.
౬. నిమన్తయిత్వా సత్తాహం, భోజయిత్వా ససావకం;
మహాదానం దదిత్వాన, తం ఠానమభిపత్థయిం.
౭. తదా మం వినతం పాదే, దిస్వాన పురిసాసభో;
సో సరేన మహావీరో, ఇమం వచనమబ్రవీ.
౮. తతో జినస్స వచనం, సోతుకామా మహాజనా;
దేవదానవగన్ధబ్బా, బ్రహ్మానోచ మహిద్ధికా.
౯. సమణబ్రాహ్మణా చాపి, నమస్సిసుం కతఞ్జలీ;
నమో తే పురిసాజఞ్ఞ, నమో తే పురిసుత్తమ.
౧౦. ఖత్తియేన మహాదానం, దిన్నం సత్తాహకమ్పి [సత్తాహకంపితో ఇతిపికత్థచి] నో;
సోతుకామా ఫలం తస్స, బ్యాకరోహి మహామునే.
౧౧. తతో అవోచ భగవా, సుణోథ మమ భాసితం;
అప్పమేయ్యమ్హి బుద్ధస్మిం, గుణమ్హి సుప్పతిట్ఠితా.
౧౨. దక్ఖిణా దాయకం పత్వా, అప్పమేయ్యఫలావహా;
అపి చే స మహాభోగో, ఠానం పత్థేతి ముత్తమం.
౧౩. లాభీ విపులలాభీనం, యథా భిక్ఖు సుదస్సనో;
తథాహంపి భవేయ్యన్తి, లచ్ఛతే తం అనాగతే.
౧౪. సతసహస్సితో కప్పే, ఓక్కాకకులసమ్భవో;
గోతమోనామ నామేన, సత్థా లోకే భవిస్సతి.
౧౫. తస్స ధమ్మేసు దాయాదో, ఓరసో ధమ్మనిమ్మితో;
సీవలి నామ నామేన, హేస్సతి సత్థుసావకో.
౧౬. తేన కమ్మేన సుకతేన, చేతనాపణిధీహి చ;
జహిత్వా మానుసం దేహం, తావతింసూపగో అహం.
౧౭. తతోపరస్మింసమయే, బారాణసిపురుత్తమే;
సేట్ఠిపుత్తో అహం ఆసిం, అడ్ఢప్పత్తో మహాధనో.
౧౮. సహస్సమత్తే పచ్చేక, నాయకే చ నిమన్తియ;
మధురేనన్నపానేన, సన్తప్పేసింతదాదరో.
౧౯. తతో చుతో ఛకామగ్గే, అనుభోసింమహాయసం;
దేవచ్ఛరాపరివుతో, పాసాదే రతనామయే.
౨౦. ఏవం అచిన్తియా బుద్ధా, బుద్ధధమ్మా అచిన్తియా;
అచిన్తియే పసన్నానం, విపాకోపి అచిన్తియో.
౨౧. ఏకనవుతితో కప్పే, విపస్సీనామ నాయకో;
ఉప్పజ్జి చారునయనో, సబ్బధమ్మవిపస్సకో.
౨౨. తదాహం బన్ధుమతియా, కులస్సఞ్ఞతరస్స చ;
దయితో పత్థితో పుత్తో, ఆసిం కమ్మన్తబ్యావటో.
౨౩. తదా అఞ్ఞతరో పూగో, విపస్సిస్స మహేసినో;
పరివేణం అకారేసి, మహన్త మితి విస్సుతం.
౨౪. నిట్ఠితే చ మహాదానం, దదం ఖజ్జకసంయుతం;
నవం దధి మధుఞ్చేవ, విచినం న చ మద్దస.
౨౫. తదాహం తం గహేత్వాన, నవం దధి మధుమ్పిచ,
కమ్మసామిఘరం గచ్ఛం, తమేనం [తమేసం ఇతిసబ్బత్థ] దాన మద్దసం.
౨౬. సహస్సమ్పి చ దత్వాన, న లతింసు చ తం ద్వయం;
తతో ఏవం విచిన్తేసిం, నేతం హేస్సతి ఓరకం.
౨౭. యథా ఇమే జనా సబ్బే, సక్కరోన్తి తథాగతం;
అహమ్పి కారం కస్సామి, ససఙ్ఘే లోకనాయకే.
౨౮. తదాహమేవం చిన్తేత్వా, దధింమధుఞ్చ ఏకతో;
యోజేత్వా లోకనాథస్స, ససఙ్ఘస్స అదాసహం.
౨౯. తేన కమ్మేన సుకతేన, చేతనాపణిధీహి చ;
జహిత్వా మానుసం దేహం, తావతింస మగఞ్ఛహం.
౩౦. పునాహం బారాణసియం, రాజా హుత్వా మహాయసో;
సత్తుకస్స తదా రుద్ధో, ద్వారరోధం అకారయిం.
౩౧. తతో సపత్తినో [సమ్పత్తినో; సపత్తానో ఇతిచకత్థచి] రుద్ధా, ఏకాహం రక్ఖితా అహుం;
తతో తస్స విపాకేన, పాపుణిం నిరయం భుసం.
౩౨. పచ్ఛిమే చ భవే దాని, జాతోహం కోలియే పురే;
సుప్పవాసా చ మే మాతా, మహాలి లిచ్ఛవీ పితా.
౩౩. ఖత్తియే పుఞ్ఞకమ్మేన, ద్వారరోధస్స వాహసా;
సత్తమాసే సత్తవస్సే, వసింకుచ్ఛిమ్హి దుక్ఖితో.
౩౪. సత్తాహం ద్వారమూళ్హోహం, మహాదుక్ఖసమప్పితో;
మాతా మే ఛన్దదానేన, ఏవ మాసి సుదుక్ఖితా.
౩౫. సువత్థితోహం నిక్ఖన్తో, బుద్ధేన అనుకమ్పితో;
నిక్ఖన్తదివసేయేవ, పబ్బజిం అనగారియం.
౩౬. ఉపజ్ఝా సారిపుత్తో మే, మోగ్గల్లానో మహిద్ధికో;
కేసే ఓరోపయన్తో మే, అనుసాసి మహామతి.
౩౭. కేసేసు ఛిజ్జమానేసు [ఛన్నమనేసు ఇతిపికత్థచి], అరహత్తమపాపుణీం;
దేవో నాగా మనుస్సా చ, పచ్చయాను పనేన్తి మే.
౩౮. పదుముత్తరనామఞ్చ, విపస్సించ వినాయకం;
సంపూజయిం పముదితో, పచ్చయేహి విసేసతో.
౩౯. తతో తేసం విపాకేన, కమ్మానం విపులుత్తమం;
లాభం లభామి సబ్బత్థ, వనే గామే జలే థలే.
౪౦. రేవతం దస్సనత్థాయ, యదా యాతి వినాయకో;
తింసభిక్ఖుసహస్సేహి, సహ లోకగ్గనాయకో.
౪౧. తదా దేవో పనీతేహి [పణీతేహి ఇతిసబ్బత్థ], మమత్థాయ మహామతి;
పచ్చయేహి మహావీరో, ససఙ్ఘో లోకనాయకో.
౪౨. ఉపట్ఠితో మయా బుద్ధో, గన్త్వా రేవతమద్దస;
తతో జేతవనం గన్త్వా, ఏతదగ్గే ఠపేసిమం.
౪౩. లాభీనం సీవలి అగ్గో, మమ సిస్సేసు భిక్ఖవో;
సబ్బేలోకహితో సత్థా, కిత్తయీ పరిసాసుమం.
౪౪. కిలేసా ఝాపితా మయ్హం, భవా సబ్బే సమూహతా;
నాగోవ బన్ధనం ఛేత్వా, విహరామి అనాసవో.
౪౫. స్వాగతం వత మే ఆసి, బుద్ధసేట్ఠస్స సన్తికం;
తిస్సో విజ్జా అనుప్పత్తో, కతం బుద్ధస్స సాసనం.
౪౬. పటిసమ్భిదా చతస్సోపి, విమోక్ఖా పిచ అట్ఠిమే;
ఛళభిఞ్ఞా సచ్ఛికతా, కతం బుద్ధస్స సాసనన్తి.
ఇత్థం సుదం ఆయస్మా సీవలిత్థేరో ఇమా గాథాయో అభాసిత్థాతి.
౪౭. సుత్వాన ఏతం చరితం మహబ్భుతం,
పుఞ్ఞానుభావఞ్చ సిరిం సిరీమతం;
హిత్వా కుసీతం కుసలం కరోథ,
కామాత్థ కామం భవభోగనిబ్బుతిం.
సీవలిత్థేరస్స వత్థుం దసమం.
యక్ఖవఞ్చితవగ్గో తతియో.